Niečakana miakki prysud polskamu aktyvistu, apraŭdańnie aktyvistki «Moładzi BNF».
Niečakana miakki prysud polskamu aktyvistu, apraŭdańnie aktyvistki «Moładzi BNF».
Siońnia ŭ Kastryčnickim rajonnym sudzie Horadni adbyŭsia sudovy praces pavodle kryminalnaj spravy Miečysłava Jaskieviča — adnaho z kiraŭnikoŭ nie pryznanaha ŭładami Sajuzu palakaŭ. Sud pryznaŭ Jaskieviča vinavatym u źbićci mužčyny na tralejbusnym prypynku try miesiacy tamu i prysudziŭ štraf — 1 miljon 240 tysiač rubloŭ. Akramia taho, spadar Jaskievič pavinien zapłacić paciarpiełamu 500 tysiač rubloŭ — jak maralnuju kampensacyju.
Pavodle prakurora Časnojć, paśla bojki ź Jaskievičam u paciarpiełaha Sabka byli vyciatyja niekatoryja miescy, ale razładu zdaroŭja nia zdaryłasia. Sam Jaskievič usio admaŭlaŭ — jon zajaviŭ, što suprać jaho zładzili pravakacyju. Vysłuchaŭšy pakazańni ŭsich śviedkaŭ, advakat Uładzimier Kisialevič zaznačyŭ:
Kisialevič: «Ja, jak jahony abaronca, dumaju, što pazycyja Jaskieviča nakont taho, što jaho pieraśledujuć, była abhruntavanaja ŭ sudzie, pakolki i jon sam, i śviedki havaryli, što za apošnija hady jaho nieadnarazova pieraśledavali z palityčnych matyvaŭ — za jaho dziejnaść u Sajuzie palakaŭ, za toje, što jon sapraŭdy zajmaje aktyŭnuju hramadzkuju i palityčnuju pazycyju».
Paciarpieły — rabočy pradpryjemstva «Horadnia Azot» Ihar Sabko. Jon niekalki razoŭ zaznačaŭ u sudzie, što taksama palak, ale nie zaŭvažaŭ z‑za hetaha nijakaha pieraśledu. A voś što skazała kiraŭnica Sajuzu palakaŭ Anžalika Borys, jakaja vystupała ŭ sudzie jak śviedka z boku Miečysłava Jaskieviča:
Borys: «Dla jaho abarony sabrali kala tysiačy podpisaŭ, jany źbiralisia nia tolki ŭ Horadni. I ludzi pryjšli padtrymać jaho. Nu, a tak našaja arhanizacyja funkcyjanuje — chacia ja nie mahu skazać, što nas zusim nie čapajuć, tamu što nielha nazvać voś hetuju sytuacyju narmalnaj, kali adnosna ludziej robiacca takija brutalnyja pravakacyi».
Prychilniki Miečysłava Jaskieviča paśla pracesu pačali źbirać pierad budynkam sudu hrošy, kab dapamahčy jamu spłacić štraf. Spravu Jaskieviča razhledzieła sudździa Žana Vierchaś.
* * *
Sud Frunzienskaha rajonu Miensku siońnia apraŭdaŭ aktyvistku «Moładzi BNF» Nastu Aleksandrovič.
Dziaŭčynu zatrymali supracoŭniki KDB 12 studzienia, napiaredadni miascovych vybaraŭ, i advieźli ŭ milicyju Frunzienskaha rajonu. Nastu źvinavacili ŭ drobnym chulihanstvie i troje sutak pratrymali ŭ turmie na Akreścina.
16 studzienia sud pieranios razhlad spravy na 9 lutaha, i siońnia sud pastanaviŭ spynić administracyjnuju spravu na moładzievuju aktyvistku.
Kamientary