Jaki miod samy smačny

U jaho siamji pčalarstvam zajmalisia maci i dziadula. Dla apošniaha hety zaniatak staŭsia trahičnym: pamior ad ukusaŭ pčoł. A sam Aleh upieršyniu surjozna sutyknuŭsia ź miodam piać hadoŭ tamu.

Raniej pracavaŭ inžynieram na MTZ.

Pa voli losu jon, čałaviek ź dźviuma vyšejšymi adukacyjami, syšoŭ z toj pracy. Potym źmianiŭ jašče niekalki miescaŭ — usio nie toje.

U vyniku patrapiŭ u cech pa rasfasoŭcy miodu pry Śviata-Jelisaviecinskim manastyry, što ŭ Navinkach. Pačynaŭ zvyčajnym roznarabočym. Praź niekalki miesiacaŭ uznačaliŭ cech, a jašče praź niekatory čas staŭ kiraŭnikom hrupy pa arhanizacyi vystavaŭ miodu. «Boh nakiroŭvaje čałavieka tudy, kudy ličyć patrebnym i dzie jamu budzie lepš», — ličyć Aleh.

Nastupnym žyćciovym etapam stała naradžeńnie bliźniatak. Kab zabiaśpiečvać siamju, patrebna było bolš hrošaj. A manastyr nie moh płacić bolej. Aleh uładkavaŭsia ŭ pryvatnuju firmu, jakaja handlavała ŭkrainskim miodam. Praz paŭhoda staŭ jaje dyrektaram. «I tady ŭ mianie ŭźnikła dumka: niaŭžo ŭ nas brakuje svajho vysokajakasnaha miodu, što treba zavozić z Ukrainy, Ałtaja, Baškiryi?» — kaža Aleh.

Parazmaŭlaŭšy ź biełaruskimi pčalarami, jon pryjšoŭ da vysnovy, što biełaruski miod — samy smačny, navat lepšy za toj, što da nas traplaje z-za miažy.

«Nivodzin baškir nie paviazie ŭ Biełaruś jakasny pradukt, heta prosta niavyhadna — lepš pradać u Maskvie.

Jak adroźnić jakasny miod ad padrobki?

Jość prosty sposab pravieryć jakaść miodu. Praz 5-7 chvilin paśla taho, jak vy pakaštavali sapraŭdny miod, u rocie nie pavinna zastacca anijakaha prysmaku, navat sałodkaha.

Biełaruski miod Aleh paraŭnoŭvaje ź juvielirnym vyrabam ručnoj pracy. U našaj krainie nie šmat raślinaŭ-miedanosaŭ, a vilhotnaść pavietra vysokaja. Praz heta pčała chutčej rastračvaje siły na zbor miodu, joj davodzicca bolš pracavać. Pčalaru, kab atrymać jakasny pradukt, treba karpatliva vykonvać technałohiju zboru.

Nabraŭšysia vopytu, Aleh vyrašyŭ stvaryć pradpryjemstva, kab zajmacca biełaruskim pčalarstvam. Tak źjaviŭsia «BiełMiod».

U kramie spadara Bajarčuka vystaŭlena bahata hatunkaŭ miodu: palavy, łuhavy, lipavy, lasny, hrečkavy, kvietkavy, sardečnikavy, majski. Nasamreč nazvać možna jašče bolej. Ličycca, što toj ci inšy hatunak maje svaje ŭłaścivaści.

Hračany miod asabliva bahaty na vitaminy i mikraelemienty, u im šmat žaleza. Karysny pry małakroŭi, zachvorvańniach nyrak i piačonki.

Lipavy miod vałodaje antybakteryjalnym i patahonnym dziejańniem. Jaho dobra prymać pry prastudzie.

Spryjalna ŭpłyvaje na sardečna-sasudzistuju sistemu kvietkavy miod. Jon karysny i pry hiniekałahičnych zachvorvańniach.

Słaniečnikavy miod bahaty na pravitamin A, maje mocnyja bakterycydnyja ŭłaścivaści.

Miod z akacyi karysny pry biassońnicy i zachvorvańniach straŭnika.

Na dumku Aleha, luby miod — karysny dla zdaroŭja. «Ja časta paraŭnoŭvaju miod ź ludźmi. Nielha skazać, naprykład, što ciomnaskury čałaviek horšy ci lepšy za inšaha. Jon ža taksama Čałaviek. A astatniaje — heta asabistyja pieravahi». Aproč samoha miodu, karysnymi źjaŭlajucca inšyja pradukty pčalarstva.

Zabrus, ci piačatka miodu — heta vaskovyja «kryšački», jakimi pčoły zapiačatvajuć soty jak svojeasablivy znak jakaści. Karysny dla lačeńnia bronchaŭ, asabliva dla dziaciej. Košt za 100 hram — 10 tysiač rubloŭ.

Prapolis — mocny pryrodny antysieptyk. Lačeńnie anhiny, zažyŭleńnie ran, jazvy straŭnika, paradantozu. Košt — 700 rubloŭ za 1 hram.

Piarha, ci «pčaliny chleb» — pierapracavany pčołami pyłok, zakładzieny ŭ soty. Heta mocny imunastymulatar. Bahaty na ščołačy i aminakisłoty. Košt za 100 hram — 45 tysiač.

Z padmoru (miortvych pčoł) robiać śpirtavyja nastojki (20 hram na butelku harełki) dla lačeńnia prastaty, chvarobaŭ sustavaŭ, reŭmatyzmu. Košt za 20 hram — 20 tysiač rubloŭ.

Pčaliny vosk vykarystoŭvajecca ŭ narodnaja miedycynie i ŭ kaśmietyčnych metach, dla vytvorčaści maziaŭ i kremaŭ. Košt — 90 tysiač za 1 kh.

• 0
• 0
• 0
• 0
• 0
• 0