U Miensku adbyŭsia źjezd BSDP (Hramada)

U niadzielu ŭ Miensku na čarhovym źjeździe Biełaruskaj sacyjał‑demakratyčnaj partyi (Hramada) abrana partyjnaje kiraŭnictva. Staršyniom na biezalternatyŭnaj asnovie pieraabrany ciapierašni lider partyi Alaksandar Kazulin.

Za Alaksandra Kazulina prahałasavała 55 delehataŭ z 75‑ci. Nahadajem, Kazulin adbyvaje piać z pałovaj hadoŭ źniavoleńnia ŭ papraŭčaj kalonii. Tamu vykonvać jaho abaviazki budzie pieršy namieśnik.

Alaksandar Kazulin u svaim pasłańni źjezdu prapanavaŭ pakinuć na hetaj pasadzie Anatola Laŭkoviča. Adnak u biuleteni dla hałasavańnia była jašče ŭniesiena kandydatura Aleha Voŭčaka. Balšynia delehataŭ prahałasavała za Anatola Laŭkoviča.

U svaim vystupie Alaksiej Karol vykazaŭsia adnosna «antykazulinskaj kampanii» asobnych aktyvistaŭ:

«Strašna nia tolki z maralnaha punktu hledžańnia, strašna z palityčnaha – kali b naš źjezd nie pastaviŭ pytańnia ab abrańni Kazulina i nia vyrašyŭ jaho abrać staršyniom. Heta ŭžo palityčnaja paraza partyi. Heta ciažka i strašna było b i było b abraźliva. I my byli b ściortyja pa sutnaści z palityčnaj areny. Ale hetaja prapanova ŭźnikaje. Ja siońnia ŭściešany: ciapier pra Kazulina my nia kažam, što jamu treba syści z pasady staršyni, što treba abrać staršyniom niekaha inšaha. Heta my vyratavali svoj tvar i svoj maralny voblik. Ciapier Kazulin dla partyi palityčna značyć bolš, čym partyja dla Kazulina. Uzajemazaležna. I kali ŭvieś śviet padymaje hetuju kampaniju salidarnaści, za vyzvaleńnie palitviaźniaŭ, najpierš Kazulina, to heta i nam znak, jak siabie pavodzić».

Pasłańnie źjezdu ad Alaksandra Kazulina začytaŭ jaho advakat Ihar Rynkievič. Jon taksama nahadaŭ, što Kazulin vystupaje za praviadzieńnie Kanhresu abjadnanych demakratyčnych siłaŭ da 26 krasavika:

«Pieršy pastulat Kazulina: paśla 21 vieraśnia 2006 hodu Alaksandar Łukašenka kančatkova nielehitymny. Pa‑ druhoje, treba iści na kanhres, jaki ŭziaŭ by na siabie častku voś hetaj lehitymnaści i ŭziaŭ častku funkcyjaŭ i vystupaŭ by jak subjekt u pieramovach z Eŭraźviazam, Rasiejaj i z toj častkaj aficyjnych struktur, jakaja zachoča iści na mahčymuju transfarmacyju ŭłady, demakratyzacyju. Jon ličyć, što treba ŭtvarać na hetym kanhresie ŭrad narodnaha davieru. Voś, kaža, dzie kryter liderstva. Voś dzie Milinkievič, kali choča, zabiraje paŭnamoctvy, stanovicca staršyniom. Kazulin kaža: »Kali nia znojdziecca toj, chto zachoča ŭznačalić hety ŭrad narodnaha davieru –ia zhodny».

Najpieršaj zadačaj BSDP (Hramada) ličyć vyzvaleńnie z turmy svajho staršyni i ŭsich palitviaźniaŭ. U svaim dakładzie Anatol Laŭkovič taksama zajaviŭ, što «Hramada» vystupaje za abjadnańnie ŭsich demakratyčnych siłaŭ i najpierš levych.

Delehat Aleś Abramovič zaklikaŭ paśla zakančeńnia źjezdu vyjści na Kastryčnickuju płošču Miensku z patrabavańniem vyzvaleńnia Alaksandra Kazulina i inšych palitviaźniaŭ.

«Pytańnie pieraniesiena ŭ roznaje. Ja sprabavaŭ damahacca taho, kab hetaja akcyja była pastaŭlenaja asobnym punktam paradku dnia. Ale jana pieraniesienaja ŭ roznaje».

Delehat Valancin Łučko z Horadni zaklikaŭ pačać aktyŭnuju padrychtoŭku da 25 sakavika:

«Heta sapraŭdny dzień, jaki moža źjadnać realna biełarusaŭ. A ŭsie papiarednija i paźniejšyja vystupleńni nosiać bolš druhasny charaktar paraŭnalna z hetym dniom. Tamu heta śviata – heta nia tolki symbal śviata, ale i symbal baraćby biełaruskaha narodu za niezaležnaść, svabodu i demakratyju».

Źjezd prachodziŭ u siadzibie partyi BNF. A heta nievialikaje pamiaškańnie, i niekatoryja z delehataŭ vymušanyja byli stajać u kalidory. Znajści inšaje miesca ŭ Miensku kiraŭnictvu partyi nie ŭdałosia. Asobnyja ŭstanovy admovili, a Pałac kultury aŭtazavodu prapanavaŭ tolki vialikuju zalu – bolš jak na tysiaču miescaŭ: byŭ vystaŭleny bujny košt arendy, i partyja ad hetaha varyjantu vymušanaja była admovicca.

Vykanaŭca abaviazkaŭ staršyni partyi Anatol Laŭkovič skazaŭ:

«U hetym pamiaškańni najbolš nadziejna, i nam tut nia buduć čynić nijakich pieraškod. Hałoŭnaje, kab źjezd adbyŭsia i kab my dasiahnuli toj hałoŭnaj mety, jakaja staić pierad partyjaj – heta arhanizacyjnaje ŭmacavańnie partyi».

Siabrami BSDP (Hramada) źjaŭlajucca 1452 čałavieki. U joj naličvajecca 96 arhanizacyjaŭ. U pracy źjezdu brali ŭdzieł taksama pradstaŭniki likvidavanych uładami arhanizacyjaŭ.

Aleś Daščynski, Radyjo Svaboda

• 0
• 0
• 0
• 0
• 0
• 0
• 0
• 0