Ułady Hiermanii zajavili pra «faktyčnuju niemahčymaść» praviadzieńnia ŭ siabie čempijanatu śvietu pa chakiei, kali ŭ im budzie ŭdzielničać Rasija
Urad Hiermanii ličyć «faktyčna niemahčymym» praviadzieńnie ŭ krainie čempijanatu śvietu pa chakiei 2027 hoda, kali ŭ turniry budzie ŭdzielničać zbornaja Rasii. Pra heta 6 listapada zajaviŭ aficyjny pradstaŭnik niamieckaha ŭrada Štefan Karnelius paśla kansultacyj ź Mižnarodnaj fiederacyjaj chakieja (IIHF), Niamieckim chakiejnym sajuzam i Niamieckim alimpijskim spartyŭnym sajuzam.
Pa słovach Karneliusa, Hiermanija choča pravieści čempijanat u zapłanavanyja terminy, adnak viartańnie rasijskaj zbornaj moža vyklikać bajkoty z boku inšych udzielnikaŭ, što zrobić praviadzieńnie spabornictvaŭ praktyčna niemahčymym. Tamu ciapier niamieckija ŭłady majuć namier praź pieramovy vyvučyć mahčymyja varyjanty vyrašeńnia situacyi.
Pradstaŭnik niamieckaha ŭrada adznačyŭ, što prablemy ŭźnikajuć jak z punktu hledžańnia sportu, tak i z ekanamičnaha boku. Niekalki krain užo pahražali bajkotam turniru ŭ vypadku ŭdziełu Rasii. Siarod ich — Finlandyja, jakaja źjaŭlajecca dziejnym čempijonam śvietu. Na dumku Karneliusa, heta śviedčyć pra toje, što mižnarodnaja chakiejnaja supolnaść nie padtrymlivaje viartańnie rasijskaj zbornaj, niahledziačy na rašeńnie Spartyŭnaha arbitražnaha suda.
Akramia taho, češski aŭtavytvorca Škoda, jaki z 1993 hoda źjaŭlajecca hienieralnym sponsaram čempijanataŭ śvietu pa chakiei, papiaredziŭ, što moža spynić padtrymku turniru ŭ vypadku dopusku Rasii. Anałahičnyja zajavy zrabili i niekatoryja inšyja partniory spabornictvaŭ.
Raniej mahčymaść admovy Hiermanii ad praviadzieńnia čempijanatu dapuskaŭ staršynia praŭleńnia Niamieckaha chakiejnaha sajuza Frank Łuc. Jon zajaviŭ, što pazicyja arhanizacyi zastajecca niaźmiennaj: jana vystupaje suprać viartańnia rasijskich nacyjanalnych zbornych na mižnarodnyja chakiejnyja turniry. Pavodle jaho słoŭ, udzieł Rasii mieŭ by dla Hiermanii surjoznyja nastupstvy ŭ śfierach biaśpieki, palityki i ekanomiki.
Čempijanat śvietu pa chakiei 2027 hoda pavinien prajści z 14 da 30 maja na arenach u Dziusieldorfie, Hielzienkirchienie i Manhiejmie. Udzielnikaŭ raźmierkavali na dźvie hrupy pa vosiem zbornych jašče viasnoj 2026 hoda. Rasija i Biełaruś u skład udzielnikaŭ nie ŭvajšli, pakolki raniej byli adchilenyja ad mižnarodnych spabornictvaŭ praz rasijskuju ahresiju suprać Ukrainy i padtrymku hetaj ahresii z boku Biełarusi.
Raskład matčaŭ užo zaćvierdžany, a ŭ kastryčniku pačaŭsia prodaž kvitkoŭ. Kali Rasiju ŭsio ž dapuściać da turniru, arhanizataram, pavodle paviedamleńniaŭ ŚMI, mahčyma, daviadziecca vyklučyć ź jaho zbornuju Ukrainy. Jana maje najnižejšy rejtynh siarod kamand, jakija prajšli adbor, i ŭpieršyniu z 2007 hoda zavajavała prava ŭdzielničać u elitnym čempijanacie śvietu.
Hałoŭny sponsar Mižnarodnaj fiederacyi chakieja pryhraziŭ admovicca ad čempijanatu śvietu ŭ vypadku dopusku Rasii
Kanada nie dapuścić chakieistaŭ ź Biełarusi i Rasii da ŭdziełu ŭ moładzievym čempijanacie śvietu
Łatvija zajaviła, što nie budzie hulać u chakiej suprać Biełarusi i Rasii. I jana takaja nie adna
Zbornuju Rasiju viartajuć da mižnarodnych chakiejnych spabornictvaŭ
Zamiest pareštkaŭ Vitaŭta za ścianoj Vilenskaj katedry znajšli tolki kuču kamianioŭ. Ale ŭłady Litvy hatovyja vydatkavać na praciah pošukaŭ jašče 1,5 miljona jeŭra3232
Kamientary