Žonka Miadźviedzieva budzie adpačyvać na italjanskim SPA-kurorcie

Žonka prezidenta Rasii Śviatłana Miadźviedzieva prybyła na adpačynak u Italiju, kab pravieści amal tydzień u znakamitym piacizorkavym SPA-kurorcie Grand Hotel La Pace ŭ Montiekatini Termie, što ŭ Taskanie. Pra heta paviedamlaje NEWSru.com sa spasyłkaj na italjanskaje ahienctva ANSA.

Ciopły klimat Taskany i kulturnaja spadčyna rehijonu vabiać turystaŭ z usiaho śvietu. Ale mała chto ź ich zdolny dazvolić sabie taki razmach, jak žonka rasijskaha prezidenta.

«U našaj cichaj miascovaści pierapałoch. Učora za kiłamietr ad mianie ŭ piacizorkavuju haścinicu Grand Hotel La Pace ŭ Montekacini-Terme ŭ supravadžeńni 30 čałaviek achovy zajechała Śviatłana Uładzimiraŭna Miadźviedzieva», -- piša ŭ svaim błohu rasijski žurnalist Andrej Malhin, jaki žyvie ŭ Italii. Pavodle miascovaj presy, Miadźviedzieva prabudzie ŭ hateli ad 6 da 11 sakavika.

Prybyćcio vysokaj hości rychtavaŭ asabista ambasadar RF u Italii Alaksiej Miaškoŭ. Jon, dadaje błohier, asabista praviaraŭ usie detali budučaha znachodžańnia Miadźviedzievaj. Uklučajučy mieniu restarana, jaki taksama nie budzie prymać zvyčajnych naviedvalnikaŭ

Miascovaja hazieta Il Tirreno u svaim artykule «Termy dla pieršaj ruskaj łedzi» nazyvaje pakul jašče pieršuju łedzi Rasii «carycaj ŭ termach»: pavodle niekatorych źviestak, u Montekacini-Terme žonka rasiejskaha prezidenta źbirajecca prajści kurs lačeńnia termalnaj vadoj.

Pra toje, što ŭ Montekacini surjozna raźličvajuć na rasiejskich turystaŭ, pakazvaje i sajt hatela - u jaho jość rasiejskaja viersija. I heta ŭ krainie, dzie dvoje z troch rabotnikaŭ turindustryi nie vałodajuć (abo robiać vyhlad, što nie vałodajuć) navat anhielskaj movaj, što vyklikaje narakańni šmatlikich rasijskich turystaŭ.

Žonku rasiejskaha prezydenta čakaje dobry adpačynak. «Iznoŭ zdabyć badzioraść i śviežaść možna ŭ rassłablalnaj atmaśfiery najnoŭšaha SPA-centra płoščaj bolš za 800 kvadratnych mietraŭ, -- havorycca na sajcie hatela. -- Samaje daskanałaje majsterstva šef-kuchara navat samych patrabavalnych hurmanaŭ skoryć aryhinalnymi sposabami pryhatavańnia straŭ taskanskaj kuchni».

Viadoma, było b vielmi cikava daviedacca, chto apłačvaje adpačynak "carycy"..

Košt znachodžańnia ŭ prezidenckich apartamientach, u jakich, jak možna vykazać zdahadku, spyniłasia Miadźviedzieva, za sutki składaje 600 jeŭra. Za arendu ŭsich numaroŭ, jakija prymykajuć da prezidenckaha śjuta, dzie budzie pražyvać achova, pryjdziecca vykłaści 12 tysiač jeŭra za sutki. I heta nie ličačy charčavańnia i inšych pasłuh.

Navat prezidenckaha zarobku na heta zamała.

Hatel pakul zamkniony dla inšych haściej.

Miarkujecca, što ŭ bližejšyja dni Śviatłana Miadźviedzieva naviedaje niekalki susiednich haradoŭ u Taskanie.

Słužba pratakoła Miadźviedzievaj zajaviła, što žonka prezidenta adpačyvaje za ŭłasny košt.

• 0
• 0
• 0
• 0
• 0
• 0
• 0
• 0