Sakrety pośpiechu: Alaksandr Šakucin — samy bahaty sienatar Biełarusi

Uładzimir Piefcijeŭ, Juryj Čyž, Anatol Tarnaŭski — trojca biełaruskich biznesoŭcaŭ z čornaha śpisa Jeŭrasajuza. Vizavyja sankcyi i ekanamičnyja abmiežavańni musiać uskładnić im viadzieńnie biznesu. Chto jašče moh apynucca ŭ «čornaj» kampanii? Siarod kandydataŭ u hety nie vielmi pačesny śpis nazyvalisia ŭładalnik «Santa-Bremara» Alaksandr Mašenski, stvaralnik «Tytuń-Inviesta» Pavieł Tapuzidzis, a taksama Alaksandr Šakucin. «Naša Niva» raskazvaje pra apošniaha ź ich.

Sienatar z «Biełaj Rusi»

Staršynia rady dyrektaraŭ «Amkadora» Alaksandr Šakucin znachodzicca našmat bližej da ŭłady za astatnich biznesoŭcaŭ. Reč u tym, što Šakucin — sam ułada. Z 2008 hoda jon uvachodzić u saviet respubliki, źjaŭlajučysia namieśnikam kamisii pa mižnarodnych spravach i nacyjanalnaj biaśpiecy. Być sienataram — niapylnaja, ale prybytkovaja praca.

Da devalvacyi zarpłata składała kala $1000.

Ale biznesoŭcaŭ tut mała, možna nazvać chiba što jašče hienieralnaha dyrektara viciebskaha abutkovaha «Marka» Mikałaja Martynava.

Proźvišča Šakucina možna znajści i siarod členaŭ prezidyuma «Biełaj Rusi». Śpis aficyjoznych dasiahnieńniaŭ viančajuć dva miedali ŭ honar pieramohi ŭ Vialikaj Ajčynnaj vajnie.

Chirurh-kamsamolec

U aficyjnaj bijahrafii sienatara paznačana, što jon naradziŭsia ŭ 1959 na Aršanščynie ŭ vioscy Vialikaje Babina. Pačaŭšy z pracy traktarystam u miascovym kałhasie, pajechaŭ u stalicu respubliki vučycca na doktara. Tut, u Minskim dziaržaŭnym miedycynskim instytucie (ciapierašni Mieduniviersitet), Šakucin zaadno prajaviŭ i aktyŭnuju hramadskuju pazicyju — staŭ namieśnikam sakratara instytuckaha kamsamoła,

a taksama kamandziram studenckich budaŭničych štaboŭ minskaha abkama kamsamoła. Mahčyma, mienavita pra tyja časy Šakucin uzhadvaŭ u intervju «Biełhaziecie», aburajučysia mahčymym uviadzieńniem sankcyj: «Jašče ŭ Savieckim Sajuzie ja zmahaŭsia z padobnymi abmiežavalnymi mierami. A siońnia ES pavodzić siabie hetak ža, jak Palitbiuro tady. U Jeŭropie chapaje svaich prablem, ale jany chočuć, kab i ŭ nas było drenna».

Miedycynskaja karjera Šakucina išła ŭharu — jaho pryznačyli zahadčykam chirurhičnym adździaleńniem u 10-j haradskoj balnicy Minska, a paśla dyrektaram miedycynskaha centra MTZ.

Pierachod ź miedycyny ŭ pramysłovaść

Abviaščeńnie niezaležnaści krainy ŭ 1991 aznačała dla Šakucina, jak i dla mnohich inšych pradprymalnych biełarusaŭ, pačatak novaha žyćcia.

Zapłyŭ da vialikich hrošaj byŭ pavolnym.

Spačatku chirurh uznačaliŭ navukova-vytvorčaje «PramMiedInviest» (ciapier «PMI-Hrup»), nieŭzabavie pieratvoranaje ŭ akcyjaniernaje tavarystva. Pastaŭki miedycynskaj techniki źmianilisia na bolš prybytkovy impart techniki na pradpryjemstvy krainy.

Šakucin i ciapier zastajecca ŭ kiraŭnictvie kampanii, dziejnaść jakoj u mnohim źviazanaja z prodažami za miažu pradukcyi «Amkadora» — hałoŭnaj krynicy bahaćcia sienatara.

Niepalskaje adcieńnie zavoda

«Amkador», akcyjanieram jakoha źjaŭlajecca Šakucin, zasłuhoŭvaje asobnaha raspoviedu.

Zavod darožnaj i budaŭničaj techniki byŭ stvorany jašče ŭ 1920-ch, adnak u historyju Biełarusi jon trapiŭ jak pieršaje bujnoje pradpryjemstva Biełarusi, u jakim prajšło akcyjanavańnie. Jaho jašče ŭ 1991 ažyćciaviŭ prezident kancerna Vasil Šłyndzikaŭ, jaki byŭ zaŭziatym prychilnikam rynkavaj ekanomiki. Pakul astatnija zavody ledź trymalisia na płavu, jahonaje pradpryjemstva imkliva naroščvała mahutnaści. Šłyndzikaŭ pakinuŭ svaju pasadu ŭ 1996. Deputat Viarchoŭnaha Savieta i namieśnik staršyni AHP, jon vyrašyŭ pryśviacić siabie palitycy.

A na «Amkador» pryjšli zamiežnyja inviestycyjnyja kampanii.

Ciapier kantrolny pakiet (kala 60%) akcyj chołdynha naležać hanarovamu konsułu Niepała ŭ Biełarusi Upiendra Machata. Aproč taho, jon kantraluje niekalki biznes-centraŭ u Minsku. Niepalec žyvie ŭ Maskvie, tamu «kiravańnie na miescach» ažyćciaŭlaje Alaksandr Šakucin jak uładalnik druhoha pa vieličyni pakieta akcyj.

Kaštoŭnyja papiery zastalisia i ŭ mnohich rabotnikaŭ «Amkadora» pačatku 1990-ch.

Ahulnaja kolkaść akcyjanieraŭ pieravyšaje 3 tysiačy čałaviek, adnak nichto ź ich u apošnija hady nie atrymlivaje ni rubla dyvidendaŭ. Pry hetym čysty prybytak «Amkadora» za 2010 skłaŭ $11,2 miljona, a za try kvartały 2011 — jašče $31,2 miljona.

Centr novaha chołdynha

Pradpryjemstva źjaŭlajecca adnym z samych paśpiachovych u krainie, tamu Alaksandr Łukašenka i abraŭ jaho dla taho, kab stvaryć vakoł «Amkadora» chołdynh.

Padobnaja praktyka prymianiajecca i ŭ inšych halinach ekanomiki. Naprykład, prybytkovy «Savuškaŭ pradukt» Alaksandra Mašenskaha maje abjadnać vakoł siabie mnohija biełaruskija małakazavody. Hetyja vypadki vyłučajucca tym, što mahčymaść stvareńnia chołdynha dajecca pryvatniku.

Dla hetaha dziaržava pradaje jamu za biascenak (faktyčna addaje) niekalki inšych pradpryjemstvaŭ. Tak zdaryłasia i z «Amkadoram».

Naprykład,

u siaredzinie 2011 Alaksandr Łukašenka svaim ukazam dazvoliŭ pradać kancernu try zavody: dziaržynski «Ahramaš», łahojski «Epas» i Minski pryborabudaŭničy zavod (ciapier «Amkador-Biełvar») za simvaličnyja $1,5 miljona.

Zrešty, nie kožnaje pradpryjemstva prychodzić da Šakucina i Machata samo. «Amkador» pravodzić ekspansiju i za miažu. U 2009 ho-

dzie kancern vykupiŭ zavod «Enierhazapčastka» ŭ rasijskim Bransku i Pabiaržski zavod sielskahaspadarčaha mašynabudavańnia pad Vilniaj. Vychad na rynak Jeŭrasajuza nie pavinien uvodzić u zman. «Amkador» pastaŭlaje svaju pradukcyju ŭ dziasiatki krainaŭ śvietu. 50% sychodzić u Rasiju, jašče 35% techniki asiadaje ŭ Biełarusi, ale siarod astatnich pakupnikoŭ krainaŭ Jeŭropy mała, tam pieradusim Vieniesueła, Indyja i Niepał.

Staranny miecenat

Ź imiem Šakucina źviazanaja i skandalnaja historyja ź pieramohaj Aleny Łanskoj u adbory na «Jeŭrabačańnie-2012».

Vykarystańnie administratyŭnaha resursu, jaki i pryvioŭ da pośpiechu śpiavački, abiarnułasia niečakanaj parazaj i vyvałačkaj, jakuju atrymali ad Alaksandra Łukašenki ŭsie arhanizatary konkursu, aproč Šakucina. Na publiku trapili cikavyja padrabiaznaści. Naprykład, pałovu ad vydatkaŭ «Jeŭrafesta» apłačvaŭ «Amkador» — cikava, ci davali na heta zhodu akcyjaniery, jakija siadziać biez dyvidendaŭ?

Čamu ž Šakucin tak łabiravaŭ pieramohu

Łanskoj? Alena — adna z troch vykanaŭcaŭ, što pracujuć u jahonym pradziusarskim centry «Spamaš», razam ź Ivanam Busłajem i Daryjaj. Ale samaja paśpiachovaja siarod kalehaŭ — letaś pieramahła na «Słavianskim bazary».

Pradziusarski centr byŭ stvorany jašče siem hadoŭ tamu ŭ pamiać dački Šakucina, jakaja zahinuła ŭ aŭtakatastrofie.

U naźvie schavana rasijskamoŭnaja fraza — «SPAsienije MAši Šakutinoj». Hety byŭ pieršy pryvatny pradziusarski centr u krainie. Vydatki na kulturu, navat papsovuju — redkaja reč siarod biełaruskich miljanieraŭ. Imknučysia adpaviadać hustam načalstva, zvyčajna jany z bolšym impetam spansarujuć spartyŭnyja kamandy.

* * *

Impieryja «Amkadora»

U skład kancerna ŭvachodziać pradpryjemstvy ŭ Minsku («Biełvar», «Unikab», «Unimob», «Śpiecservis», «Torh»), Žodzinie («Lit»), Krupkach («Moža»), Pinsku, Maładziečnie, Łahojsku, Dziaržynsku. Nazvy pieraličanych pradpryjemstvaŭ pačynajucca z prystaŭki «Amkador». Aproč taho, va ŭłasnaści znachodziacca zavody ŭ Bransku, pad Vilniaj («Amkador-Bałtyk»), «Dormaš», «Dormašmiet», «Udarnik», zavod imia Hasteły ŭ Minsku, kałhas «Amkador-Škłoŭ». Ahulnaja kolkaść supracoŭnikaŭ — bolš za 5 tysiač čałaviek.

Brat-2

Choć Alaksandr Šakucin pramianiaŭ miedycynu na bolš prybytkovy zaniatak, farmaceŭtyčnym biznesam zajmajecca zvodny brat sienatara, Siarhiej. Jon — uładalnik kampanii «Iskamied», adnaho z najbujniejšych imparcioraŭ lekaŭ i aktyŭnaha ŭdzielnika dziaržaŭnych tendaraŭ. Jamu naležyć sietka aptek,

11 ź ich adkryta ŭ Minsku i ŭdvaja bolš u rehijonach.

• 0
• 0
• 0
• 0
• 0
• 0