Ščučynskija bajeviki

Siarhiej Laškievič (źleva) i Vasil Biaźmien na mahile Ciotki (Ałaizy Paškievič) u vioscy Stary Dvor Ščučynskaha rajonu.

2 sakavika pozna ŭviečary ŭ Ščučynie ŭ dvuch aktyvistaŭ štabu Alaksandra Milinkieviča adbylisia pieratrusy. Siarhieja Laškieviča paśla pieratrusu dastavili ŭ SIZA. Suprać jaho zaviedziena kryminalnaja sprava pavodle art.293 č.3 Kryminalnaha kodeksu (navučańnie ci inšaja padrychtoŭka asobaŭ da ŭdziełu ŭ masavych biesparadkach). Vasila Biaźmiena padazrajuć u teraryźmie. Milicyjanty aznajomili sp.Vasila z pastanovaj prakurora i zaprapanavali, kab toj pakazaŭ vybuchovyja rečyvy. Kanfiskavali materyjały z asabistaha archivu, systemny blok kamputara, dyskiety. Pieratrus pravodziŭsia ŭ adsutnaść advakata.

U Ščučynskim RUUS tłumačyć, što stała padstavaj dla kryminalnaj spravy, admovilisia. Zatoje patłumačyŭ ministar Uładzimier Navumaŭ u interviju rasiejskamu Pieršamu kanału 4 sakavika: «Apazycyja ŭzmocniena rychtujecca da 19 sakavika ŭsimi mahčymymi procizakonnymi srodkami. U Ščučynie adzin z hramadzianaŭ sam źviarnuŭsia, što jaho rychtujuć jak bajevika. My kanfiskavali vialikuju kolkaść kasetaŭ, na jakich pakazana, jak patrebna pavodzić siabie ŭ časie masavych biesparadkaŭ, jak supraćdziejničać milicyi».

Siarhiej Laškievič kaža, što niekalki tydniaŭ tamu jamu pryjšli niekalki pozvaŭ, aformlenych z parušeńniem zakanadaŭstva, u jakich jaho vinavacili ŭ raspaŭsiudzie ŭlotak pra vystup Milinkieviča ŭ ŚMI. Siarhiej napisaŭ zajavu ŭ prakuraturu i 2 sakavika atrymaŭ zaprašeńnie na razhlad zajavy. Pa darozie ŭ prakuraturu jaho zatrymali milicyjanty ŭ cyvilnym i paviedamili, što suprać jaho zaviedziena kryminalnaja sprava. U Ščučynskim RUUS Siarhieja aznajomili z zajavaj hramadzianina Burdzieja, jaki pryznaŭ, što sp.Laškievič navučaŭ jaho «jak bajevika». Potym byŭ pieratrus i 36 hadzinaŭ u miascovym SIZA, u jakim «žachlivyja ŭmovy — adnarazovaje naviedvańnie prybiralni ŭ sutki i adnarazovaje charčavańnie, jakoje, praŭda, niakiepskaje. Plus choład i vilhotnaść».

Pra sp.Burdzieja Siarhiej raspavioŭ nastupnaje: «Hety chłopiec pryjšoŭ da nas u inicyjatyŭnuju hrupu pry kancy hodu źbirać podpisy. Pra što paźniej paškadavali. Na Novy hod jon pabiŭsia ź milicyjantam, a paźniej jaho aryštavali pa padazreńni ŭ kradziažy budmaterjałaŭ. Niekalki tydniaŭ tamu jaho pad padpisku pra niavyjezd vypuścili z haradzienskaha SIZA». Pavodle Laškieviča, budučy «bajavik» nieadnarazova telefanavaŭ jamu z pravakacyjnymi pytańniami kštałtu: kali ŭžo na Miensk, što z saboju brać? Siarhiej kaža, što niejak žartam adkazaŭ: «Kali ty taki durań, to biary z saboju hranaty ci što ŭ ciabie tam jość». Jon ćvierdzić, što amal upeŭnieny, što jaho telefon prasłuchoŭvajecca.

Ciapier sp.Laškievič na voli. Jamu nia vysunuli aficyjnaha abvinavačańnia, adnak mohuć zrabić heta ciaham 10 sutak, to bok da 12 sakavika. Pakul jon prachodzić pa spravie ŭ jakaści padazravanaha i musić źjaŭlacca na vykliki śledčaha, a taksama paviedamlać pra źmienu miesca žycharstva. «Hetyja pieratrusy i aryšty — prajava niezadavolenaści miascovaj vertykali samim faktam pražyvańnia Milinkieviča ŭ hetaj miascovaści. Dy jašče našaja aktyŭnaść pad bokam. Ale naźbirać materyjałaŭ na nas nia vyjšła. Tamu i kanfiskoŭvali, što pad ruku trapiła».

V.Biaźmien kaža, što dziakujučy Internetu pra Ščučyn daviedaŭsia ŭvieś śviet. Padčas pieratrusu milicyjanty kanfiskavali navat śpisy siabroŭ haradzkoj supołki TBM, jakuju ŭ 2002 h. tak i nie zarehistravali. U roli paniatych vystupili žychary inšych rajcentraŭ — sp.Urbanovič ź Lidy i sp.Koŭšyk z Astraŭca, jakija na hety momant adbyvajuć pakarańnie na ščučynskaj «chimii». Milicyjanty nie zdavolili prośbu Vasila Biaźmiena zaprasić u jakaści paniatych jaho susiedziaŭ. Pieratrus supravadžaŭsia aperatyŭnymi zdymkami, što, adnak, nie znajšło adlustravańnia ŭ vynikovym pratakole.

Pieraśled z boku ŭładaŭ zaznajuć i paplečniki pieraśledavanych aktyvistaŭ. Tak, sp.Hienadź Kijenka i Piotra Kucharčyk ćvierdziać pra toje, što za imi sočać, pra pravierki na darohach, zatrymańni padčas razdačy ŭlotak. Niekalki razoŭ jany prykmiačali za saboju «chvost» — čyrvonyja «žyhuli». Apošniaje zatrymańnie adbyłosia na haradzkim rynku, dzie aktyvistaŭ razam z V.Biaźmienam zatrymali za razdaču aficyjnych ahitacyjnych materyjałaŭ. Pratakoł składaŭ major Mikałajčyk u prysutnaści supracoŭnika prakuratury Vińnickaha, jaki śpiarša admoviŭsia nazvacca.

Zaŭvažanyja byli pry hetym i paniatyja, što prysutničali pry pieratrusie na kvatery Vasila Biaźmiena. Jak patłumačyŭ major Mikałajčyk, heta «našyja štatnyja paniatyja».

Piotra Kucharčyk paviedamiŭ, što niekalki dzion tamu jaho pasiarod horadu blakavali dva aŭtamabili. Milicyjanty patłumačyli kiroŭcu, što jaho aŭtamabil byŭ zaŭvažany pobač ź miescam złačynstva. Aničoha nie znajšoŭšy ŭ salonie dy bahažniku, aŭto sp.Kucharčyka adpuścili.

❏

Vasil Biaźmien (nar. 1965). Psychijatar. Žanaty, maje dačku 13 hod.

Siarhiej Laškievič (nar. 1978). Pavodle adukacyi — ahranom. Z 1997 — siabar Partyi BNF. Braŭ aktyŭny ŭdzieł u vybarach u parlament u 2004 (inicyjatyŭnaja hrupa A.Milinkieviča). Na dadzieny momant biespracoŭny. Niežanaty.

• 0
• 0
• 0
• 0
• 0
• 0
• 0
• 0