Novy administracyjny kodeks padvyšaje rolu samacenzury ŭ niezaležnych ŚMI
Novy KaAP, jaki pačaŭ dziejničać ad 1 sakavika, značna ŭzmacniaje adkaznaść za roznyja administracyjnyja pravaparušeńni, i ŭ tym liku ŭ sfery dziejnaści ŚMI.
Šerah artykułaŭ KaAPu źviartajuć na siabie asablivuju ŭvahu. Tak, č.1 art. 22.9 («Parušeńnie zakanadaŭstva ab druku dy inšych ŚMI») praduhledžvaje "za złoŭžyvańnie svabodaj ŚMI" pakarańnie ŭ vyhladzie adčuvalnaha štrafu ad 20 da 50 bazavych vieličyniaŭ. Siońnia pamier bazavaj vieličyni składaje 31 tys. rubloŭ.
Častka 2-ja artykułu praduhledžvaje taki ž pamier pakarańnia za parušeńnie vyznačanaha paradku rassyłki abaviazkovych biaspłatnych asobnikaŭ peryjadyčnych drukavanych vydańniaŭ, publikacyi abviaržeńniaŭ dy raspaŭsiudžańnia peryjodykaŭ biez vychodnych dadzienych. Treciaja častka art. 22.9 vyznačaje pamier pakarańnia za paŭtornaje parušeńnie zakanadaŭstva paśla vyniasieńnia ciaham hodu ŭ adnosinach da peŭnaha ŚMI piśmovaha papiaredžańnia. U hetym vypadku pryvatny pradprymalnik musić vypłacić štraf u pamiery 20‑100 b.v., jurydyčnaja asoba – 100‑500 b.v.
Art. 23.33 KaAP vyznačaje adkaznaść za raspaŭsiud srodkami masavaj infarmacyi paklopu na prezydenta krainy. Adpaviedna sumy štrafaŭ składajuć: dla ŚMI – 20‑50 b.v., indyvidualnych pradprymalnikaŭ – 20‑100, dy jurydyčnych asobaŭ u pamiery da 500 b.v. Varta adznačyć, što pratakoły ab hetych pravaparušeńniach buduć składacca «orhanami, što ździajśniajuć dziaržrehulavańnie ŭ vobłaści raspaŭsiudu infarmacyi» (punkt 54 art. 3.30. novaha Pracesualna‑vykanaŭčaha kodeksu ab administracyjnych pravaparušeńniach). U dadzienym vypadku vykanaŭcami buduć pradstaŭniki Ministerstva infarmacyi. Nia vyklučana, što ŭ rehijonach hetyja funkcyi buduć vykonvać supracoŭniki vykankamaŭ, na jakich uskładajecca kantrol za vykanańniem zakanadaŭstva ŭ drukavanych i elektronnych ŚMI.
Novy KaAP padvyšaje rolu redakcyjnaha praŭnika ŭ niezaležnych i, u pieršuju čarhu, rehijanalnych ŚMI. Heta varta ŭličvać,zvažajučy na surjoznaść pamieraŭ pakarańnia za parušeńnie normaŭ novaha KaAPu.
Ciapier čytajuć
Čaćviortuju liniju minskaha mietro paviaduć u Dražniu. A «Ślapianka» i «Daŭhabrodskaja» źmianili svajo miesca2
Kamientary