Staršynioj Minskaj haradskoj kalehii advakataŭ abrany Alaksiej Švakaŭ

Jak paviedamlaje aficyjny sajt respublikanskaha pravaabarončaha hramadskaha abjadnańnia «Biełaruski Chielsinski kamitet», vybary novaha staršyni MHKA prajšli na ahulnym schodzie členaŭ kalehii 26 krasavika. Prapanovy pa kandydaturach na pasadu staršyni kalehii ŭniesła Ministerstva justycyi. Heta praduhledžana zakonam «Ab advakatury i advakackaj dziejnaści ŭ Biełarusi», jaki nabyŭ moc z 6 krasavika.

Pretendentaŭ na pasadu staršyni MHKA było dvoje — Alaksiej Švakaŭ i Siarhiej Bujakievič. Bolšaść hałasoŭ nabraŭ Alaksiej Švakaŭ. Ź jaho abrańniem Miniust pahadziŭsia.

Raniej staršynioj staličnaj kalehii advakataŭ byŭ Alaksandr Pylčanka, jaki zajmaŭ hetuju pasadu z krasavika pa śniežań 2011 hoda. Pretenzii ŭ Miniusta da Pylčanki źjavilisia paśla taho, jak jon vystupiŭ z krytyčnymi zaŭvahami ab situacyi ŭ biełaruskaj advakatury. Tak, 18 lutaha 2011 hoda Pylčanka, kamientujučy rašeńnie Miniusta ab pazbaŭleńni licenzij čatyroch advakataŭ MHKA — abaroncaŭ fihurantaŭ spravy ab masavych biesparadkach u Minsku ŭ dzień prezidenckich vybaraŭ 2010 hoda, vykazaŭ zaniepakojenaść niezaležnaściu biełaruskich advakataŭ. Nieŭzabavie paśla hetaha zahadam ministra justycyi jon byŭ vyklučany sa składu Kvalifikacyjnaj kamisii pa pytańniach advakackaj dziejnaści.

Zajava ab spynieńni svaich paŭnamoctvaŭ na pasadzie staršyni MHKA była napisana Pylčankam 2 vieraśnia 2011 hoda paśla taho, jak Miniust vynies pastanovu ab jaho daterminovym adklikańni.

Pastanova Miniusta ab daterminovym adklikańni staršyni MHKA była razhledžana 22 kastryčnika na ahulnym schodzie členaŭ kalehii. Taksama razhladałasia ŭłasnaja zajava Pylčanki ab spynieńni paŭnamoctvaŭ. Rašeńniem ahulnaha schodu jon byŭ vyzvaleny ad pasady. Novym staršynioj abrany Andrej Sankovič.

24 kastryčnika Miniust abviaściŭ ab prypynieńni dziejańnia rašeńniaŭ ahulnaha schodu členaŭ MHKA i pryznačyŭ pravierku vykanańnia rehłamienta ahulnaha schodu. Pa vynikach pravierki Miniust nakiravaŭ u Respublikanskuju kalehiju advakataŭ list ab tym, što pry praviadzieńni schodu byli dapuščany parušeńni paradku jaho praviadzieńnia. Adnak nie staviłasia pad sumnieńnie pravamocnaść ahulnaha schodu pry razhladzie zajavy Pylčanki ab daterminovym spynieńni jaho paŭnamoctvaŭ i pastanovy Miniusta ab daterminovym adklikańni staršyni MHKA.

Da 26 krasavika 2012 hoda pasada staršyni MHKA była vakantnaja, abaviazki staršyni vykonvaŭ jaho namieśnik Jaŭhien Hiermiančuk.

• 0
• 0
• 0
• 0
• 0
• 0
• 0
• 0