Raspracavany zialony maršrut «Vałožynskija haścincy»

Maršrut uklučaje naviedvańnie šerahu ahraekasiadzib i muziejaŭ Vałožynskaha rajona Minskaj vobłaści, a taksama ekałahičnaj ściežki ŭ Nalibockaj puščy. Miarkujecca, što ŭ jakaści srodku pieramiaščeńnia turysty buduć vykarystoŭvać viełasipiedy abo bajdarki, što dazvolić minimizavać uron navakolnamu asiarodździu.

Adkryvajecca maršrut naviedvańniem ekamuzieja «Śviet pčoł» na bazie adnajmiennaj siadziby. U muziei sabrana ŭsio nieabchodnaje dla raźviadzieńnia hetych nasiakomych načyńnie. Jaho haspadar Vasil Frałoŭ padrabiazna raskazvaje pry žyćcio pčoł, demanstruje frahmienty ź filma. Jon taksama daje mahčymaść kožnamu naviedvalniku adčuć siabie žycharom vulla, arhanizujučy zabaŭlalnyja hulni. Asabliva heta aktualna dla dziaciej, jakim u muziei prapanoŭvajucca śpiecyjalnyja tematyčnyja prahramy. U ciopły siezon štodzionna muziej prymaje da 300 čałaviek, adznačyŭ jaho haspadar.

Nastupnym punktam prahramy zialonaha maršrutu źjaŭlajecca naviedvańnie pryvatnaha muzieja-halerei biełaruskaha mastaka i restaŭratara Fieliksa Januškieviča ŭ Rakavie. U muziei znachodzicca kalekcyja karcin biełaruskich žyvapiscaŭ, a taksama staražytnaja mebla i inšyja pradmiety ŭžytku, jakija dajuć ujaŭleńnie ab žyćci biełaruskaha miastečka da prychodu savieckaj ułady. Asablivaja hordaść haspadara muzieja — samaja vialikaja kalekcyja kieramiki ŭ Jeŭropie, jakaja naličvaje kala 1 tys. 700 pradmietaŭ.

Paśla Rakava haściam zialonaha maršrutu prapanoŭvajecca naviedać ekamuziej narodnych instrumientaŭ, jaki znachodzicca na chutary «Barok» na bierazie rečki Jaršoŭka. U muziei možna pahladzieć biełaruskija narodnyja instrumienty, takija, jak duda, skrypka, cymbały, harmonik i inšyja, i pasłuchać kancert staražytnaj muzyki. Mnohija narodnyja instrumienty haspadar muzieja, prafiesijny mastak i muzykant Aleś Łoś, vyrablaje sam. U muziei taksama možna ŭbačyć śpiektakl narodnaha teatra «Batlejka».

Praciahvajecca ekskursija naviedvańniem siadziby «Marcinova huś». U svoj čas u hetych miaścinach žyŭ słavuty biełaruski dramaturh Vincent Dunin-Marcinkievič. U siadzibie jość nievialiki muziej, pryśviečany pamiaci dramaturha. U cełym haspadar siadziby, viadomy historyk i daśledčyk biełaruskich kulinarnych tradycyj Aleś Bieły pastaraŭsia adradzić na jaje bazie sapraŭdny šlachiecki falvarak. Naviedvalnikam prapanoŭvajecca tradycyjnaja biełaruskaja šlachieckaja kuchnia i interaktyŭnaja prahrama «Karčemnyja avantury», jakaja ŭvaskrašaje kulturu lićvinskaj karčmy 19 stahodździa. U siadzibie taksama pravodziać staražytnyja abrady, fiestyvali i majstar-kłasy pa tradycyjnaj abradavaj kuchni.

Zaviaršajecca maršrut naviedvańniem ekałahičnaj ściežki ŭ Nalibockaj puščy, jakaja raskinułasia na płoščy kala 140 tys. ha. Asobnyja reliktavyja ŭčastki puščy zachavalisia jašče z časoŭ siaredniaviečča i pamiatajuć kniazia Vitaŭta. Praciahłaść ekałahičnaj ściežki kala kiłamietra. Naviedvalniki aznajomiacca z asnoŭnymi bijatopami Nalibockaj puščy, siarod jakich — bałota i ŭčastak niekranutaha lesu. Pušču nasialajuć zubry, aleni, łasi, babry, vialiki padorlik i inšyja žyvioły i ptuški.

• 0
• 0
• 0
• 0
• 0
• 0
• 0
• 0