Siem krain Jeŭropy dałučylisia da sankcyj ES.
Jašče siem krain Jeŭropy — Charvatyja, Makiedonija, Čarnahoryja, Isłandyja, Sierbija, Ałbanija i Lichtenštejn — dałučylisia da ekanamičnych i vizavych sankcyj Jeŭrasajuza ŭ dačynieńni da Biełarusi.
Z takoj zajavaj ad imia ES vystupiła 8 červienia viarchoŭny pradstaŭnik ES pa źniešniaj palitycy i palitycy biaśpieki Ketryn Eštan.
«Jeŭrapiejski sajuz voźmie pad uvahu heta abaviazacielstva i vitaje jaho», — cytuje Eštan sajt Rady ES.
Eštan rastłumačyła, što havorka idzie pra rašeńnie Rady ES ad 23 sakavika ab pašyreńni «kropkavych» sankcyj suprać Biełarusi. Jak adznačajecca ŭ zajavie, nazvanyja dziaržavy «zabiaśpiečać adpaviednaść nacyjanalnaj palityki hetym rašeńniam Rady ES».
Nahadajem, śpis pradstaŭnikoŭ biełaruskaj dziaržavy, čyj ujezd u ES zabaronieny i čyje aktyvy na jaho terytoryi pavinny być zamarožany, Rady ES zaćvierdziŭ 31 studzienia 2011 hoda ŭ suviazi z parušeńniami pravoŭ čałavieka padčas i paśla prezidenckich vybaraŭ 2010 hoda. Paśla śpis niekalki razoŭ dapaŭniaŭsia.
Apošni raz heta adbyłosia 23 sakavika na pasiadžeńni Rady ES u Brusieli. U vynikovym dakumiencie adznačałasia: śpis pradstaŭnikoŭ Biełarusi, jakija padpadajuć pad sankcyi, pašyrany za košt «ludziej, adkaznych za surjoznyja parušeńni pravoŭ čałavieka ci represii ŭ dačynieńni da hramadzianskaj supolnaści i palityčnaj apazicyi». U jaho taksama ŭklučany biźniesmieny i kampanii, «jakija atrymlivajuć vyhadu ad režymu ci padtrymlivajuć jaho».
Ciapier vizavyja i ekanamičnyja sankcyi ES raspaŭsiudžvajucca na 243 pryvatnyja asoby i 32 pradpryjemstvy Biełarusi.
Kamientary