Palitviazień Pavieł Syramałotaŭ na voli

Palitviazień Pavieł Syramałotaŭ adpuščany na volu. Jon, jak i Siarhiej Kavalenka, byŭ pamiłavany pa rašeńni kiraŭnika dziaržavy.

Pa słovach maci byłoha palitźniavolenaha Haliny Syramałotavaj. 27 vieraśnia paśla abiedu ŭ Mahilovie jaho pasadzili na dyziel, i kala 18 hadziny jon pryjechaŭ damoŭ u Babrujsk.

***

Radyjo Svaboda ŭziało ŭ Paŭła pa vyzvaleńni intervju

Raspaviadzicie, kali łaska, jak heta adbyłosia.

— 25 vieraśnia nas ź Siarhiejem Kavalenkam vyklikaŭ u svoj kabinet «atradnik» (načalnik atradu). Skazaŭ, siońnia, 25-ha, vy pajedziecie dadomu, źbirajciesia. Nas zaviali ŭ režymny adździeł, abšukali, skazali, što ŭ chutkim časie pryjdzie aryhinał dakumentu. Ale aryhinał papiery ŭsio nie prychodziŭ, i my ŭvieś hety čas čakali, kali nas adpuściać. Kavalenku adpravili raniej. A mianie 27 vieraśnia prykładna, a 13-j hadzinie vyvieli z zony, davieźli da čyhunačnaha vakzału, pačakali, kali pryjdzie moj ciahnik, kupili mnie kvitok i adpravili. I voś ja doma…

— Vy pisali prašeńnie? Kali heta było?

— Prašeńnie pisaŭ moj advakat. Heta było roŭna 3 miesiacy tamu, 25 červienia. 30 červienia papiera ŭžo pajšła.

— Jak z vami tam abychodzilisia? Jak naahuł vy tam pačuvali siabie?

— Ciažka adnaznačna adkazać… Kali była najmienšaja mahčymaść da čahości dačapicca, mnie adrazu prypisvali parušeńni. Kali ja pisaŭ niejkija zajavy, staralisia ciahnuć albo naahuł hetyja maje zajavy hublalisia… Karaciej, usio ŭ takim styli. Ja byŭ «złosnym parušalnikam» režymu.

Na mianie «paviesili» 5 parušeńniaŭ režymu pierad tym, jak ja napisaŭ prašeńnie.

— Vas prymušali pisać prašeńnie?

— Jany mnie prapanoŭvali pisać. Ale da hetaha ja sam vyrašyŭ napisać prašeńnie.

— Ci dachodzili da Vas listy ad siabroŭ, ad inšych viaźniaŭ?

— Ad viaźniaŭ jany nia mohuć dachodzić, ich prosta nie prapuściać. Ale čaściakom mnohija listy nie dachodzili.

— Ci dachodzili da vas viestki z voli, ci viedali vy pra padtrymku, ci adčuvali, što hramadzkaść, pravaabaroncy za vas zmahajucca?

— Toje-sioje dachodziła, ale nia ŭ poŭnaj miery. Hazety dachodzili nie zaŭsiody. Kali ja telefanavaŭ rodnym, jany mnie raspaviadali, što adbyvajecca.

— Nie škadujecie za takuju surovuju škołu žyćcia?

— Nie, nie škaduju, navat krychu rady, što prajšoŭ.

— Što samaje ciažkaje było ŭ źniavoleńni?

— Samaje ciažkaje, napeŭna, było rasstańnie z rodnymi. Razłuka.

***

Pavał Syramałotaŭ naradziŭsia 30 krasavika 1991 hodu ŭ Babrujsku. Paśla škoły skončyŭ PTV. Pracavaŭ na zavodzie, vučyŭsia ŭ chimika-technałahičnym technikumie na viačernim adździaleńni.

Uziaty pad vartu 17 studzienia 2011 hodu za sprobu padpału ŭ noč na 17 kastryčnika 2010 hodu budynku Babrujskaha KDB, u jaki byli kinutyja butelki z zapalnaj sumieśsiu. 18 traŭnia 2011 hodu razam ź Jaŭhienam Vaśkovičam i Arciomam Prakapienkam asudžany sudom Babrujsku na 7 hadoŭ pazbaŭleńnia voli (č. 2 artykuła 339 — złosnaje chulihanstva, i č. 3 artykuła 218 Kryminalnaha kodeksu — paškodžańnie majomaści ŭ asabliva bujnym pamiery). Adbyvaŭ pakarańnie ŭ kałonii № 19 u Mahilovie.

U červieni 2012 hodu Pavieł napisaŭ prašeńnie ab pamiłavańni.

• 0
• 0
• 0
• 0
• 0
• 0
• 0
• 0