«Pravincyja» źbiraje siły
Litaraturny seminar «Biaźmiežža» amal štohod ładzicca na Biełastoččynie ŭ miastečku Hajnaŭka. Sklikaje jaho Biełaruski sajuz u Polščy. Na seminarach abaviazkova zakładajucca novyja vydavieckija prajekty. Vynik papiarednich sustreč — knihi Alesia Razanava «Zdobywcy» i Adama Hlobusa «Demonokameron» — pa-polsku.
Padčas čaćviertaha «Biaźmiežža», jakoje adbyvałsia 25—27 lutaha, prezentavaŭsia zbornik prozy Vasila Bykava «Ściana». Vydaŭcom i techničnym redaktaram knihi vystupiŭ Alaksandar Maksimiuk, a pierakłali teksty na polskuju Jan Maksimiuk i Česłaŭ Seniuch. Adbyłasia na sioletnim «Biaźmiežžy» i jašče adna prezentacyja — knihi vybranaha paetki Nadziei Artymovič «Adpłyvaje spakojnaje nieba». Zbornik vyjšaŭ da admysłovaha jubileju — tryccać hadoŭ tamu spn.Artymovič upieršyniu pabačyła svoj vierš nadrukavanym u biełastockaj «Nivie».
Nie abyšłosia i biez ahučvańnia čarhovaj inicyjatyvy. Hetym razam udzielniki seminaru abmierkavali doŭhaterminovy prajekt: litaraturny časopis, meta jakoha — spryjać litaraturnamu i kulturnamu žyćciu ŭ pamiežnych etničnabiełaruskich rehijonach, u tym liku na Vilenščynie, Smalenščynie i Pskoŭščynie. Miarkujecca, što časopis «Pravincyja» stanie adnym z samych šykoŭnych biełaruskamoŭnych vydańniaŭ — vialikaha farmatu, z kalarovym drukam, na taraškievicy. U «Pravincyi» možna budzie pračytać mastackija tvory, litaratura- i mastactvaznaŭčyja matarjały, interviju ź dziejačami kultury, raspoviedy pra žyćcio hłybinki. Redaktaram vydańnia pryznačany Alaksandar Maksimiuk, styl-redaktaram — Siarhiej Šupa. Napačatku traŭnia źbiarecca redkalehija časopisa i sfarmuje pieršy numar. Planujecca, što pakul «Pravincyja» budzie vychodzić jak kvartalnik.
Aleś Arkuš
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam9
Kamientary