10+10+10+10=50,1% (Try nočy paśla vybaraŭ Łukašenka nie pakazvaŭ nosu na BT. Zamiž 70 abiacanych im adsotkaŭ vybarcaŭ na ŭčastki pa haradzkich akruhach pryjšli tolki 34—48%)

10+10+10+10=50,1%

Try nočy paśla vybaraŭ Łukašenka nie pakazvaŭ nosu na BT. Zamiž 70 abiacanych im adsotkaŭ vybarcaŭ na ŭčastki pa haradzkich akruhach pryjšli tolki 34—48%.

Dyj tych zhaniała vertykal. Naziralniki BHK, jakich było kala 15000, hetym razam prasačyli vybary ad ich naradžeńnia da biassłaŭnaje śmierci.

CVK sfarmavanaja z parušeńniem Kanstytucyi 1996 h. i niekalkich Zakonaŭ. Vybarčy Kodeks byŭ pryniaty zapozna, i hramadzkaść nie paśpieła vyvučyć jaho razam z supiarečnaściami j lakunami, jakich tam dziasiatki. Datu vybaraŭ Łukašenka pryznačyŭ nie za čatyry miesiacy, a za try da ich pačatku. Režym davieru nia byŭ zachavany, bo hazety j BT poŭnilisia samymi dzikimi paklopami na apanentaŭ ułady. Na try chvalebnyja ŭzhadvańni Łukašenki prychodziłasia adno paklopnickaje pra apanentaŭ.

Vybarčy kodeks ustanaviŭ dla kandydataŭ dyskryminacyjnyja normy: naprykład, dastatkova 76 čalcoŭ pracoŭnaha kalektyvu, kab vyłučyć kandydata, pryčym hetyja čalcy kalektyvu mohuć navat nia być vybarcami dadzienaj akruhi! U toj ža čas ludzi, jakija vyłučalisia šlacham zboru podpisaŭ, musili sabrać tysiaču podpisaŭ, jakija vybarčyja kamisii razhladali ź lupaju j adprečvali. U vyniku mnohim admovili ŭ rehistracyi nie na padstavie niesapraŭdnaści podpisaŭ, a z-za taho, što niechta ŭ dacie vybaraŭ pisaŭ niapoŭnuju ličbu hodu, ci z-za vypraŭleńniaŭ. Inicyjatyŭnyja hrupy ćvierdziać, što časta vypraŭleńni rabilisia siabrami vybarčych kamisijaŭ. Bo naš demakratyčny VK daje prava pryznać podpis niesapraŭdnym pavodle až 9 farmalnych punktaŭ.

Akruhovyja dy ŭčastkovyja kamisii byli sfarmavanyja z pradstaŭnikoŭ “pracoŭnych kalektyvaŭ”, “vertykali” dy hramadzkich arhanizacyjaŭ kštałtu BPSM. Narodnaja Hramada vystaviła 25 kandydataŭ u kamisii, nivodnaha ź jakich nie ŭklučyli ŭ ich skład. U Pinsku demakratyčnaha pradstaŭnika-jurysta adprečyli, zatoje ŭziali ŭ kamisiju prybiralščycu-pensijanerku. Usimi kamisijami kiravali ludzi z vertykali ci blizkija da vertykali. Pavodle śviedčańniaŭ naziralnikaŭ, pracavali nie kamisii, a rajvykankamy. U kožnaj akruzie byli stvoranyja “štaby”, jakija musili zabiaśpiečyć udzieł u vybarach i abrańnie patrebnaha kandydata. Kiravalisia štaby Hałoŭnym Štabam, stvoranym pad kiraŭnictvam Miaśnikoviča ŭ administracyi prezydenta.

Adnak narod nie taki durny j pałachlivy, jak pryvykli dumać my i jak pryvykli dumać jany. Niahledziačy na mocny presinh, pahrozy adabrać pracu, zarobak, žyllo, ludzi nie pryjšli na vybary. Bajkot vybaraŭ adbyŭsia mienavita ź idejnych pryčyn. Ludzi stamilisia ad chłuśni, abkradańnia j hvałtu.

Jak ža była zroblenaja ličba 60%? Prostymi metadami: masavym ukidvańniem pustych i “pravilnych” biuleteniaŭ, vypraŭleńniem śpisaŭ vybarcaŭ, kali ludziej vykreślivali adtul sotniami, abo, naadvarot, prypisvańniem miortvych dušaŭ, jakija nibyta prahałasavali. Pryčym rabiłasia ŭsio ŭ śpiešcy i chamskimi metadami. U mnohich aficyjnych pratakołach kamisij, jakija atrymaŭ BHK, ličby nie sychodziacca ŭvohule!

Biełaruski Hielsynski Kamitet padaŭ aficyjnyja zajavy ŭ akružnyja kamisii, miascovyja prakuratury, CVK ab niepryznańni vybaraŭ u 3 akruhach. Potym padamo skarhi jašče na 7. U “čornym śpisie” apynulisia Salihorskaja №91, Maładečanskaja №86, Mahiloŭskija №70-72, Babrujskaja №64, Mienskija №109, 98. Pa Miensku my pravodzili h.zv. kantrolnaje nazirańnie. Byli etalonnyja ŭčastki ŭva ŭsich akruhach. I na ŭsich hetych učastkach vybary pravalilisia. Navat na tym učastku 105-j akruhi, na jaki ščylnymi radami pryviali hałasavać 400 kursantaŭ škoły milicyi.

Śviatłana Kurs,
Biełaruski Hielsynski Kamitet