Raman Jakaŭleŭski. Vajskovaja apazycyja

 Vajskovaja apazycyja

23 lutaha pra svoj udzieł u prezydenckich vybarach aficyjna abviaściŭ hienerał-pałkoŭnik Pavał Kazłoŭski.

Biełaruskija prezydenckija vybary, chutčej za ŭsio, adbuducca sioleta, nie paźniej, čym u “adnu ź niadzielaŭ vieraśnia”. Takaja nieakreślenaść daje padstavy mierkavać, što Łukašenka pasprabuje naahuł abyścisia biaź ich i pieraabracca ci to pry dapamozie čarhovaha referendumu, pra jaki budzie abvieščana ŭ traŭni na tak zvanym druhim Usiebiełaruskim narodnym schodzie, ci to šlacham zvyčajnaha parlamenckaha hałasavańnia. Ale jak by tam ni było, šerahi kandydataŭ u prezydenty rastuć. Kamanda pieršaha ministra abarony suverennaj Biełarusi (1992—1994) składajecca praktyčna z adnych vajskoŭcaŭ, jakija, z prychodam da ŭłady A.Łukašenki, apynulisia ŭ apazycyi. Miarkujučy ź niekatorych pieršych krokaŭ hetaj kamandy, u pryvatnaści, z naładžvańnia kantaktaŭ z presaj, možna śćviarždać, što ŭ ciapierašniaha vaładara źjaviłasia davoli dakładna arhanizavanaja i strukturavanaja vajskovaja apazycyja.

Adnoj z najkalarytnych asobaŭ u atačeńni Kazłoŭskaha źjaŭlajecca hienerał Jaŭhien Bačaroŭ, były kamandzir pamiežnych vojskaŭ. Jon karystajecca vialikim aŭtarytetam siarod “aŭhancaŭ”, u ich, darečy, režym bačyć adnu sa svaich aporaŭ. Nia vyklučana, što da Kazłoŭskaha dałučacca i inšyja vajskoŭcy, pakryŭdžanyja Łukašenkam. Naprykład, 55-hadovy načalnik Hienštabu biełaruskaha vojska hienerał-lejtenant Kazłoŭ, jakomu paprostu nie padoŭžyli kantrakt – bo nia ŭmieŭ “uhinacca” pierad hałoŭnakamandujučym.

Pa ŭsim vidać, što Kazłoŭski maje charyzmatyčnyja rysy, ź jakimi možna śmieła raźličvać na sympatyi vybarcaŭ. Naradziŭsia jon u prostaj sialanskaj siamji, skončyŭ biełaruskuju škołu. Navat u Taškienckaj vajskovaj vučelni kursant Pavał Kazłoŭski pa ŭłasnym žadańni zdavaŭ niekatoryja ispyty (u pryvatnaści, matematyku) pa-biełarusku.

Niemałavažna i toje, što P.Kazłoŭski – nie parkietny hienerał. Jon prajšoŭ usie štabnyja i šychtovyja słužbovyja pasady. Niejki čas jahonym padnačalenym byŭ siońniašni načalnik Hienštabu rasiejskaha vojska Anatol Kvašnin, ź jakim Kazłoŭski dasiońnia zachoŭvaje ciopłyja stasunki. Pavodle niekatorych źviestak, i balatavacca 58-hadovy eks-ministar vyrašyŭ mienavita paśla niadaŭnich vizytaŭ u Maskvu...

Siamiejniki Paŭła Kazłoŭskaha nie adrazu ŭchvalili hetaje jahonaje rašeńnie – až zanadta pierakanalnym było zdareńnie z Zacharankam. Tolki paśla praciahłych hutarak – a ŭ vialikaj sialanskaj siamji hienerała ŭsie pytańni vyrašajucca pa tradycyi supolnym abmierkavańniem – Kazłoŭski davioŭ nieabchodnaść svajho ŭdziełu ŭ vybarach. Darečy, hienerał byŭ u malenstvie viaźniem fašyzmu, što taksama budzie mieć nie aby-jakoje značeńnie dla vybarcaŭ.

U 1992 h. P.Kazłoŭski byŭ nie adzinym kandydatam na post ministra abarony. Inšy pretendent — biełarus-hienerał Hieorhi Špak — ciapier kamanduje rasiejskimi pavietrana-desantnymi vojskami. Ale pieršym apranuć novuju formu z “Pahoniaj” i bieł-čyrvona-biełym šaŭronam na rukavie nakanavana było Paŭłu Kazłoŭskamu. Mienavita jaho vitali na łužku pierad Biełym Domam padčas pieršaha ŭ historyi vizytu ministra abarony niezaležnaj Biełarusi ŭ ZŠA – paśla ŭsiaho, što adbyłosia ŭ biełaruska-amerykanskich stasunkach za hady kiravańnia Łukašenki, vizyty takoha ŭzroŭniu ciapier paprostu nierealnyja. Pry Kazłoŭskim byli raspracavanyja armiejskija statuty na biełaruskaj movie, z ulikam staražytnabiełaruskaj vajskovaj tradycyi. Pry im raspačało aktyŭnuju dziejnaść Biełaruskaje Zhurtavańnie Vajskoŭcaŭ, aktyvistami jakoha byli jak sacyjał-demakrat Mikałaj Statkievič, tak i hieneralny prakuror Viktar Šejman.

Ad tradycyjnaj hramadzianskaj apazycyi ź jejnaj niepieraadolenaj amorfnaściu kamanda P.Kazłoŭskaha istotna adroźnivajecca pierš za ŭsio ŭpłyvovymi suviaziami i aŭtarytetam u siłavych strukturach — jak mienskich, tak i maskoŭskich: niezdarma ž Kazłoŭski na praciahu apošnich hod uznačalvaŭ Mižnarodny fond reabilitacyi zdaroŭja byłych vajskoŭcaŭ “BiełRos”. Prahmatyzm hienerała prajaŭlajecca i ŭ tym, što jon sa svajoj kamandaj byccam by hatovy padtrymać samaha perspektyŭnaha kandydata ad apazycyi. Ale vyznačycca z pretendentam, na jahonuju dumku, treba pry kancy pieradvybarčaj kampanii, a nie na pačatku.

Źjaŭleńnie biespartyjnaha hienerał-pałkoŭnika Paŭła Kazłoŭskaha na pieradvybarčym niebaschile zaŭvažna ažyŭlaje palityčnaje žyćcio Biełarusi i źlohku błytaje palityčnyja karty jak apazycyi, tak i režymu. A zamiežnyja naziralniki zmušanyja buduć značna adkarektavać svajo staŭleńnie da biełaruskich vybaraŭ. Nichto nie žadaje ŭzrušeńniaŭ, usie žadajuć mirnaj transfarmacyi krainy ŭ centry Eŭropy.

Raman Jakaŭleŭski

Hienerał Kazłoŭski prasłaviŭsia svaim zmahańniem ź Biełaruskim Zhurtavańniem Vajskoŭcaŭ u 1993 h.  Ab pačatku svajoj prezydenckaj kampanii Kazłoŭski abvieściŭ 23 lutaha 2001 h. — na śviata akupacyjnaje dla Biełarusi armii.