Praz trynaccać hadoŭ

Nacyjanalnaja zbornaja Biełarusi pa handbole vyjšła na čempijanat Eŭropy. Biełarusy nie byli na suśvietnych top-spabornictvach bolš čym 12 hadoŭ. Apošni turnir z udziełam našych chłopcaŭ adbyŭsia ŭ 1995 hodzie. Tady na čempijanacie śvietu ŭ Iślandyi kamanda Spartaka Miranoviča stała vośmaj. Paśla hetaha, jak adrezała.

U 1980-yja hady handboł staŭsia sapraŭdy nacyjanalnym vidam sportu ŭ Biełarusi. Mienski SKA źjaŭlaŭsia adnym ź lideraŭ savieckaha handbołu. “Armiejcy” nieadnarazova vyjhravali eŭrakubki, u tym liku trojčy Kubak eŭrapiejskich čempijonaŭ (pradvieśnik siońniašniaj Lihi čempijonaŭ). Kaściak zbornaj SSSR taksama składali biełarusy.

Z razvałam Savieckaha Sajuzu biełaruskaja handbolnaja škoła pryjšła da zaniapadu. Tak, niejki čas u nacyjanalny pieršynstvie hulali ŭsiaho čatyry kamandy, a niaźmiennym čempijonam byŭ usio toj ža mienski SKA.

U handboł praktyčna nie išli hrošy, tamu najbolš talenavityja hulcy ŭsimi mahčymymi šlachami sprabavali źjechać za miažu. Z zamiežnych klubaŭ našy hulcy pryjaždžali na matčy zbornaj ź nievialikaj achvotaj, bo možna atrymać traŭmu i ŭvohule zastacca biez zarobku. Ceły šerah našych handbalistaŭ źmianili hramadzianstva: Alaksandar Tučkin vystupaŭ za Rasieju, Siarhiej Rutenka – za Słavieniju, Andrej Klimaviec – za Niamieččynu. Apošni ŭ składzie niamieckaj kamandy staŭ čempijonam śvietu.

Niešta ŭ handbole pačało mianiacca, kali ŭ Biełaruś pryjšli rasiejskija biznesoŭcy braty Miaškovy. Jany zasnavali ŭ Bieraści handbolny klub imia ichniaha baćki Anatola Miaškova, viadomaha ŭ krainie handbolnaha specyjalista, jaki nie dažyŭ da našych dzion. Hulać za Bieraście pryjechali byłyja lehijanery.

Takim čynam, BHK imia Miaškova pierarvaŭ šmathadovuju hiehiemoniju mienskaha SKA ŭ biełaruskim čempijanacie. Try hady zapar bieraściejcy hulajuć u hrupavym turniry Lihi čempijonaŭ, asablivych zorak tam nie chapajuć, ale dla Biełaruś na hetym etapie biascennym padajecca sam udzieł klubu ŭ takich spabornictvach. U Bieraście na matčy Lihi čempijonaŭ pryjaždžali hrandy eŭrapiejskaha handbołu – hišpanski “Śjudad-Real”, niamiecki “Kil” i šmat chto jašče.

Nastupnym krokam da adradžeńnia biełaruskaha handbołu stałasia pryznačeńnie na staršynstva ŭ federacyi śpikiera Pałaty pradstaŭnikoŭ Uładzimier Kanaploŭ. Mienavita paśla razmovy z Kanaplovym pryniaŭ rašeńnie viarnucca ŭ zbornuju adzin z najbolš talenavitych biełaruskich i eŭrapiejskich hulcoŭ Siarhiej Harbok, jaki ŭžo amal atrymaŭ dazvoł hulać za rasiejcaŭ. Kanaploŭ, u adroźnieńni ad mnohich staršyń inšych federacyj, sapraŭdy pieražyvaje za svoj vid, tamu i vynik pryjšoŭ dosyć chutka.

U studzieni sioleta biełarusy ŭ Bieraście pa čarzie pieramahli małdavanaŭ, kipryjotaŭ i słavakaŭ i zaniali pieršaje miesca ŭ svajoj adboračnaj hrupie. Heta dało mahčymaść našym chłopcam syhrać u płej-of da čempijanatu Eŭropy. Ź losavańniem padfarciła – u supierniki trapili nia samyja mocnyja švajcarcy, jakija, praŭda, stabilna hulajuć na roznych pieršynstvach.

Matčy z švajcarcami byli ŭžo piatymi, kali biełarusy sprabavali prarvacca na top-turnir praz płej-of. Dahetul jany prajhravali iślandcam (dvojčy), charvatam i ŭkraincam. Piataja sproba akazałasia ŭdałaj.

U minułuju subotu ŭ Bieraści prajšoŭ pieršy matč. Biełarusy pry padtrymcy pierapoŭnienaj zali “Viktoryja” syhrali natchniona i ŭźniosła. Finalny śvistok kanstatavaŭ na tablo pieravahu našych z roźnicaj u dzieviać hałoŭ - 33:24.

Matč u adkaz prachodziŭ u švajcarskim Sury 17 červienia. Kamandzie Spartaka Miranoviča važnym było nie prajhrać 10 hałoŭ. Zrešty, takuju roźnicu ŭ hałach za ŭvieś čas isnavańnia płej-of jašče nichto nie adyhryvaŭ. Švajcarcy taksama nie akazalisia pieršaprachodcami, choć časam było sapraŭdy strašnavata za kančatkovy vynik.

Pieršy tajm biełarusy prajhrali z roźnicaj u dva hały. Lik vidavočna zadavalniaŭ, tym bolej ź placoŭki byŭ vydaleny lider alpijskaj kamandy Ivan Ursič. Adnak u pačatku druhoha tajmu ź biełarusami pačali tvarycca niezrazumiełyja rečy. U peŭny momant pieravaha švajcarcaŭ vyrasła da šaści hałoŭ, zdavałasia jašče kryšačku i jany zmohuć pierałamić chadu pajadynku. Adnak, na naša ščaście, paśla tajm-aŭtaŭ, jakija braŭ Spartak Miranovič, chłopcy vyjšli sa stuparu. Mahli ŭvohule nie prajhrać, adnak vynikovy lik, mała kaho ŭžo cikaviŭ. Zadača i tak była vykananaja.

Našy chłopcy prajhrali 28:30, adnak vyjšli na čempijanat Eŭropy-2008. Padajecca, što tamaka jany nia buduć zvyčajnymi statystami.

Pieršynstva projdzie ŭ studzieni ŭ Narvehii. Losavańnie kamand adbudziecca 22 červienia ŭ Osła.

• 0
• 0
• 0
• 0
• 0
• 0
• 0
• 0