BNF napiaredadni Źjezdu

BNF napiaredadni Źjezdu

Siŭčyk rychtuje frondu, Siamdzianava i Janukievič hatovyja pazmahacca za pasadu namieśnika staršyni

V Źjezd BNF adbudziecca 15—16 śniežnia i praciahniecca 2 dni. Jon maje acanić pracu arhanizacyi za dva hady. Asabliva važnym hety Źjezd budzie dla Vincuka Viačorki — jon budzie trymać spravazdaču za pieršyja svaje hady kiravańnia.

Na źjeździe nie čakajecca niejkaha vialikaha kanfliktu, bo ŭnutry Frontu nikoli nie było jaŭnych idealahičnych raskołaŭ, a tolki taktyčnyja razychodžańni. Asablivaść sytuacyi jašče i ŭ tym, što Viačorka nie imkniecca stać publičnym nacyjanalnym lideram, zasiarodžvajučysia na intelektualnaj pracy i reprezentavańni partyi za miažoj. I, choć partyi patrebny publičny lider, vidavočnaj alternatyvy Viačorku pakul nia vyjaviłasia.

Najbolš krytyki na adras Viačorki vykazvajuć u rehijonach, i najpierš u Horadni.

Domaš ad supracoŭnictva z Frontam uchilaŭsia. Mienskija aktyvisty Frontu peŭny čas ahitavali za nieabchodnaść źmianić Viačorku na Alesia Bialackaha, ličačy jaho bolš “paznavalnym” palitykam. Adnak, ideja, vidać, nia vyklikała zachapleńnia ŭ samoha Bialackaha.

Pakul akreślenaje žadańnie paspaborničać ź Viačorkam zaŭvažnaje tolki ŭ “viečnaha dysydenta” Viačasłava Siŭčyka. Padčas raskołu Frontu ŭ 1999 h. Siŭčyk tolki ŭ apošni momant uskočyŭ u ciahnik “abnaŭlencaŭ”. Niepryjacieli vytłumačvajuć novuju frondu Siŭčyka dosyć prazaična. Reč u tym, što ciapier u staršyni BNF zašmat namieśnikaŭ, kampetencyja kožnaha ź jakich razmytaja. Tamu ŭsie adzinadušnyja ŭ tym, što adnym z hałoŭnych pytańniaŭ źjezdu budzie pieravyznačeńnie kolkaści namieśnikaŭ i pieraakreśleńnie kampetencyi kožnaha ź ich. Siŭčyk adčuvaje, što ŭ novaj struktury miesca dla jaho moža i nie zastacca. Voś jon, maŭlaŭ, i rychtujecca syści hučna (šancaŭ na pieramohu maje mała), kab prystać da bierahu ŭ adnym z novych palityčnych utvareńniaŭ, što majuć paŭstać na pravym i levym flanhu biełaruskaha palityčnaha spektru.

Na pasiedžańni Sojmu 20 kastryčnika vyznačyli systemu vyłučeńnia kandydataŭ na Źjezd. Novaja systema takaja: kandydaty buduć abiracca na schodkach siabroŭ partyi BNF, jakija projduć u 15 bujnych haradoch Biełarusi (aktyŭnych členaŭ partyi ciapier, musić, kala 2,5 tys. čałaviek). Partyjcy, jakija žyvuć u susiednich haradoch i miastečkach, majuć źjechacca ŭ miascovaść, dzie adbudziecca schod, i ad kožnych piacioch siabroŭ BNF budzie vyłučany adzin kandydat. Takaja systema padahnanaja pad patrabavańni Ministerstva justycyi.

Siarod źmienaŭ — skasavańnie asobnaj kvoty dla delehataŭ ad Maładoha Frontu. Heta budzie mieć vynikam toje, što ŭ P.Sieviarynca budzie mienšy ŭpłyŭ na ahulny chod Źjezdu (i heta ŭdar pa pazycyjach V.Siŭčyka, da jakoha blizki lider maładafrontaŭcaŭ). Taksama moža źmienšycca ŭpłyŭ drobnych rehijanalnych kiraŭnikoŭ.

Na hanku siadziby na Varvašeni, 8 pahavorvajuć taksama, što cikavaje spabornictva razhorniecca na źjeździe za pasady namieśnikaŭ staršyni. Aproč ciapierašnich lideraŭ, na vakantnyja miescy majuć pretendavać staršyńka jurydyčnaje kamisii Sojmu, byłaja deputatka Viarchoŭnaha Savietu ad Navahradku Halina Siamdzianava i były v.a. staršyni Maładoha Frontu ŭ časie źniavoleńnia P.Sieviarynca Alaksiej Janukievič.

Drobnaść hetych kanfliktaŭ pakazvaje, što Front pakul nia vyznačyŭ sabie na bližejšuju budučyniu vialikich zadačaŭ. Zrešty, kali ž, jak nie na źjeździe, prymać sensacyjnyja rašeńni — vyłučać novych lideraŭ, stvarać novyja “tavarnyja znaki”, novyja prahramy?

Pieramohšy na vybarach, A.Łukašenka ŭsimi siłami imkniecca vyrvać u Eŭropy pryznańnie. Tamu jon faktyčna ŭziaŭ na ŭzbrajeńnie ekanamičnuju prahramu apazycyi. Palityčnaja rytoryka režymu pamianiałasia taksama. Urad Navickaha — nia tolki samy mahiloŭski, ale i samy “pravy” za historyju krainy. Navat urady BNR byli bolš sacyjalistyčnymi! Zastałosia źmianić kulturnuju palityku i partyjna-palityčnuju systemy.

Apazycyja, stvarajecca ŭražańnie, była niehatovaja da takoha pavarotu padziejaŭ. Jana jašče nie ŭśviadomiła, što joj niaprosta ŭpisacca ŭ novuju sytuacyju, jakaja pacichu vymaloŭvajecca. Na paradku dnia staić pieravyznačeńnie jaje sacyjalnaj bazy, prahramy. “Čaho my chočam zaraz?” - ad adkazu na hetaje pytańnie zaležyć pośpiech śniežańskaha źjezdu. Ad adkazu zaležyć i niezvarotnaść źmienaŭ, što adbyvajucca ŭ krainie apošnim časam.

Pakul najbolš vierahodna, što BNF prosta abmiažujecca vyłučeńniem bolš radykalnaj ekanamičnaj i palityčnaj prahramy, čym uradavaja.

Na dumku Alesia Michaleviča, siabra Sojmu BNF, hałoŭnym vynikam V źjezdu musiać stacca bolšaja hatoŭnaść partyi i ruchu da stvareńnia šyrokaj nacyjanalna-demakratyčnaj kaalicyi tych siłaŭ, jakija vystupajuć za bajkot mierkavanych vybaraŭ u “sajuzny parlament”. Jon miarkuje, što va ŭmovach, kali bolšaść byłych sajuźnikaŭ pa “šyrokaj hramadzianskaj kaalicyi” maje namier uziać udzieł u takich vybarach, kali jany ŭsio ž adbuducca (a hetaha nia choča, ličy, nivodnaja palityčnaja siła krainy, nie vyklučajučy i łukašenkaŭcaŭ), taki bajkot staŭ by dobraj nahodaj dla ciesnaha zbližeńnia BNF “Adradžeńnie” z Kanservatyŭna-Chryścijanskaj Partyjaj BNF i drabniejšymi pravymi hrupoŭkami.

Mikoła Buhaj