Biełarus z Kanady niekalki hadoŭ sudziŭsia z žonkaj za dziaciej. Žonka chacieła, kab vypłačvaŭ hrošy i na jaje ŭtrymańnie

Biełarusy ŭ 2017 hodzie pierajechali ŭ Kanadu razam z dvuma dziećmi — synam 2011 hoda naradžeńnia i dačkoj, narodžanaj u 2015-m. Praz dva hady, paśla 12 hadoŭ šlubu, siamja raspałasia.

Paśla rasstańnia dzieci spačatku pravodzili z kožnym z baćkoŭ prykładna adnolkava času. Ale ź listapada 2020 hoda baćka pačaŭ nadoŭha vyjazdžać za miažu.

Tamu ŭ lipieni 2021 hoda byłaja žonka padała ŭ kanadski sud na razvod. Jana taksama prasiła vyznačyć miesca žycharstva dziaciej, paradak sustreč z baćkam, pamier alimientaŭ, utrymańnie dla siabie i padzieł siamiejnaj majomaści.

Mužčyna nastojvaŭ, što razvod užo adbyŭsia ŭ Biełarusi ŭ 2019 hodzie, a tamu kanadski sud nie pavinien znoŭ razhladać hetaj spravy. Ale sud admoviŭsia pryznać biełaruski razvod.

Novaja siamja i žyćcio na niekalki krain

Uletku 2022 hoda sud časova pakinuŭ dziaciej z maci. Mužčynu abaviazali płacić 1383 kanadskija dalary alimientaŭ štomiesiac (heta kala tysiačy dołaraŭ ZŠA).

Tym časam u mai 2022 hoda ŭ Kanadu pierajechała novaja partniorka mužčyna razam sa svaimi tryma dziećmi. 

Biełarus usio mienš byvaŭ u Kanadzie. Pavodle materyjałaŭ spravy, u rozny čas jon žyŭ u Kalifornii i Kosta-Rycy. Mahčyma, taksama naviedvaŭ Biełaruś i inšyja krainy Uschodniaj Jeŭropy.

Kanflikt ź dziećmi

Na pačatku 2024 hoda pamiž byłymi sužencami ŭźnik novy kanflikt. 

Maci paviezła dziaciej na adpačynak na Kubu. U aeraporcie na Kubie jany niečakana sustreli baćku. Jon taksama prylacieŭ na vostraŭ i pasialiŭsia ŭ tym ža kurortnym kompleksie. Pavodle žančyny, były muž pahražaŭ źviarnucca ŭ kubinskuju palicyju, śćviardžajučy, što byłaja žonka pieraškadžaje jamu bačycca ź dziećmi. Sam mužčyna paźniej u sudzie heta admaŭlaŭ.

Kali ŭ lipieni 2024 hoda jon viarnuŭsia ŭ Kanadu, adnosiny ź dziećmi jašče pahoršali. Syn užo nie chacieŭ bavić ź im čas. Dačka taksama nie chacieła iści z baćkam, kali toj prychodziŭ zabirać jaje z pradlonki.

U kastryčniku kanflikt dajšoŭ da taho, što dziaŭčynka schavałasia ad baćki pad stałom u kabiniecie dyrektara škoły. Daviałosia vyklikać palicyju. Paśla hetaha palicejski paraiŭ maci zabirać dačku sa škoły raniej, kab paźbiahać novych sustreč.

Biełarus tłumačyŭ pavodziny dziaciej tym, što maci nibyta śviadoma nastrojvaje ich suprać jaho. Ale syn kazaŭ, što jaho zasmucili pavodziny baćki padčas adpačynku na Kubie i toje, što toj zahadzia nie paviedamiŭ dzieciam pra novyja adnosiny i novuju siamju. Adnaŭlać kantakt z baćkam jon nie chacieŭ.

Vierdykt suda

Asnoŭnaje raźbiralnictva prajšło ŭ studzieni 2025 hoda.

Sud vyrašyŭ, što dzieci i nadalej pavinny pieravažna žyć z maci. Baćka moža sustrakacca ź imi stolki, kolki maci paličyć razumnym, ale tolki paśla nieabchodnaj kolkaści sumiesnych kansultacyj ź dziećmi ŭ śpiecyjalista pa adnaŭleńni adnosin pamiž baćkami i dziećmi. Prava samastojna prymać asnoŭnyja rašeńni pra adukacyju, miedycynskuju dapamohu i inšyja važnyja pytańni pakinuli za maci.

Paśla hetaha sudu zastavałasia vyrašyć finansavyja pytańni — alimienty, padzieł majomaści i mahčymyja vypłaty byłoj žoncy.

Asnoŭnaja sprečka razharnułasia vakoł dachodaŭ mužčyny. U roznych dakumientach jon pakazvaŭ zusim roznyja sumy. Pry hetym sud atrymaŭ źviestki pra značnyja srodki na jaho asabistych rachunkach u kanadskich, amierykanskich i polskich bankach. Mužčyna śćviardžaŭ, što častka hetych hrošaj naležała klijentam abo vykarystoŭvałasia ŭ biznesie, ale dakumientalna hetaha nie paćvierdziŭ.

Sud taksama ŭličyŭ šmatlikija praciahłyja pajezdki biełarusa ŭ ZŠA, Kosta-Ryku i krainy Jeŭropy i pryjšoŭ da vysnovy, što aficyjna zadekłaravanyja dachody nie adlustroŭvajuć jaho realnych finansavych mahčymaściaŭ. U vyniku sudździa vyznačyŭ jaho hadavy dachod u pamiery 125 tysiač kanadskich dalaraŭ (heta kala $89 tysiač).

Na studzień 2025 hoda zapazyčanaść biełarusa pa alimientach składała 33 649 kanadskich dalaraŭ. Sud taksama pavialičyŭ pamier štomiesiačnych vypłat na dziaciej da 1709 kanadskich dalaraŭ (kala $1200) i pastanaviŭ, što baćka pavinien pakryvać 64% dadatkovych vydatkaŭ na dziaciej.

Sprečka pra majomaść akazałasia niaznačnaj. Byłaja žonka nie stała pretendavać na minskuju kvateru, a mužčyna nie zmoh damahčysia kampiensacyi za vypłaty pa aŭtamabili. U vyniku sud pakinuŭ kožnamu toje, čym jon faktyčna vałodaŭ.

Byłaja žonka taksama prasiła pryznačyć vypłaty na jaje ŭłasnaje ŭtrymańnie. Sud adznačyŭ, što paśla dvanaccaci hadoŭ šlubu jana ŭ pryncypie mieła na heta prava, ale paličyŭ, što žančyna ŭžo adnaviła finansavuju samastojnaść, i asobnych vypłat nie pryznačyŭ.

Maci taksama dazvolili biez zhody byłoha muža vyjazdžać ź dziećmi za miažu, abaviazaŭšy tolki zahadzia paviedamlać jamu maršrut i daty pajezdki.

• 1
• 1
• 2
• 4
• 0
• 2
• 0
• 0