Biełaruś praz 100 hadoŭ

Biełaruś praz 100 hadoŭ

Praspekt Alesia Puškina

Praz 100 hadoŭ Miensk zastaniecca stalicaj Biełarusi, ale niekatoryja funkcyi padzielić z Połackam, Navahradkam i Niaśvižam.

U Miensku buduć adnoŭlenyja ŭsie histaryčnyja pabudovy. Sabornaja płošča nabudzie svoj aŭtentyčy vyhlad z Ratušaj i hatelem “Eŭropa”. Ź ciapierašnich budynkaŭ na joj zastanucca tolki Kanservatoryja, sabor i hmach kala mostu cieraz vuł. Niamiha. Budzie pierarobleny tolki jahony fasad — kab harmanična ŭpisvaŭsia ŭ histaryčnaje asiarodździe. Sama płošča i vuł. Franciškanskaja (ciapier Lenina) staniecca piešachodnaj, dla transpartu budzie prakładzienaja padziemnaja trasa (kštałtu Varšaŭskaj trasy W-Z) ad praspektu Skaryny. Za adnoŭlenym Mienskim zamčyščam daroha budzie vychodzić na pavierchniu.

Pa adnym baku Franciškanskaj taksama buduć adnoŭlenyja staryja budynki. Druhi bok zachavajecca ŭ siońniašnim vyhladzie — dziela histaryčnaje pierajemnaści.

HUM cieraz 100 hadoŭ staniecca nieprydatnym dla handlovych metaŭ, i ź jaho zrobiać Nacyjanalnuju halereju mastactvaŭ. Sučasny ž Pałac mastactvaŭ budzie razabrany, kab adkryć vid na kaścioł Śv.Rocha ad vuł. Daŭhabrodzkaj. Kastryčnickuju płošču pieranazavuć u Płošču 25 sakavika, da fasadu trybuny budzie prymacavanaja vialikaja biełaja marmurovaja plita, na jakoj budzie adbity čyrvonym koleram histaryčny zdymak pieršaha ŭradu BNR. Architekturny ansambl płoščy zastaniecca raniejšy, tolki pierad pałacam prafsajuzaŭ na prystupkach źjavicca pomnik Janku Łučynu. Muzej vialikaj ajčynnaj vajny stanie Nacyjanalnym histaryčnym muzejem, na adkrytuju placoŭku jakoha budzie z honaram pieraniesieny pomnik “pieršamu tanku”. Z boku Daminikanskaj vulicy, za Pałacam Respubliki, budzie adnoŭleny kaścioł i klaštar daminikanaŭ dy šerah inšych starych budynkaŭ.

Piščałaŭski zamak stanie muzejem-hatelem. Na jahonaj ścianie źjavicca pamiatnaja doška ź imionami ŭsich znakamitych viaźniaŭ-patryjotaŭ — ad filamataŭ ź filaretami dy pieršych našaniŭcaŭ da maładafrontaŭcaŭ. Luby achvotny zmoža pažyć u kamery Jakuba Kołasa abo Masieja Siadniova, pravieści vielikodny post na narach Jurasia Chadyki i h.d. Turmy za 100 hadoŭ uvohule źniknuć. Złačyncaŭ buduć karać medycynskim sposabam: paraluš i invalidny vazok na miesiac, hod, 5 hadoŭ — u zaležnaści ad rašeńnia sudu prysiažnych.

Łošycki sad stanie biełaruskimi Łazienkami — sa statujami j altankami. Pierad siadzibaj pastaviać pomnik Michału Kleafasu Ahinskamu. La jahonaha padnožža tradycyjna buduć prachodzić muzyčnyja konkursy j festy.

Ciapierašnija mikrarajony stanuć pryhažejšymi paśla taho, jak mastaki-hrafitysty razmalujuć ich u styli Maleviča, Šahała j Kandzinskaha. Imionami hetych dy inšych mastakoŭ buduć nazvanyja mienskija vulicy i praspekty. Zachavaje svaju siońniašniuju nazvu chiba tolki praspekt Puškina. Ale praz 100 hadoŭ usie buduć ličyć, što nazvany jon u honar mastaka Alesia Puškina. Tym bolš što fasady budynkaŭ buduć raśpisanyja jahonymi karcinami: taki sabie praspekt-vystava, praspekt-halereja. Tysiačy turystaŭ buduć švendacca tam, prynosiačy niemałyja prybytki ŭ biudžet.

Litvak Kryviejta