Naš rekord Hinesa

Naš rekord Hinesa

Stanisłaŭ Šuškievič moža ŭ chutkim časie trapić u knihu rekordaŭ Hinesa jak były kiraŭnik dziaržavy, što maje najmienšuju ŭ śviecie pensiju. Ciapier jana składaje 3196 rubloŭ.

Pensija Šuškieviču była pryznačanaja Łukašenkavym ukazam 1996 h. i na toj čas była roŭnaja amal 200 dalaram. Adnak va ŭkazie nie było paznačana, što pensiju treba pieraraźličvać u adpaviednaści ź inflacyjaj.

Šuškievič padaŭ u sud na Ministerstva pracy j sacyjalnaj abarony. U aŭtorak, 12 sakavika, jahony pazoŭ byŭ adchileny.

“Na sudzie mnie zajavili, što pensija dastatkovaja, — skazaŭ Stanisłaŭ Šuškievič dla “NN”. — Vynik byŭ mnie viadomy zahadzia, ale treba ž było pakazać suśvietnaj supolnaści… U sudździ, viadoma, nie było inšaha vyjścia: kali jana vyrašyć inačaj — sama zastaniecca biaz srodkaŭ da isnavańnia. A ja mahu, naprykład, čytać lekcyi”. Šuškievič, tym nia mienš, nie źbirajecca mirycca z takim prysudam i maje namier padavać apelacyju.

Papiarednik Šuškieviča na pasadzie staršyni Viarchoŭnaha Savietu Mikałaj Dziemianciej atrymlivaje ŭ 105 razoŭ bolš za nastupnika — 21 minimalny zarobak u miesiac. Miž tym, status Dziemiancieja byŭ nižejšy — staršynia Viarchoŭnaha Savietu adnoj z respublik SSSR, a Šuškievič uznačalvaŭ parlament užo niezaležnaj Biełarusi.

Apošnija hady eks-staršynia zarablaŭ sabie na žyćcio čytańniem lekcyjaŭ va ŭniversytetach ZŠA i Polščy, tamu pytańnie dziaržaŭnaj pensii jaho asabliva nie chvalavała. Ale ciapier jano paŭstała nadzvyčaj vostra.

Sudovy praces Šuškieviča prymušaje pilna pryhledziecca i da žyćcia inšych pensijaneraŭ Biełarusi. Minimalny pamier pensii ŭ krainie — 53,2 tysiačy rubloŭ (kala 31 dalara), siaredni — 82 tysiačy (kala 48 dalaraŭ), maksymalny — 128,8 tysiač (kala 76 dalaraŭ). Ale heta tolki pensii tych, chto atrymlivaje vypłaty z Fondu sacyjalnaj abarony.

Zatoje jość 110 tysiačaŭ tych, kamu pensija naličvajecca pa specvypłatach ź biudžetu: vajskoŭcy (samaja vialikaja katehoryja), supracoŭniki KDB, orhanaŭ finansavych raśśledavańniaŭ, Ministerstva pa nadzvyčajnych sytuacyjach. Pamiery ichnych pensijaŭ pieravyšajuć siarednija pa krainie. Tak, naprykład, kamandzir pałka (u vajskovym zvańni, nie nižejšym za majora) atrymlivaje 150—180 tys. rubloŭ pensii (kala 88—106 dalaraŭ).

Pensijny ciažar pastupova robicca dla Biełarusi kamieniem na šyi. Siaredni viek žycharoŭ krainy raście, i kolkaść pensijaneraŭ u 2050 h. składzie nia mienš za 3,5 młn. čałaviek, pieravysiŭšy kolkaść tych, chto pracuje. Mnostva pradpryjemstvaŭ užo ciapier nie pieravodziać hrošaj u Fond sacyjalnaj abarony, što viadzie da značnaha hrašovaha deficytu: jak skardziacca pensijanery, pačalisia zatrymki ŭ vypłatach pensijaŭ. Praŭda, pakul jašče nievialikija — na kolki dzion.

Usio heta viadzie da novaj pensijnaj reformy. Supracoŭniki Ministerstva pracy kažuć, što pakul jašče nia mohuć peŭna skazać nakont usich źmienaŭ, jakija adbuducca ŭ novym pensijnym zakanadaŭstvie. Dakładna viadoma adno: pensijny viek budzie padvyšacca. Viaducca havorki j pra toje, kab uraŭniać płanku vychadu na pensiju dla mužčynaŭ i žančynaŭ. Abhruntoŭvajecca heta jak žadańniem paźbiehnuć dyskryminacyi (maŭlaŭ, žančyny raniej vychodziać na pensiju, tamu majuć mienšy pracoŭny staž), tak i čysta ekanamičnaj akaličnaściu: žančyny žyvuć daŭžej za mužčynaŭ i tamu daŭžej atrymlivajuć pensiju (u siarednim — 23 i 14 hadoŭ adpaviedna).

Razhladajucca roznyja varyjanty źmienaŭ što da pensijaneraŭ, jakija pracujuć. Pavodle adnaho varyjantu, jaki ciapier znachodzicca na razhladzie, im buduć vypłačvać tolki častku pensii. Takaja dyskryminacyja vyklikaje rezkija pratesty pracoŭnych pensijaneraŭ. Druhi varyjant praduhledžvaje vypłatu pensijaŭ tolki asobnym katehoryjam pracoŭnych pensijaneraŭ: na pasadu prybiralščycy, akład jakoj składaje ciapier 40—50 tys., aproč pensijanerki, badaj, anichto j nia pojdzie. Navat Stanisłaŭ Šuškievič z svajoj mizernaj pensijaj…

…I ŭsio ž cikava: jakuju pensiju budzie atrymlivać Łukašenka paśla svajho sychodu? Niaŭžo taksama 2 dalary, jak Šuškievič?

Arkadź Šanski