***
Aštrafavali haściej
Supracoŭniki maskoŭskaha pierasoŭnaha zaaparku, jaki atabaryŭsia la muroŭ byłoha jezuickaha klaštaru ŭ Voršy, vyrašyli spalić śmiećcie. Vohnišča pryciahnuła ŭvahu pracaŭnikoŭ ekalahičnaje inspekcyi. Niadbajnyja hości aštrafavanyja na 11 tys. rubloŭ.
Vakcyna ŭ deficycie
Čatyry sałdaty, jakich pakusaŭ pacuk, špitalizavanyja ŭ Voršy. Ale lekaŭ ad šalenstva nie znajšłosia. Takaja samaja historyja zdaryłasia i z žančynaj, jakuju pakusaŭ sabaka. Jaje taksama paprasili pačakać, pakul u horad pryviazuć vakcynu. Paśla taho jak sioleta ad šalenstva pamior 37-hadovy aršaniec, ździŭlaje biesturbotnaść miascovych epidemijolahaŭ. Užo nie ŭpieršyniu horad zastajecca biez vakcyny ad šalenstva. Naprykład, u krasaviku žančyna, pakusanaja sabakam, ababiehšy razam z mužam usie aršanskija bolnicy, u rospačy pryjšła šukać dapamohi ŭ pryjomnuju staršyni harvykankamu.
Padpaliciel-mściviec
Sprobu samahubstva ŭčyniŭ u zali pasiedžańniaŭ Aršanskaha rajsudu abvinavačany ŭ padpałach mužčyna. Pierad vyniasieńniem vyraku jamu było dadziena “apošniaje słova”. Z krykam “voś vam majo apošniaje słova!” padsudny zahostranym metalovym huzikam pačaŭ rezać sabie žyły i aholeny žyvot. Dy tak, što kroŭ pyrsnuła va ŭsie baki. U vyniku samahubca apynuŭsia nie ŭ turmie, a ŭ reanimacyi. Žychar vioski Luciny Aršanskaha rajonu abvinavačvaŭsia ŭ padpale dźviuch chat susiedak-pensijanerak. Heta była, jak skazaŭ padsudny, pomsta za toje, što jany raspaŭsiudžvali čutki, byccam jon zajmajecca kradziažami ŭ svajoj vioscy, jakaja naličvaje ŭsiaho 30 dvaroŭ. Padčas sproby puścić “pieŭnia” ŭ treci dom mściviec byŭ schopleny. Prakuror patrabavaŭ dla padsudnaha 11 hadoŭ turmy dy kampensacyi materyjalnych strataŭ paciarpiełym u pamiery 10 młn. rubloŭ. Pierad sudovym pracesam psychijatryčnaja ekspertyza złačyncy nie pravodziłasia.
Viktar Lutynski, Vorša
Cyharety z łaźni
50 tysiač pačkaŭ cyharetaŭ znajšli pamiežniki sumiesna z supracoŭnikami ŭpraŭleńnia Departamentu finansavych raśśledavańniaŭ u łaźni na chutary ŭ sielsaviecie z centram u Kiamieliškach, što na miažy ź Litvoj. Cyharety zamiežnaj vytvorčaści i ŭsie biez akcyznych marak. Haspadar nie abjaviŭsia, a tamu jany chutka źjaviacca ŭ prodažy. Acenienyja cyharety ŭ 30 młn. rubloŭ.
Kamputary ad palakaŭ
U škole №1 Astraŭca i ŭ dziciačym junackim centry źjavilisia kamputary. Ich pieradaŭ Sajuz palakaŭ Biełarusi, bo tut na fakultatyvie vyvučajuć polskuju movu. Vykarystoŭvać techniku buduć dla vypusku hazety.
Marjan Vianhroŭski, Astraviec
U Mahilovie adnovicca ratuša
Šmat chto ŭžo siońnia nie paznaje Mahilova, jaki za apošnija hady nia tolki raskvieciŭ vulicy jarkimi klumbami pa ŭsim horadzie i nievialičkimi kramami ŭ Ctarym mieście, ale i papraviŭ dzie-nidzie stan daroh i chodnikaŭ, zamianiŭšy jaminy i łužyny plitkaj-brukavankaj. Harvykankam plancuje za nastupny hod pabudavać piacipaviarchovy parkinh la Domu bytu, davieści narešcie da ładu ŭźbiarežža Dubravienki la hatelu “Mahiloŭ”, a vulicu Leninskuju zrabić piešachodnaj. Ale samaje hałoŭnaje — heta pačatak pracy pa adnaŭleńni mahiloŭskaj ratušy, pabudavanaj pry kancy XVII st. i źniščanaj u 1957 h.
Anton Višoŭ, Mahiloŭ
Śmierć u kałodziežy
Nia chutka vyjdzie na volu 35-hadovy žychar vioski Staraja Rudnia Astravieckaha rajonu. Milicyja zatrymała jaho za zabojstva. Zachmialiŭšy łyč, jon zavitaŭ da 77-hadovaj miascovaj žycharki. Zabraŭ u babuli 80 dalaraŭ i butelku harełki dy kinuŭ staruju ŭ kałodziež. Niebaraka pamierła.
Marjan Vianhroŭski, Astraviec
Partyzany, partyzany...
Bolš za 60% tak zvanych “uchilistaŭ” (jakija ŭchilajucca ad pryzyvu ŭ vojska) u vobłaści składajuć maładyja žychary Babrujsku. U Mahilovie ŭchilistaŭ usiaho 6, a ŭ Babrujsku — 56 čałaviek.
Pavodle “Viačerniaha Mahilova”
Lon i śnieh
Usie na lon! Taki zaklik kinuli ŭłady pracoŭnym kalektyvam Białyničaŭ. Nastojliva rekamendujecca zadziejničać na vykanańni hetaj raboty da 30% asabovaha składu kalektyvaŭ. Naładžany i ŭlik adbyćcia “panščyny”. Pieršy dzień dobraachvotna-prymusovaj pracy skončyŭsia ničym — pieraškodziŭ śnieh. Ludzi z hadzinku pakaleli na poli i pajšli dachaty.
Bazyl Lićvinovič, Białyničy
Jazda
Dva hady papraūčych rabotaū atrymaū pamočnik mašynista Ivan Kiślinski, jaki letaś, kirujučy elektryčkaj Baranavičy—Miensk, na stancyji Asipoūščyna nie zaūvažyū, što 15-hadovamu chłopcu dźviaryma zacisnuła nahu, i pajechaū. Chłopca praciahnuła hałavoju pa špałach 300 metraū, pakul jon nia zdoleū samastojna pryūźniacca i raźviazać matuzok na bocie, paśla čaho źlacieū pad adchon. A bot pajechaū dalej. Mašynisty daviedalisia pra zdareńnie tolki na nastupnym prypynku. Na ščaście, pakalečany chłopiec zastaūsia žyvy.
Cyrk biaz muzyki
Z cyrku, što pryjechaū u Baranavičy na hastroli, skrali syntezatar “Yamaha”. Instrument źnik z namiotu nočču na 13 kastryčnika. Košt skradzienaha syntezatara — miljon rubloū.
Rusłan Raviaka, Baranavičy
Kamientary