Prarvacca ŭ NATO nie ŭdałosia

***

20—21 listapada ŭ Prazie adbudziecca samit NATO. Biełaruskaha kiraŭnika tam nie čakajuć.

Samo pa sabie praviadzieńnie samitu ŭžo źjaŭlajecca padziejaj. Ale sioletni samit adroźnivajecca ad inšych. Upieršyniu samit aljansu adbudziecca ŭ adnoj z krainaŭ byłoha kamunistyčnaha bloku.

Miarkujecca, što ŭ samicie voźmuć udzieł 2500 delehataŭ. Raźvićcio padziejaŭ buduć aśviatlać kala dźviuch tysiačaŭ žurnalistaŭ. 500 roznych aŭtamabilaŭ dy aŭtobusaŭ buduć zabiaśpiečvać ruch udzielnikaŭ forumu.

Pieršaja ahulnaja sustreča 19 kiraŭnikoŭ krainaŭ — siabroŭ NATO adbudziecca ŭviečary 20 listapada ciaham viačery ŭ rezydencyi prezydenta Čechii Vacłava Haŭła. Adnačasova ŭ meryi Prahi budzie adbyvacca sustreča ministraŭ abarony dy zamiežnych spravaŭ, a taksama siabroŭ delehacyjaŭ krainaŭ — udzielnic Eŭraatlantyčnaj rady partnerstva NATO. U hety ž viečar pradstaŭniki srodkaŭ masavaj infarmacyi sustrenucca ŭ Praskim kanhresavym centry.

Na nastupny dzień — 21 listapada — prahrama samitu budzie zapoŭnienaja plenarnymi pasiedžańniami ŭ Valdštejnskim pałacy — budynku, dzie znachodzicca Senat Českaj Respubliki.

A ŭviečary 750 čałaviek źbiarucca ŭ rezydencyi českaha prezydenta Vacłava Haŭła na hrandyjozny hała-viečar. Tam buduć i kiraŭniki krainaŭ — siabroŭ NATO, i kiraŭniki krainaŭ — udzielnicaŭ prahramy “Partnerstva dziela miru”, i pradstaŭniki Arhanizacyjnaha kamitetu samitu, i českija ministry, i ambasadary roznych krainaŭ.

Dakładna viadoma, što tam nia budzie Alaksandra Łukašenki. I, napeŭna, Leanida Kučmy.

I adzin, i druhi pakul nie atrymali českich vizaŭ, ale ŭžo paśpieli atrymać listy ad kiraŭnictva NATO ab niepažadanaści ichnaje prysutnaści na samicie. Jak paviedamiŭ 12 listapada ahienctvu “Reuters” adzin z pradstaŭnikoŭ štab-kvatery aljansu ŭ Bruseli, u listach było adznačana, što, kali abodva hetyja kiraŭniki ŭsio ž vyrašać uziać udzieł u sustrečy, “iany ŭbačać mnostva pustych kresłaŭ pobač z saboj”.

Uviečary taho ž dnia da dumki NATO dałučylisia pradstaŭniki amerykanskaha ŭradu. “Złučanyja Štaty suprać pryjezdu biełaruskaha prezydenta Alaksandra Łukašenki na samit NATO ŭ Prazie”, — pra heta padčas telemostu z českimi žurnalistami zajaviŭ pradstaŭnik Dziarždepartamentu ZŠA Robert Bradkie.

Uładam Čechii ŭ hetaje sytuacyi nie pazajdrościš. Łukašenka źviarnuŭsia pa českuju vizu pry kancy kastryčnika. Amal adrazu ab jahonym zvarocie stała viadoma českim ŚMI. Nie prachodzić dnia, kab sytuacyju ź biełaruskim prezydentam nie abmiarkoŭvali ŭ českaj presie. Žurnalisty navat daviedalisia, što biełaruskaja delehacyja nibyta sabrałasia pasialicca ŭ hateli “Paryž”.

Ale ŭsio vyhladaje tak, što, chutčej za ŭsio, biełaruski kiraŭnik nia ŭbačyć ani Prahi, ani “Paryžu”, ani zavodu “Škoda” (pra svajo žadańnie naviedać hetaje pradpryjemstva Łukašenka paviedamiŭ u zvarocie da českaje ambasady). Česki MZS schilajecca da rašeńnia admović Alaksandru Łukašenku va ŭjaznoj vizie.

Z adnaho boku, Praha musiła b vydać vizu biełaruskamu prezydentu jak kiraŭniku delehacyi krainy — ŭdzielnicy Eŭraatlantyčnaj rady partnerstva. Ź inšaha boku, udzieł Łukašenki ŭ samicie byŭ by parušeńniem hałoŭnaj idei aljansu — pabudovy i abarony demakratyčnaha hramadztva.

Asnoŭnyja pretenzii, jakija pradjaŭlajucca biełaruskamu kiraŭnictvu, — parušeńnie pravoŭ čałavieka i hramadzianskich svabodaŭ, adsutnaść demakratyi ŭ krainie.

Paśla taho jak stała viadoma pra namiery českaha MZS, biełaruskaje dyplamatyčnaje viedamstva vyjaviła svoj nieprafesijanalizm. Zamiest taho kab pasprabavać spakojna i kanstruktyŭna ŭzhadnić pazycyi jak z NATO, tak i z haspadarami samitu, biełaruskija MZSaŭcy histeryčna pačali pahražać usim bakam nierastłumačanymi nastupstvami i demanstracyjaj “sapraŭdnaha abličča NATO” ŭsiamu śvietu.

U takich umovach rašeńnie A.Łukašenki ŭziać udzieł u samicie było b nia samym udałym. Naŭrad ci kiraŭnictva Biełarusi atrymaje zadavalnieńnie ad plonnaj pracy i pieramovaŭ z kiraŭnikami inšych krainaŭ śvietu ciaham samitu NATO. Bo što za plon — razmaŭlać z pustymi kresłami?

Natalla Sudlankova, Praha

• 0
• 0
• 0
• 0
• 0
• 0
• 0
• 0