Licej pierad 1 vieraśnia

1 vieraśnia liceisty pryjduć na ŭračystuju liniejku da svajho budynku pa vuł.Kirava, 21. U hety ž dzień pačnucca zaniatki.

Hety hod jany buduć zajmacca ŭ roznych pamiaškańniach, u tym liku ŭ chatnich umovach. Kali ŭłady nia vyrašać sytuacyi, uviesnu liceisty zdaduć ekzameny eksternam. Nastaŭniki prysiahnuli zajmacca z vučniami. Z 159 navučencaŭ 137 užo dali svaju zhodu na takuju formu navučańnia. Takim čynam, Licej, začynieny ŭładami, nie razvaliŭsia, a całkam zachavaŭ kalektyŭ. Tym samym zachavajecca i ŭzrovień vykładańnia. Prapanova harkamu adukacyi stvaryć adnu klasu ŭ licei BDU, a astatnich vučniaŭ dadać va ŭžo najaŭnyja klasy ŭ biełaruskamoŭnych himnazijach — dla liceistaŭ i ichnych baćkoŭ nieprymalnaja.

Asnoŭny kłopat baćkoŭ i vykładčykaŭ ciapier — arhanizavać navučalny praces. Padručniki ŭžo zdabyli, jak i srodki na inšyja navučalnyja materyjały.

Liceisty praciahvajuć «latučyja» akcyi ŭ abaronu svajoj ustanovy. 21 žniŭnia prajšła akcyja na Niamizie, 22-ha — na praspekcie Skaryny nasuprać HUMu. Abiedźvie jany byli adznačanyja pilnaj uvahaj milicyjantaŭ.

Futbolny turnir «Za licej» 24 žniŭnia sabraŭ vosiem kamandaŭ: vypuskniki liceju roznych hadoŭ, «Zubr», «Alfa-radyjo — Naša muzyka», zbornaja Barysava, «Małady front», «Supolnaść», «Dziaviatka» (internetny fan-klub «Dynama Miensk»), zbornaja žurnalistaŭ. Pieramahli apošnija, kapitan kamandy Aleh Hruździłovič atrymaŭ kubak z nadpisam «Za licej-2003». Abiacanaje ŭ jakaści pryzu piva nikomu nie dastałosia: baćki nie dali liceistam hrošaj na jaho, «kab nie prynižać ideałaŭ zmahańnia za licej».

26 žniŭnia milicyjanty z uvahi na pryjezd u Miensk rasiejskaha ministra ŭnutranych spravaŭ Barysa Hryzłova nie dazvolili abaroncam liceju vyjści na praspekt vulicaj Kirava. Tady navučency dvarami prarvalisia da HUMu i, pasieŭšy na ziamlu, śpiavali pieśni, pryśviečanyja liceju, źbirali podpisy ŭ padtrymku. Na siońnia ich bolš za 8000.

Źjavilisia i pieršyja vodhuki na zvarot vykładčykaŭ da nastaŭnikaŭ Biełarusi. Źviartajucca nastaŭniki z roznych škołaŭ stalicy, pytajucca, čym možna dapamahčy. Praciahvajuć vystupy ŭ abaronu liceju paety, muzyki i mastaki: 26 žniŭnia prajšła čarhovaja viečaryna z udziełam Niła Hileviča, Źmitra Vajciuškieviča, Andreja Chadanoviča. Prysutnyja choram śpiavali «Ja naradziŭsia tut». Vystavu adnoj karciny («Partyzanskaja škoła») naładziŭ Mikoła Kupava. Nia zdoleŭ pryjechać Viktar Šałkievič, jon daŭ solny kancert u sieradu. Sustrečy z tvorcami majuć adbyvacca i nadalej.

Arkadź Šanski

• 0
• 0
• 0
• 0
• 0
• 0
• 0
• 0