Biełarusi chiełaŭinu šyroka nie adznačajuć. Śviata niačystaj siły padmianiła 85-ja hadavina kamsamołu.
Šykam ličylisia kufajki bryhadziraŭ budatradaŭ, pylnyja šlemy kamisaraŭ i h.d. Defile zaciahnutych u skuru siabroŭ ŁKSMB da pomnika pravadyru nahadvała šeście ralevikoŭ z klubu «Paŭnočny drakon», viečaryna ŭ Pałacy Respubliki — karnavał.
Razynkaj «chiełaŭinu» stała sprečka za spadčynu: ŁKSMB i BRSM vyznačali, chto ź ich sapraŭdny naščadak Paŭki Karčahina. «A ŭ nas na ściahu, jak u VŁKSM, — partret Lenina», — kazaŭ kamsiuk Janienka. «A my robim bolš dobrych spravaŭ», — adpasoŭvaŭ respublikaniec Arda.
Kali b my žyli ŭ narmalnaj kapitalistyčnaj dziaržavie, z sprečki vyjšaŭ by superpraces, jaki b nie sastupaŭ ciažbie pamiž byłymi bitłami za aŭtarskija pravy na pieśniu «Davaj zrobim heta prosta zaraz». Salamonavym rašeńniem było b padzialić lehiendu kamsamołu. Niachaj Janienka voźmie sabie pieśniu «B́jetsia v tiesnoj piečurkie ohoń», a Arda — «Moj adries — Sovietskij Sojuz». Choć ja b na ich miescy zmahaŭsia za prava pravajdera mitu ab Siarhieju Biardziuhinu, ukrainskim kamsamolcu, jaki pamior na tym tydni ŭ adeskaj turmie. Na kiču jon trapiŭ za sprobu abrabavać bank, a paśla razdać hryŭni hałodnym dokieram Małdavanki.
Tyja, kaho zapichnuli ŭ kamsamoł u čas pierabudovy, taksama majuć svaje zakonnyja pravy na šmatok lehiendy ab kamsamole. Dajcie nam kamsamoł 80-ch z seksapilnymi sakratarkami ŭ łasinach, viarnicie kamsorhaŭ, jakija trymali ŭ internatach videakropki. Chaču pasłuchać dakład lektara z rajkamu VŁKSM ab tym, što zachapleńnie hurtam «Metallisa» vyklikaje stupar u mazhach.
Da nastupnaha chiełaŭinu, prabačcie, hadaviny kamsamołu, abaviazkova nabudu kaścium kumira kamsamolcaŭ 80-ch — tryko jak u Brusa Li.
Lolik Uškin, levy tusoŭščyk
Ciapier čytajuć
Zakinutuju siadzibu Bahdanovičaŭ pierarobiać u bucikovy hatel FOTY6
Kamientary