Hamletaŭskaje pytańnie «Być abo nia być» hučyć u Biełarusi inakš «Kraści abo nia kraści rasiejski haz».
Adzin z hałoŭnych urokaŭ hazavaj kampanii — nieprystasavanaść biełaruskaj dumki da realijaŭ hlabalizacyi. Aficyjnyja ŚMI kidała z adnaho psychalahičnaha stanu ŭ druhi. Spačatku BT prademanstravała CEC pad Mahilovam, jakaja pierajšła z mazutu na piłavińnie, i zadavolenyja z hetaha faktu fejsy miascovych pejzanaŭ. Pejzany masava admaŭlalisia ad hazavaha aciapleńnia. Kadry mahiloŭskaha pačynu supravadžalisia aptymistyčnym, na matyŭ pieśni Nuf-Nufa i Nif-Nifa, kamentarom: nam nia strašny toj «Hazprom», u nas apiłak chopić na čverć stahodździa. A jašče jość makucha — adkidy vina-harełačnaj pierahonki. Dzie ty brodziš, toj «Hazprom»...
Ale raptam eŭfaryja źmianiłasia depresijaj. U «Konturach» paśla materyjału ab hazavaj blakadzie pakazali rolik, pryśviečany praryvu blakady Leninhradu. Veterany, jakija žyvuć u Biełarusi, pryznavalisia, što sioleta zima padobnaja da blakadnaj. Maral: my ŭsie biednyja novablakadniki, a «Hazprom» — feldmaršał Huderyjan.
Apazycyja taksama adciahnułasia. Kłon Frydmana-Hajeka sp.Ramančuk zajaviŭ, što ŭsie našyja prablemy praz toje, što my nie žyviom pavodle kanonaŭ rynku. Jak byccam pry rynku ludzi ad choładu nia klejać łasty. Brytanski «News Line» nadoječy pisaŭ pra paračku pensijaneraŭ z Brystalu, jakija zahnulisia, nia zdoleŭšy apłacić žyroŭki. Vidavočna, tyja pensijanery, pieratvarajučysia ŭ ledzianyja mumii, pavinny byli ciešycca, što stali ekspanatami dziejnaści rynkavych zakonaŭ.
Chraničnaja enerhazaležnaść ad Rasiei i stan rodnaj haspadarki dyktujuć horkuju praŭdu: paśla pieršaj hazavaj vajny budzie druhaja, i treciaja, i sotaja, i h.d. Da hetaha treba być hatovym i technična, i maralna.
Kali ŭ Paŭdniovaj Afrycy kolkaść chvorych na ŚNID zaškaliła, Pretoryja banalna vykrała ŭ zachodnich farmaceŭtyčnych kancernaŭ recepty nieabchodnych lekaŭ. Nie demanstravali rolikaŭ pra toje, što ŭ ich jość dziva-kaktus i zachodniaja medycyna im pa tamtamie, nie kaniučyli dapamahčy jak achviaram aparteidu, nie kazali: «Nu što rabić, niama rynku. Bušmeny i hatentoty ničoha nie kumiekajuć u fjučersnych apcyjonach». Prosta skrali, ściahnuli, śpierli — nazyvajcie jak zaŭhodna. Kali jdziecca pra žyćcio i zdaroŭje hramadzianaŭ, narmalny ŭrad i hramadztva prablemy pryvatnaj ułasnaści nie kałyšuć.
Raju ŭnieści adpaviednyja kamentary ŭ tałmud ab dziaržidealohii. Vykinuć muru ab słavianskich amurach. Pastavić pracu Lenina «Dziaržava i revalucyja». Najlepšaje miesca ŭ školnaj prahramie addać pryhodam šlachietnych razbojnikaŭ: Rynalda Rynaldyni, Beni Kryka, Robina Huda. Nie zabudźciesia pra raściažki praz uvieś praspekt «Ja mužyk-biełarus, pan sachi i truby». Tolki ŭ takim razie nastupnuju hazavuju tryvohu my sustreniem idejna padrychtavanymi. Našym devizam baču ekspromt ananimnaha čynoŭnika: «Haz u trubie jość, značyć, my jaho biarom!»
Lolik Uškin
Ciapier čytajuć
Vynieśli prysud Palinie Zyl — błohiercy, jakaja stała nulavym pacyjentam spravy Hajuna, bo ŭ jaje znajšli tuju samuju spasyłku ad Matolki6
Kamientary