REPka vyjšła sama

Šerahi Kanfederacyi niezaležnych prafsajuzaŭ mohuć vyraści da 15 tysiač čałaviek.Federacyju prafsajuzaŭ Biełarusi pakinuŭ prafsajuz rabotnikaŭ radyjoelektronnaj pramysłovaści (REP) — apošniaje halinovaje prafabjadnańnie z samastojnaj pazycyjaj. Nazirajučy za tym, jak kozikaŭskaja FPB adchiliła ad kiraŭnictva A.Jarašuka dy A.Buchvostava, REP pajšoŭ na apieradžalny krok, vyjšaŭšy sa składu Federacyi.

Praŭda, FPB paśpieła raściahnuć siabroŭ REP. Pavodle źviestak pres-słužby FPB, na 1 studzienia 2003 h. u prafsajuzie REP na ŭliku stajała 40 tysiač čałaviek, adnak za hod kolkaść členaŭ REP skaraciłasia ŭ 40 razoŭ. Staršynia REP Hienadź Fiadynič nazyvaje inšyja ličby. Pavodle jahonych słovaŭ, u REPie ciapier 3 tysiačy siabraŭ, a razam z ASM stanie kala 5 tysiačaŭ.

17 sakavika pasiedžańnie prezydyjumu prafsajuzu adnahałosna vykazałasia za pierachod u volnaje płavańnie. Ciapier da prafsajuzu REP miarkujuć dałučycca niezarehistravany Niezaležny prafsajuz rabotnikaŭ aŭtamabilnaha i sielskahaspadarčaha mašynabudavańnia (ASM) na čale z Alaksandram Buchvostavym i častka halinovaha prafsajuzu metalistaŭ. Pazačarhovy źjezd REP skarektavaŭ svoj statut, uvioŭšy pasadu sustaršyni, i źmianiŭ nazvu na REPAM — prafsajuz rabotnikaŭ radyjoelektronnaj pramysłovaści, aŭtamabilebudavańnia, metałaapracoŭki dy inšych halinaŭ narodnaj haspadarki. Źmieny ŭ statut znachodziacca na rehistracyi ŭ Ministerstvie justycyi. Kali rehistracyja adbudziecca, abjadnany prafsajuz REPAM z kolkaściu štychoŭ da 5 tysiačaŭ moža ŭlicca ŭ Kanhres demakratyčnych prafsajuzaŭ (BKDP). Ale «kiraŭnictva FPB usialak supraćdziejničaje rehistracyi źmienaŭ u statucie REP», — skardzicca A.Buchvostaŭ.

Sam BKDP ciapier jadnaje prykładna 10700 čałaviek. U Kanhres uvachodziać Niezaležny prafsajuz harniakoŭ i transpartnikaŭ (Salihorsk) kolkaściu 6,5 tysiačy čałaviek, Svabodny prafsajuz Biełaruski — 2,5 tysiačy čałaviek, Niezaležny prafsajuz metalistaŭ i Demakratyčny prafsajuz transpartnikaŭ — kožny pa 800 čałaviek.

Treba adznačyć, što SPB na čale z Hienadziem Bykavym prypyniŭ siabroŭstva ŭ BKDP u śniežni 2003 h. paśla pazbaŭleńnia SPB prava hołasu ŭ radzie Kanhresu za niaŭpłatu ciaham apošnich dvuch hadoŭ siabroŭskich unioskaŭ.

Bolš za miesiac Miniust daskanalna praviaraje prafsajuzy, što ŭvachodziać u BKDP. «Nas chočuć kali nie likvidavać, dyk asłabić», — kaža vice-prezydent BKDP Mikałaj Kanach. BKDP rychtujecca paviedamić pra fakty ŭcisku specyjalnaj kamisii pa daśledavańni pravoŭ pracoŭnych Mižnarodnaj arhanizacyi pracy, jakaja maje naviedać Biełaruś 15—23 krasavika. Da listapada kamisija padrychtuje dakład pra sytuacyju ŭ Biełarusi Administracyjnaj radzie MAP. Kali kamisija paćvierdzić fakty parušeńniaŭ, biełaruski ŭrad moža abskardzić rašeńnie MAP u Mižnarodnym sudzie ŭ Haazie (takoje zdarajecca nadzvyčaj redka) abo pahadzicca z vyvadami kamisii i abaviazacca da kankretnaj daty likvidavać usie niedachopy. Inakš krainu čakajuć ekanamičnyja sankcyi.

Prafsajuz REPAM dobra ŭmacavaŭ by BKDP. Nia tolki siabrami — da abjadnanaha prafsajuzu blizkaja hazeta «Rabočaja solidarnosť». Adnak u prafsajuzach razumiejuć, što da złučeńnia im pryjdziecca vytryvać čarhovuju ataku ŭładaŭ.

Ryhor Bujan

Pikiet REPu suprać pieravodu pracoŭnych na kantraktnuju systemu adbudziecca na pł.Vaniejeva ŭ piatnicu, 26 sakavika, a 16-j hadzinie.

• 0
• 0
• 0
• 0
• 0
• 0
• 0
• 0