Rezalucyja PARE — tolki pačatak

Dakład Chrystasa Purhurydesa «Źnikłyja ludzi ŭ Biełarusi» pryniaty Parlamenckaj asamblejaj Rady Eŭropy. Heta — pieramoha! Heta śviatło ŭ kancy tunelu dla nas — rodnych i blizkich tych, chto źnik nie na vajnie, a byŭ vykradzieny ŭ centry Eŭropy ŭ mirny čas, — Jurja Zacharanki, Viktara Hančara, Anatola Krasoŭskaha, Dźmitryja Zavadzkaha.

Dakład byŭ uchvaleny PARE napiaredadni piataj hadaviny źniknieńnia Jurja Zacharanki. Što dla nas hetyja hady? Heta — čakańnie, nadzieja, hora, ślozy i biaskoncaja baraćba. Baraćba za vyžyvańnie, baraćba za honar našych blizkich, baraćba za vyśviatleńnie praŭdy, baraćba z uładnaj dziaržaŭnaj mašynaj, jakaja sprabuje hetuju praŭdu schavać čym hłybiej, baraćba ź nieprychavanym cynizmam z boku aficyjnych hazet, telebačańnia i tych, chto nazyvaje siabie harantam Kanstytucyi.

I ŭsio-taki dakład pryniaty! I heta pačatak novaha etapu ŭ pošuku praŭdy pra losy vykradzienych ludziej u Biełarusi. Da apošniaha momantu byli sumnieńni ŭ tym, što jon budzie pryniaty, — zanadta doŭha my išli da hetaha, zanadta surjoznyja abvinavačańni suprać ułady, zanadta žorstkija miery. Ale dziejsnyja i spraviadlivyja.

Nichto jašče nie navažvaŭsia ŭ aficyjnym dakumencie takoha ŭzroŭniu ščyra i adkryta skazać:

— tak, vyšejšyja słužbovyja asoby Biełarusi padazrajucca ŭ dačynieńni da źniknieńniaŭ, i hetamu jość dokazy;

— tak, mnohija aficyjnyja asoby zamiešany va ŭtojvańni praŭdy i abciažarvańni raśśledavańnia hetych źniknieńniaŭ, uklučajučy prezydenta;

— tak, u centry Eŭropy isnuje dyktatarski režym;

— tak, nieabchodna rabić žorstkija dziejańni da ŭstanaŭleńnia iściny ŭ spravie vykradzienych i likvidacyi hetaha dyktatarskaha režymu;

— tak, Eŭropa pavinna dapamahčy Biełarusi źmianić sytuacyju i viarnucca da cyvilizavanaha žyćcia.

I heta nia prosta słovy — dla praviadzieńnia sapraŭdnaha raśśledavańnia prapanujucca kankretnyja kroki:

— adchileńnie ad pasad hieneralnaha prakurora V.Šejmana, ministra sportu i turyzmu, byłoha ministra ŭnutranych spraŭ Ju.Sivakova, kamandzira ZACHRu Dz.Paŭličenki;

— prapanova sudam tych krain, zakony jakich praduhledžvajuć mižnarodnuju jurysdykcyju pa spravach ab surjoznych parušeńniach pravoŭ čałavieka, pačać pracesy suprać niekatorych vysokapastaŭlenych biełaruskich čynoŭnikaŭ za zabojstvy pa palityčnych matyvach;

— prypynieńnie ŭsich kantaktaŭ na vyšejšym uzroŭni ź biełaruskimi ŭładami da vyrašeńnia hetaha pytańnia.

Heta tolki pačatak. Ciapier słova i sprava za Kamitetam Ministraŭ Rady Eŭropy, parlamentami krain Eŭrapiejskaha Źviazu, sudami eŭrapiejskich krain, prezydentami i premjer-ministrami, pravaabarončymi arhanizacyjami, žurnalistami i ŭsimi ludźmi, jakim nieabyjakavy los Biełarusi jak častki Eŭropy i jaje budučyni.

www.charter97.org

Iryna Krasoŭskaja,

žonka Anatola Krasoŭskaha, źnikłaha ŭ 1999 h.

• 0
• 0
• 0
• 0
• 0
• 0
• 0
• 0