Nichto nia choča sastupać

Zaplanavanaja na 23 studzienia spravazdačnaja vybarčaja kanferencyja Haradzienskaj haradzkoj supołki abjadnańnia «BNF «Adradžeńnie» nie adbyłasia z pryčyny niepadrychtavanaści: nie byli abranyja delehaty nizavych arhanizacyj, tamu schod byŭ pryznany nielehitymnym. Niahledziačy na heta, vyrašyli nie razychodzicca, a pasłuchać haściej dy vykazacca samim.

Namieśnik staršyni BNF Alaksiej Janukievič raspavioŭ pra namahańni kaalicyi «Piaciorki+» pa kaardynacyi partyjnych vysiłkaŭ padčas vybaraŭ deputata parlamentu pa vybarčaj akruzie №52. Praŭda, tut jość prablemy. Partyja BNF, BSDH dy PKB vyrašyli padtrymać Siarhieja Antusieviča, jaki, na ich dumku, maje najlepšyja šancy siarod inšych pretendentaŭ: viadomy ŭ horadzie jak aktyŭny deputat harsavietu dy kiraŭnik prafsajuznaj arhanizacyi Biełaruskaha niezaležnaha prafsajuzu na zavodzie «Azot».

Ale kalehi z AHP vyłučyli svajho pradstaŭnika — Jarasłava Ramančuka — i na sastupki nie iduć.

Pryjechaŭ u Horadniu i jašče adzin kandydat — hienerał Valer Frałoŭ. Źviartajučysia da prysutnych, jon padkreśliŭ, što ŭ horadzie nie čužy — tut nios vajskovuju słužbu, byŭ abrany deputatam pałaty pradstaŭnikoŭ druhoha sklikańnia. Sp. Frałoŭ padkreśliŭ, što najlepšaha kandydata možna vyjavić praz sacyjalahičnaje apytańnie albo rejtynhavaje hałasavańnie. Hienerał zaznačyŭ, što ź inšymi demkandydatami možna «zaŭsiody damovicca».

Sp.Frałoŭ panarakaŭ taksama, što kaalicyja «Piaciorka+» nie prysłuchoŭvajecca da dumki vopytnych palitykaŭ i haspadarnikaŭ, biare na siabie śmiełaść samastojna raspracoŭvać, naprykład, scenar vyłučeńnia adzinaha kandydata na pasadu prezydenta ad demakratyčnych sił.

Staršynia haradzienskaj partyi BNF Siarhiej Malčyk paryravaŭ: «Krytykujučy rabotu partyj, treba być bolš taktoŭnym. Vy, Valery Dźmitryjevič, taksama z peŭnaha času siabra BSDP (NH)».

Kali havorka zajšła ab prezydenckich vybarach, to z najnoŭšaj infarmacyjaj prysutnych aznajomiŭ Alaksiej Janukievič. Jon padkreśliŭ, što robiacca zachady, kab asnoŭnyja pretendenty ad apazycyi byli nazvany ŭ traŭni, a ciapier vyznačajecca realnaje koła mahčymych kandydataŭ. Demsiły kožnaj vobłaści na adpaviednym rehijanalnym forumie mohuć nazvać proźvišča svajho vyłučenca, a kančatkovy vybar budzie zrobleny na Kanhresie demakratyčnych sił.

Haradzienščyna vyznačyła jak minimum dvuch kandydataŭ — Alaksandra Milinkieviča dy V.Frałova. Apošni pryludna jašče raz ćviorda paŭtaryŭ: «Budu vystaŭlać svaju kandydaturu ŭ prezydenty RB». Źbirajecca były deputat zaniacca i partyjnym budaŭnictvam. Jon maje namier pieraciahnuć u svoj ruch «Supraciŭ» ludziej, jakija pierakanalisia ŭ biaździejańni svaich partyj i hatovy dałučycca da jaho. Tak, siabry ŁDP, pavodle jahonych słoŭ, vialikimi hrupami pakidajuć partyjnyja šerahi, abvinavačvajučy Siarhieja Hajdukieviča ŭ zdradzie ideałam i prymityŭnaj zmovie z uładaj…

Kanferencyja haradzkoj arhanizacyi BNF «Adradžeńnie» adbudziecca paźniej. Davybary pa 52-j vybarčaj akruzie nabirajuć chadu. Prezydenckaja honka jašče napieradzie, ale niekatoryja ŭžo staranna nadzimajuć ščoki.

Miarkujučy pa vystupleńniach prysutnych, usim nadzvyčaj abrydli «mižsabojčyki» demakratyčnych partyj. Nibyta i damaŭlajucca ab supolnych zachadach, adnak na spravie ŭsio pa-inšamu.

Prostyja haradzienskija chłopcy ŭ rozdumie. Nasłuchalisia šmat, ažno hałava puchnie. Kamu vieryć, na kaho staŭku rabić, kamu dapamahać? Vybar spraŭnych palitykaŭ jość. Ale mała času, kab hety vybar zrabić. Užo ciapier treba vyznačacca.

Anton Łabovič, Horadnia

• 0
• 0
• 0
• 0
• 0
• 0
• 0
• 0