Letaś Ukraina pieratvaryłasia ŭ palihon pa vyprabavańni palittechnalahičnaj zbroi, jakuju zaraz buduć vykarystoŭvać i ŭ biełaruskaj palitycy.
Svaim pohladam «znutry» na padziei aranžavaj revalucyi, a taksama mierkavańniami ab pijary z karespandentam «NN» padzialiŭsia prezydent Ukrainskaj asacyjacyi public relations Hieorhi Pačapcoŭ.
«NN»: Sp. Pačapcoŭ, pra «pijar» kažuć časta. Ci nie mahli b Vy patłumačyć, što takoje public relations?
Hieorhi Pačapcoŭ: Pijar, u adroźnieńnie ad reklamy, stvaraje kanteksty ŭsprymańnia tych ci inšych abjektaŭ. Na reklamu my reahujem drenna, bo heta sytuacyja adkrytaha naviazvańnia, a pijar źjaŭlajecca miakkim metadam, jaki prydumali dla pracy z svabodnymi ludźmi. Heta antypod zahadu.
«NN»: Kali kazać pra troch ukrainskich prezydentaŭ — Kraŭčuka, Kučmu, Juščanku, — jak adroźnivaŭsia ich styl pracy z hramadzkaściu?
HP: Adroźnivaŭsia nia stolki sam styl, kolki čas, u jaki kožny z prezydentaŭ prychodziŭ. Kraŭčuk byŭ sakratarom CK i mieŭ važny kamunikatyŭny dośvied — byŭ udzielnikam pieramoŭ z «Rucham». Dla ŭłady heta byŭ pieršy publičny dośvied znosinaŭ: ułada źjaviłasia na teleekranie pobač z apazycyjaj jak raŭnapraŭny ŭdzielnik. Kraŭčuk bolš mocny ŭ znosinach.
Kučma, naadvarot, byŭ maksymalna zakryty. Jamu ciažka davalisia znosiny z presaj, adnak u jaho byli mocnyja pres-sakratary.
U Juščanki pres-słužba pakul nie razhornuta. Apošni prykład: spačatku prezydent sam vychodziŭ i zabiraŭ zajavy ad ludziej, što stajać la budynku jaho Sakrataryjatu, ciapier pačali vychodzić jaho supracoŭniki. Ale heta pieršabytnaja forma znosinaŭ z narodam — niemahčyma, kab prezydent asabista va ŭsich zabiraŭ zajavy. Ciapier prydumana cełaje ŭpraŭleńnie, jakoje biare zajavy dy kaža: «Usie vašy prośby my a pałovie na dziaviatuju ranicy pieradajom prezydentu».
«NN»: Tym nia mienš, heta było važnaj častkaj imidžu Juščanki jak narodnaha lidera…
HP: Juščanka pryjšoŭ na ahromnistym uzdymie dy vielizarnych čakańniach nasielnictva. A čakańni — reč niebiaśpiečnaja. Bo Aranžavaja revalucyja pačałasia nie z pryčyny materyjalnych prablem. Niadaŭna była nadrukavana statystyka, adpaviedna jakoj letaś dabrabyt ukraincaŭ vyras bolš čym na 20%. Dyk što heta było? Byli parušanyja čakańni. Ludzi čakali, što pačnuć žyć lepiej, ale chutkaść palapšeńnia nie vytrymlivałasia. Heta abjektyŭny pakazčyk, jaki razdražniaje bolš za paharšeńnie stanovišča. Specyjalisty pa revalucyjach viedajuć: kali drennaje materyjalnaje stanovišča zachoŭvajecca dva hady, dyk ludzi na jaho ŭžo nie reahujuć — jany zvykajucca da jaho. A specyjalisty pa teraryźmie karystajucca terminam «zablakavanyja čakańni», jakija ŭ vyniku mohuć pryvieści da hvałtu.
«NN»: Jakaja pijar-akcyja ŭ časie Aranžavaj revalucyi była samaj paśpiachovaj i jakaja — samaj pravalnaj?
HP: Vielmi ŭdałasia cyrymonija Juščankavaha vyłučeńnia ŭ prezydenty. Jana adbyvałasia na Śpieŭnym poli, vyhladała jaskrava i nova. Janukoviča vyłučali pa-staromu, partyjna-haspadarča. A ŭ Juščanki była symbalična prademanstravana prysutnaść pradstaŭnikoŭ usich rehijonaŭ. Z hledzišča dramaturhii vielmi pryhoža — jon ź dziećmi, u atačeńni vialikaj kolkaści ludziej. Asnoŭnyja charaktarystyki pośpiechu vyłučeńnia Juščanki — masavaść, vidoviščnaść i estetyčnaść.
Što da niaŭdač, dyk, kali ŭžo raspačaŭsia Majdan, było ciažka ŭtrymlivać ludziej na peŭnym uzroŭni aktyŭnaści. Ad samaha pačatku stajała zadača aktyvizavać ludziej, a z druhoha boku —utrymać aktyŭnaść u peŭnych miežach. A zrabić heta składana, bo masy ludziej vielmi adnosna padparadkoŭvajucca kiravańniu. Sapraŭdy, pracavali hrupy psycholahaŭ, jakija vyciahvali ludziej, što «adchilalisia». Ale byŭ i inšy bok, arhanizavany słaba, — ludzi, jakija viartalisia z Majdanu dadomu. Ź imi taksama tearetyčna pavinny byli pracavać psycholahi. Vychodziła, što čałavieka ŭvodzili ŭ stan aktyŭnaści, ale vyvodzić adtul jaho nie było kamu. Tamu Majdan pracavaŭ u dvuch rehistrach: to jak palityčny mitynh, to jak rok-kancert.
Hutaryŭ Aleś Kudrycki
Kamientary