Zorki spryjali Łukašenku ŭ 2004 hodzie Małpy. 2006-ty hod Sabaki — nie jahony. Jon spryjaje narodžanym u hady Kania i Sabaki. Kali vieryć klasyčnaj astralohii, jon budzie dla Biełarusi hodam pieramienaŭ. Samy ž niebiaśpiečny praciŭnik dla Panny — Ryba. Asnovy astralohii vyvučaŭ Mikoła Bahdanovič.
Znaŭcy klasyčnaj astralohii davodziać, što čałaviek, jaki naradziŭsia ŭ peŭny hod ci miesiac, maje tolki jamu ŭłaścivyja rysy. Bo zorki, jak i hadavyja i šmathadovyja pryrodnyja cykły, nia mohuć nie ŭpłyvać na naradžeńnie i raźvićcio čałavieka.
Despatyčnyja pierachody
Napačatku pra znaki zadyjaka.
Pavodle astrolahaŭ, tyraničnyja rysy charaktaru najčaściej vyjaŭlajucca ŭ ludziej, narodžanych pad pierachodam z znaku na znak, na jakich adbilisia rysy adrazu dźviuch sumiežnych despatyčnych «žyviołaŭ». Heta ludzi, što naradzilisia ŭ 20-ch čysłach kožnaha miesiaca. Plus/minus niekalki dzion.
Najbolš niebiaśpiečnym ličycca pierachod z suzorja Avena ŭ Cialca (treciaja dekada krasavika). Na dumku viadomaha rasiejskaha astrolaha Siarhieja Vronskaha, ludzi, narodžanyja ŭ apošniaj dekadzie krasavika, «na redkaść hanarlivyja, samaŭlubionyja, cyničnyja, z prahaj pachvały. Jany naviazvajuć svaju volu, kapryzy i prychamaci, ehaistyčnyja, karyślivyja, žorstkija, biaźlitasnyja, niahnutkija, upartyja i bieskampramisnyja». Da takoha pierachodnaha znaku naležać Adolf Hitler (20.04.1889 daty naradžeńnia dajucca pavodle novaha stylu), Uładzimier Lenin (22.04.1870,), Zianon Paźniak (24.04. 1944), Uładzimier Žyrynoŭski (25.04.1946), Sadam Chusejn (28.04.1937).
U adnym šerahu z Čaŭšesku i Miłošavičam
Niebiaśpiečnym źjaŭlajecca despatyčny pierachod «Stralec—Kaziaroh» — Leanid Brežnieŭ (19.12.1906), Iosif Stalin (21.12.1879), Mao Dze-dun (26.12.1893) — a taksama pierachod «Kaziaroh—Vadaliŭ» — Eduard Ševardnadze (25.01.1928) dy Nikałaje Čaŭšesku (26.01.1918), što pryviali svaje krainy da ekanamičnaha kałapsu.
Prezydent Biełarusi naradziŭsia pry kancy žniŭnia (30.08.1954), kali dziejničaje pierachod «Leŭ—Dzieva». Da hetaha pierachodu naležać Napaleon Banapart (15.08.1769), car Ivan IV Žachlivy (25.08.1530), kiraŭnik HDR Erych Chonekier (25.08.1912), Słabadan Miłošavič (29.08.1941) dy rymski imperatar Kalihuła (31.08.12).
Aratary-Koni
Važnuju rolu ŭ losie čałavieka adyhryvaje i hod naradžeńnia. Tak, na dumku S.Vronskaha, ludzi, što naradzilisia ŭ hod Kania (1918, 1930, 1942, 1954, 1966, 1978), «majuć aratarski talent, lubiać vialikija vidoviščy i zabavy, imknucca być u centry ŭvahi i padziej, nikoha nia słuchajuć, robiać, što chočuć, na śviet hladziać tolki sa svajoj zvanicy, paśpiachovyja ŭ palitycy. Časam samaŭpeŭnienaść u ich źmianiajecca na niedavier da siabie, jaki vyklikaje ŭspyški hnievu i jaraści. Jany sapraŭdnyja ehaisty; mohuć rastaptać luboha, chto apyniecca na ich šlachu pieraškodaj; lubiać słuchać u svoj adras pachvału i adabreńnie; nietaktoŭnyja, vostryja na jazyk, ryzykoŭnyja i avanturnyja».
Karjernyja cykły
Astrolah Ryhor Kvaša ŭ «Cykličnym haraskopie» encyklapedyi haraskopaŭ «Znajdzi siabie pa znaku naradžeńnia» pajšoŭ dalej i vyznačyŭ navat karjernyja cykły dla kožnaha z hadoŭ.
Tak, z 12-hadovaha cykłu dla karjery vielmi važnyja svoj hod, dva supolnyja ź im (±4 i ±8 hadoŭ) i čatyry karmičnyja: karmičny hod (revalucyjny, pierałomny), hod adsutnaści słuhi (druhi karmičny), antykarmičny (samy paśpiachovy, ale śmiarotna niebiaśpiečny) i adsutnaści haspadara (druhi antykarmičny, niebiaśpiečny, ale dobry dla karjernaha prasoŭvańnia tych, u kaho karjera adstaje ad realnych mahčymaściaŭ i zdolnaściaŭ).
Konskija pośpiechi praviciela
Prailustrujem pryviedzienuju nižej tablicu. Prezydent Biełarusi naradziŭsia ŭ 1954 h. (hod Kania), staŭ deputatam parlamentu ŭ 1990 h. (hod Kania), kiraŭnikom dziaržavy — u hod Sabaki (1994), jaki naahuł spryjalny dla hadoŭ hetaj trojki «valevikoŭ» — Kania, Tyhra i Sabaki. 1996 hod (hod Pacuka) byŭ dla jaho karmičnym i moh abo «razdušyć» impičmentam, abo dać novyja dalahlady ŭłady jašče na 12 hadoŭ. Darečy, apošni referendum byŭ praviedzieny ŭ 2-hi antykarmičny hod Małpy (2004).
Analahičny los napatkaŭ kamunistyčnaha kiraŭnika Biełarusi Piatra Mašerava, jaki naradziŭsia ŭ hod Kania (26.02.1918). Hady Kania byli losavyrašalnymi ŭ karjery: u 1942 — kamandzir partyzanskaha atradu, u 1954 h. — druhi sakratar Mienskaha abkamu KPB, z 1966 h. — člen Prezydyjumu VS SSSR. U antykarmičny 1959 hod Kabana Mašeraŭ staŭ sakratarom CK KPB.
Pastki dla Kania
Varta taksama pamiatać, što druhi antykarmičny hod Małpy (1980, 1992, 2004) vielmi niebiaśpiečny dla Kania. U hady Małpy pamierli Mašeraŭ i prafesar Michaś Tkačoŭ (nar. u 1942 h., hod Kania, pamior u 1992 h.). Nastupny niebiaśpiečny hod dla ludziej, narodžanych u hod Kania — 2016.
Ale prezydent naradziŭsia taksama pad znakam Dzievy, a dla takich ludziej ujaŭlaje niebiaśpieku znak Rybaŭ, što raźmieščany jakraz nasuprać. Adličycie šeść miesiacaŭ.
Ryby-pieramožcy
Viktara Juščanku (23.02.1954), Michaiła Harbačova (02.03.1931), Vaisłava Kaštunicu (24.03.1944) jadnaje nia tolki toje, što jany prynieśli z saboj demakratyju. Usie jany naradzilisia blizu suzorja Ryby (20.02—21.03 ±3dni)! Pryčym Ryba-Harbačoŭ pryjšoŭ na źmienu Dzievie-Čarnienku, Ryba-Kaštunica —Dzievie-Miłošaviču.
Ryby choć i ličacca samym słabym znakam zadyjaku, ale, zdarajecca, sam Los vybiraje ich, kab pieramahčy bolš mocnych.
Jakija jany — ryby?
Ryby — infarmacyjny vodny znak. Jany miakkija, łahodnyja, ciarplivyja, piaščotnyja, ščyryja, ścipłyja, vielmi zyčlivyja i siabroŭskija, nia lubiać hvałtu i ździekaŭ, i ŭ adroźnieńnie ad inšych znakaŭ, nie padpadajuć pad despatyčnyja pierachody zadyjaku. Rybki bohabajaznyja, čaściej praŭdalubcy, starajucca nikoha nia kryŭdzić, hatovyja bieskaryśliva dapamahčy ludziam, apiekavać chvorych, starych i słabych, humannyja i altruistyčnyja. Za ŭsio heta ich i ščyra lubiać u narodzie.
Dobryja aratary, razumnyja, duchoŭna i intelektualna raźvityja, dabradušnyja i sumlennyja, ale adnačasova i słavalubivyja, što i šturchaje ich u palityku z vysakarodnym žadańniem stvaryć idealnaje, harmaničnaje, spraviadlivaje hramadztva. Bo jany — idealistyčnaha, relihijnaha, filazofskaha składu myśleńnia. Im adkryty nieviadomyja tajny pryrody i Suśvietu, astralohii, relihii, psychalohii i nietradycyjnaj medycyny. Kab usie byli «rybkami», nie było b vojnaŭ, bo jany nie trymajuć zła navat na vorahaŭ. U toj ža čas jany ŭpartyja, rašučyja i nastojlivyja ŭ dasiahnieńni vysakarodnaj mety. Mohuć stać zmaharami i abaroncami prahresiŭnych idej i hlabalnaj pierabudovy, achviarujučy zdaroŭjem i časam.
Fatalny deficyt Ryby
Tamu moža być pryčyna ŭ parazie vybaraŭ-2001 u tym, što ni Domaš (02.01.1950), ni Hančaryk (29.04.1940), ni Hajdukievič (08.09.1954) nie byli pavodle haraskopu Rybami? Mo pakul adzinym kandydatam ad apazycyi nia stanie «rybka», nijakija resursy j palittechnalohii nam nie dapamohuć? I varta zvažać nia tolki na palityčnyja zasłuhi pierad hramadztvam, a taksama i raźmiaščeńnie zorak?
Pavodle astrolahaŭ, nastupny, 2006-ty, hod Sabaki (1910, 1922, 1934, 1946, 1958, 1970, 1982, 1994) moža nieści revalucyjnyja pieramieny ŭ krainie, narodžanaj pad znakam Avena (25 Sakavika), a voś 2005 hod (Pieŭnia) dla revalucyj niespryjalny.
Hady Pieŭnia (1909, 1921, 1933, 1945, 1957, 1969, 1981, 1993) — davoli žorstkija, reakcyjnyja, hady naviadzieńnia «paradku», ź ciažkaj pracaj i pahrozaj biespracoŭja, ź ludźmi ŭ vajskovaj formie ŭ imia «paradku», z vysokaj stupieńniu złoŭžyvańniaŭ i złačynstvaŭ.
Zatoje 2005 hod spryjalny dla pryniaćcia važnych rašeńniaŭ, a nastupny, 2006-ty, — dla ich vykanańnia.
Šukajem Koniej, Tyhraŭ i Sabak
2006 hod spryjaje pieramoham ludziej, jakija naradzilisia ŭ cotny hod. Asabliva spryjalnym jon abiacaje być palitykam, narodžanym pad znakami Tyhra, Sabaki i Kania.
Kali vieryć klasyčnaj astralohii, niaprostym abiacaje być hety hod dla pretendenta na zvańnie «adzinaha kandydata», novaha lidera sacyjał-demakrataŭ Alaksandra Kazulina (25.11.1955 — Stralec-Kaza). Krychu bolej šancaŭ u partneraŭ pa kaalicyi «Dziasiatka» — Labiedźki (27.06.1961, Byk) i Šuškieviča (15.12.1934, Sabaka).
2006 hod najbolš spryjalny dla ludziej hadoŭ-«valevikoŭ»: Kania (1954, 1966), Sabaki (1958, 1970) i Tyhra (1950). Dla Tyhra hety budzie jašče i druhi antykarmičny hod — śmiarotna niebiaśpiečny i karjerny, jak dla Juščanki (hodu Kania) byŭ 2004-ty hod Małpy. Tamu, kali apazycyi karcić pajści pa ŭkrainskim varyjancie źmieny ŭłady, jak minimum, treba vyłučyć čałavieka, jaki naradziŭsia ŭ hod Tyhra abo Sabaki. I, pažadana, pad suzorjem Ryby. Nu i pažadana, kab jon byŭ nadziejnym čałaviekam i byŭ maładziejšym za siońniašniaha prezydenta.
Pavodle hetaha haraskopu, najlepšuju dla pieramohi kandydaturu treba šukać siarod ludziej, što naradzilisia miž 20.02—25.03(Ryby ź pierachodam uAviena) u hady Sabaki j Tyhra.
Hod Tyhra (1938, 1950, 1962) nadzialaje ludziej supraćlehłymi charaktarami — abo vielmi pazytyŭnym, abo vielmi admoŭnym.
Pieršyja — śmiełyja, samaachviarnyja i dobryja rycary honaru i spraviadlivaści, jakija nastojliva baroniać słabych, vysakarodnuju ideju i spravu.
Druhija — hanarystyja, samaŭpeŭnienyja, niastrymanyja, upartyja da naravistaści, uražlivyja, zapalčyvyja i razdražnialnyja, žorstkija, rezkija, kanfliktnyja i patrabavalnyja. Jany dobryja kiraŭniki, revalucyjanery, pravadyry, vajary; byvajuć ryzykoŭnyja da biezrazvažlivaści; uładalubivyja, bieskampramisnyja, ehaistyčnyja ŭ drobiaziach, ale bieskaryślivyja ŭ vialikim; nie spyniajucca pierad ranhami i hierarchijaj ułady; vystupajuć suprać kanservatyzmu, biurakratyzmu, palityčnaha dahmatyzmu i miaščanskaha składu myśleńnia; imknucca napierad da niedasiahnutaha.
Tavaryski typ samaŭlubiony, lubić być u centry ŭvahi i padziej, pachvału, liślivaść i pakazuchu. Zamknutamu typu nie chapaje samaŭpeŭnienaści, nieabchodny macniejšy partner. Zatoje ŭsie jany lubiać vidoviščy, stadyjony, mastactva i ŭsio modnaje. I mohuć pazbavić ad vialikich niaščaściaŭ, ad zładziejaŭ, chitrunoŭ i krucialoŭ.
Ludzi hodu Sabaki (1946, 1958, 1970) zaŭsiody na varcie: abaraniajuć inšych, zmahary za spraviadlivaść, viernyja, addanyja, ščyryja i spraviadlivyja; lubiać spraviadliva krytykavać; čepkija, viedajuć, jak zmahacca, i zmahańnie davodziać da pieramohi; vydatnyja arhanizatary i kiraŭniki, ludzi im daviarajuć; vysakarodnyja, vielikadušnyja, sumlennyja, dobrazyčlivyja, paśladoŭnyja, ciarplivyja i kłapatlivyja ŭ dačynieńni da padnačalenych, lubiać dahadžać ludziam; biez emacyjnych uspyšak; ścipłyja, zadavalniajucca tym, što majuć; abaviazkovyja; spačuvalnyja; z krytyčnym i lahičnym rozumam, intelektuały, filozafy i maralisty; askiety, jakim, adnak, nie prablema zarabić šmat hrošaj; pracavityja i pracazdolnyja.
Kandydaturu treba šukać najpierš siarod ludziej, što naradzilisia miž 20.02—24.03 (Ryby) u 1950 i 1962 hady Sabaki, ci, u horšym vypadku, u 1958 h. Tyhra.
Virtualny haraskop
Tablicu znakaŭ hetaha haraskopu možna pahladzieć na sajcie: abz.narod.ru i ŭ encyklapedyi Ryhora Kvašy, jakuju jon stvaryŭ, praanalizavaŭšy karjery tysiačaŭ ludziej.
Znaki virtualnaha haraskopu budujucca na spałučeńni viadomych zadyjakalnaha i hadavoha haraskopaŭ. Znak zadyjaka adkazny za plany, a hod — za mahčymaści ich ažyćciaŭleńnia.
Pavodle kitajskaha kalendara, hod Sabaki pačniecca 29 studzienia 2006 hodu. Tamu ŭ apazycyjnaha asiarodku jašče bahata času, kab adšukać «adzinaha».
U astralohiju i «sumiaščalnaść pa žyćci» možna vieryć ci nia vieryć. Adno fakt — pierš, čym hałasavać, treba daviedacca jak najbolš pra kandydataŭ.
Zaŭvahi i pytańni dasyłajcie na je-mail: [email protected].
Kamientary