Зніжэнне двухбаковага тавараабароту за апошнія два гады з 43 да 37 млрд. долараў ЗША (на 14%) было ў цэнтры ўвагі на сустрэчы прэм'ер-міністра Расіі Дзмітрыя Мядзведзева і яго беларускага калегі Андрэя Кабякова. Перамовы прайшлі 5 лютага ў падмаскоўных Горках.
«Апошнім часам, на жаль, намецілася пэўная тэндэнцыя: наш узаемны тавараабарот у сілу цэлага шэрагу аб'ектыўных, а можа, і суб'ектыўных акалічнасцяў пачаў крышку зніжацца… Мы павінны абмеркаваць, што з ім адбываецца, і намеціць меры, каб аднавіць і перавысіць тыя пікавыя значэнні, якія мелі зусім нядаўна», — заявіў Кабякоў, словы якога прыводзіць прэс-служба расійскага ўрада.
«У сувязі з гэтым я сказаў бы, што мы вельмі ўважліва назіраем за тым, што робіцца ў Расійскай Федэрацыі ў гэтай няпростай эканамічнай сітуацыі, — зазначыў ён. — Той план мерапрыемстваў, які распрацаваў урад Расіі і зараз зацвердзіў, актыўна абмяркоўваецца ў грамадстве, выпрацоўваюцца пэўныя меры па яго рэалізацыі. Нам гэта ўсё вельмі цікава, таму што мы (гэта наш канстытуцыйны абавязак) павінны на працягу месяца ўнесці праграму дзеянняў урада Рэспублікі Беларусь нашаму парламенту ў сувязі са зменай складу ўрада. Ну і наогул гэта нам вельмі важна, таму што сапраўды эканамічная сітуацыя ў Рэспубліцы Беларусь патрабуе таго, каб мы скаардынавалі нашы дзеянні, а ўзаемны тавараабарот нашых дзвюх краін такі, што вельмі вялікая ўзаемазалежнасць бакоў ад яго выніковасці».
Паводле слоў Кабякова, ён вельмі рады, што Мядзведзеў пагадзіўся з прапановай распрацаваць праграму скаардынаваных дзеянняў па забеспячэнні эканамічнага ўзаемадзеяння на двухбаковай аснове.
«Мы вельмі разлічваем, што здолеем падрыхтаваць гэты план, каб вышэйшыя службовыя асобы ў межах Вышэйшага дзяржсавета Рэспублікі Беларусь і Расійскай Федэрацыі змаглі, можа, яго ўжо і прыняць, калі ўрады паспеюць падрыхтаваць», — сказаў беларускі прэм'ер-міністр.
У праграме, растлумачыў ён, прадугледжаны шэраг сур'ёзных мер, каб ліквідаваць бар'еры па руху тавараў і паслуг ва ўзаемным гандлі. «Каб скарэктаваць нашы праграмы імпартазамяшчэння — гэта вельмі важна сёння. Каб мы ў большай ступені выкарыстоўвалі разлікі нацыянальныя ў сённяшнім тавараабароце. Пераадолелі фінансавыя пікі, якія ўзнікаюць у гэтых няпростых эканамічных умовах, узгаднілі макраэканамічную палітыку», — заявіў Кабякоў.
Дзмітрый Мядзведзеў нагадаў, што папярэдняе пасяджэнне саюзнага Саўміна адбылося ў Мінску ў кастрычніку мінулага года, і прапанаваў правесці наступнае ў першым паўгоддзі на тэрыторыі Расіі.
Рабочы візіт Кабякова ў Маскву праходзіць 5—6 лютага. Перамовы з Мядзведзевым у першы дзень насілі нефармальны характар. У другі дзень адбудзецца пасяджэнне Еўразійскага міжурадавага савета.
Як ужо паведамлялася, 8 лютага ў Сочы пройдзе сустрэча Уладзіміра Пуціна і Аляксандра Лукашэнкі.
Каментары