Украіна масіравана атакавала расійскія аэрадромы і знішчала бамбардзіровачную авіяцыю
Украіна адначасова нанесла ўдары па чатырох ваенных аэрадромах у Расіі. Пад атаку трапілі аэрадром «Дзягілева» ў Рязанскай вобласці, «Аленья» ў Мурманскай вобласці, «Белая» ў Іркуцкай вобласці і «Іванава» ў Іванаўскай вобласці. Усе гэтыя аб’екты з’яўляюцца важнымі стратэгічнымі базамі для расійскай вайсковай авіяцыі. Менавіта сёння ў РФ адзначаецца Дзень вайскова-транспартнай авіяцыі.
Масіраваныя атакі ўкраінскіх дронаў на расійскія ваенныя аэрадромы адбываюцца ў РФ. СБУ заявіла пра пашкоджанне больш за 40 самалётаў, у тым ліку А-50, Ту-95 і Ту-22 М3.
Ёсць паведамленні пра атаку на аэрадром «Аленья» ў Мурманскай вобласці. На гэтай базе дыслацыруюцца дальнія бамбардзіроўшчыкі Ту-22М3.
Таксама атакаваны аэрадром «Белая» ў Іркуцкай вобласці РФ, размешчаны ў 18 км на паўночны захад ад горада Усолье-Сібірскае. На гэтай базе дыслацыруецца 200-ы гвардзейскі бамбардзіровачны авіяцыйны полк, узброены бамбардзіроўшчыкамі Ту-22М3.
Гэта можа быць першым выпадкам, калі беспілотнікі атакавалі Сібір.
Па даных SHOT, некаторыя відавочцы сцвярджаюць, што з грузавіка, які стаяў на трасе, нібыта вылятаюць беспілотнікі. Імаверна, гаворка ідзе пра FPV-дроны-камікадзэ.
«Вар'яцтва. Украінскія вайскоўцы даставілі FPV-дроны да далёкіх аэрадромаў стратэгічнай авіяцыі Расеі ў Мурманскай і Іркуцкай абласцях. І там нечакана атакавалі бамбавікі і склады. Ужо зразумела, што мінімум тры самалёты сур'ёзна пашкоджаныя.
Пішуць, што дроны прыехалі на грузавіку, а затым нечакана для перавозчыка пачалі вылятаць адтуль. Траянская фура, атрымліваецца», — піша вайсковы эксперт Ян Мацвееў.
Паводле інфармацыі выдання «Бабель», у выніку гэтых атак пад ударам апынуліся больш за 40 расійскіх самалётаў, у тым ліку А-50, Ту-95 і Ту-22М3.
Гэтая спецаперацыя, якая атрымала назву «Павуціна», была праведзена Службай бяспекі Украіны. Згодна з ацэнкамі, страты расійскай авіяцыі могуць скласці больш за 2 мільярды долараў.
Такога дня расійская авіяцыя яшчэ не перажывала.
Заўтра, 2 чэрвеня, меў адбыцца чарговы раўнд украінска-расійскіх перамоваў у Стамбуле, на якіх Масква працягвае патрабаваць фактычнай капітуляцыі Украіны.
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА10
Каментары