«Ніякага дачынення не маем», — арганізацыя «Надзея» пра выпадак каля пасольства Беларусі ў Лондане
МЗС Беларусі у панядзелак заявіла пра напад на сваё пасольства і збіццё консула ў Лондане вечарам 19 снежня. У паліцыі Бі-бі-сі паведамілі аб затрыманні аднаго чалавека. Беларускія ўлады абвінавацілі ў нападзе беларускую ж дыяспару, яе прадстаўнікі заявілі, што не маюць да гэтага ніякага дачынення.
«Аднаму з супрацоўнікаў пасольства былі нанесеныя сур'ёзныя цялесныя пашкоджанні, спатрэбілася тэрміновая медыцынская дапамога. Ва ўстанове аховы здароўя дыягнаставаны пералом носа, страсенне мозгу лёгкай ступені і траўматычны пералом зуба», — зазначалася ва ўчорашняй заяве МЗС.
У праўладных тэлеграм-каналах з'явілася відэа на якім можна ўбачыць групу мужчын, якія сабраліся ля будынка ў лонданскім раёне Кенсінгтан. Адзін з іх патрабуе, каб Лукашэнка сышоў, чутная нецэнзурная лаянка. Самога моманту збіцця на відэа няма.
Днём 19 снежня каля будынка пасольства сапраўды праходзіла акцыя пратэсту, але яна завяршылася без здарэнняў і да інцыдэнту.
У нападзе МЗС Беларусі абвінаваціла «радыкальную эмігранцкую групоўку «Надзея»». Гаворка вядзецца пра супольнасць беларусаў у Вялікабрытаніі, якая выступае за спыненне рэпрэсій і новыя выбары ў Беларусі. У ёй налічваецца 600 чалавек.
У самой «Надзеі» Бі-бі-сі заявілі, што не маюць ніякага дачынення да інцыдэнту. «Мы асвятляем акцыі, але не з'яўляемся арганізатарам кожнай. Мы не ведаем, хто ўчыніў правакацыю — гэтым будзе займацца паліцыя і шукаць вінаватых людзей па камерах», — сказала адна з прадстаўніц супольнасці.
Яна дадала, што прыйшла ў жах ад гэтай навіны: «Гэтыя людзі [нападнікі] ніяк не адносяцца да нашага чата беларусаў у Вялікабрытаніі, але тым самым спрабуюць ачарніць слова «Надзея», нашу рэпутацыю ў Вялікабрытаніі».
У лонданскай паліцыі Бі-бі-сі сказалі, што ім паведамілі пра беспарадкі, якія адбываюцца каля пасольства Беларусі ў нядзелю каля 19.40 па мясцовым часе.
«Супрацоўнік [пасольства] паведаміў, што падвергся нападу і атрымаў траўму твару. Непадалёк быў затрыманы і ўзяты пад варту адзін мужчына», — заявілі ў паліцыі, дадаўшы, што падрабязнасці здарэння высвятляюцца.
Цяпер чытаюць
«Гэта была жывая камера сачэння». Што рабіла віцяблянка Кацярына, каб вызваліцца праз 5 гадоў замест прысуджаных 12 гадоў6
Каментары