Таксама часткова будзе абмежаваны ўезд грамадзянам сямі краін.
Прэзідэнт ЗША Дональд Трамп падпісаў указ аб забароне на ўезд у ЗША грамадзянам 12 краін Азіі, Афрыкі і Лацінскай Амерыкі і аб абмежаваннях на ўезд грамадзянам яшчэ сямі краін, піша Бі-бі-сі.
Уезд у ЗША забаронены грамадзянам Афганістана, М'янмы, Чада, Рэспублікі Конга, Экватарыяльнай Гвінеі, Эрытрэі, Гаіці, Ірана, Лівіі, Самалі, Судана і Емена.
Забарона ўступіць у сілу з 9 чэрвеня.
Часткова абмежаваны ўезд у ЗША грамадзянам Бурундзі, Кубы, Лаоса, Сьера-Леонэ, Тога, Венесуэлы і Туркменістана.
У відэазвароце з нагоды падпісання ўказа Дональд Трамп сказаў, што многія замежнікі, якія прыязджаюць у ЗША з краін, дзе нельга як след праверыць хадайніка аб візе, а таксама тыя, хто жывуць у ЗША з пратэрмінаванай візай, уяўляюць пагрозу для краіны.
«У XXI стагоддзі мы бачылі тэракт за тэрактам, учынены замежнікамі з пратэрмінаванымі візамі, з небяспечных месцаў з усяго свету», — сказаў Трамп.
Паводле слоў Трампа, у першы ж дзень свайго новага прэзідэнцкага тэрміну ён даручыў дзяржсакратару прааналізаваць, якія рэгіёны ўяўляюць у гэтым сэнсе найбольшую пагрозу для ЗША і да якіх трэба ўвесці абмежаванні.
«Усё вельмі проста: мы не можам дапускаць свабодную міграцыю з краін, дзе мы не можам упэўнена і дакладна праверыць тых, хто хоча ўехаць у Злучаныя Штаты», — патлумачыў Трамп.
Прэзідэнт паабяцаў, што чорны спіс будзе пераглядацца: калі ў нейкіх краінах сітуацыя палепшыцца, абмежаванні будуць змякчаныя, і наадварот — у спіс могуць быць дададзены новыя дзяржавы.
Дональд Трамп уводзіў забарону на ўезд грамадзянам некаторых краін яшчэ падчас свайго першага тэрміну — гэта было адно з першых яго рашэнняў на прэзідэнцкай пасадзе ў 2017 годзе.
Тады Трамп адмовіў у праве перасякаць мяжу ЗША грамадзянам Лівіі, Сірыі, Емена і Самалі. Пазней у спіс дадалі Паўночную Карэю, Венесуэлу і Чад.
Гэтая забарона шмат разоў аспрэчвалася ў судах, мадыфікавалася, але ў выніку ўстаяла — Вярхоўны суд ЗША большасцю ў адзін голас прызнаў яе адпаведнай Канстытуцыі.
Карэспандэнт агенцтва Reuters у Белым доме Джеф Мэйсан сказаў Бі-бі-сі, што адміністрацыя Трампа раней казала, што працуе над указам аб забароне на ўезд для грамадзян розных краін, і таму падпісанне не стала нечаканасцю.
«Пытанне ў тым, ці ўстаіць ён у судах», — Мэйсан упэўнены, што іскі абавязкова будуць, як і ў выпадку з указам 2017 года.
Цяпер чытаюць
Пракурор просіць для экс-памочніка Лукашэнкі Ігара Брыло 12 гадоў зняволення4
Каментары