Палітвязня Уладзіміра Кнігу асудзілі яшчэ да года зняволення за «непадпарадкаванне адміністрацыі калоніі»
За кратамі палітвязень роўна пяць гадоў, з 4 чэрвеня 2020 года.
У судзе Барысаўскага раёна асудзілі за «злоснае непадпарадкаванне законным патрабаванням адміністрацыі калоніі» (ч. 1 арт. 411 КК) палітзняволенага Уладзіміра Кнігу — яму прызначылі яшчэ адзін год зняволення. Людміла Зінкевіч вынесла прысуд 5 лютага 2025 года, але пра яго стала вядома толькі цяпер, піша «Вясна».
Гэта другая крымінальная справа за кратамі паводле гэтага артыкула супраць палітвязня. Пры гэтым Кніга з верасня 2023 года ўтрымліваецца ў рэжыме інкамунікада — ягонае месцазнаходжанне невядомае.
Вядома, што ў калоніі Уладзіміра змяшчалі ў ПКТ і рэгулярна выпісвалі новыя парушэнні. Акрамя гэтага, пазбавілі перадач, спатканняў і званкоў.
Былога сілавіка і валанцёра каманды «Краіна для жыцця» затрымалі 4 чэрвеня 2020 года. На судзе ён, як і ўсе, не прызнаў віну і заявіў, што падзеі 29 мая 2020 года на плошчы Савецкай у Гродне падчас збора подпісаў за Святлану Ціханоўскую — правакацыя сілавых ведамстваў Беларусі. Палітзняволены на судовым працэсе адзначаўся сваёй прынцыповасцю і нязломнасцю.
У выніку Уладзіміра асудзілі да чатырох гадоў калоніі паводле арт. 342 Крымінальнага кодэкса (арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх) і арт. 364 Крымінальнага кодэкса (гвалт альбо пагроза ўжывання гвалту ў дачыненні да супрацоўніка органаў унутраных спраў).
Адбываць тэрмін Уладзіміра Кнігу адправілі ў папраўчую калонію № 14 у Навасадах. Але ў хуткім часе палітвязню ўзмацнілі рэжым і змясцілі ў турму № 8. Вядома, што там яго больш за чатыры месяцы ўтрымлівалі ў ШІЗА. У ліпені 2023 года палітвязня асудзілі паводле арт. 411 КК (злоснае непадпарадкаванне законным патрабаванням адміністрацыі турмы) яшчэ да года калоніі.
Бяляцкі: Не трэба спяшацца адмяняць санкцыі. Бо гэта будзе ўспрынята рэжымам як яго перамога і слабасць Еўропы15
Каментары