Пра тое, што выдавецтва «Лімарыус» пачынае працэс афіцыйнай ліквідацыі, паведаміла выданню «Медыязона» яго дырэктар Марына Шыбко.
Выдавецтва «Лімарыус» выдавала шмат кніг па гісторыі і культуры Беларусі, у яго была цэлая серыя «Беларуская мемуарная бібліятэка», якой апекаваўся сярод іншых Аляксандр Фядута — адзін з абвінавачаных па справе аб «захопе ўлады» і замаху на Аляксандра Лукашэнку. Некаторыя кнігі выдавецтва, прысвечаныя літаратуры і гісторыі ХІХ стагоддзя, ён сам і рыхтаваў да друку.
Публікаваліся ў выдавецтве і ўласныя творы Фядуты, у тым ліку ўспаміны «Мой маленькі Парыж», напісаныя ў мінскай «амерыканцы» падчас адносна кароткатэрміновага арышту ў 2010—2011 гадах.
13 мая Міністэрства інфармацыі на тры месяцы прыпыніла працу выдавецтва. Прычынай ведамства назвала парушэнне пункта 3 артыкула 28 Закона «Аб выдавецкай справе». Паводле меркавання Мінінфарма, «Лімарыус» парушыў тэрмін паведамлення аб змене звестак, якія падлягаюць уключэнню ў Дзяржаўны рэестр выдаўцоў, вытворцаў і распаўсюджвальнікаў друкаваных выданняў.
Закрыццё выдавецтва «Лімарыус», як таксама і іншых беларускіх выдавецтваў, якія патрапілі пад палітычна матываваны рэпрэсіўны каток рэжыму цягам апошніх месяцаў — моцны і несумненна адмыслова разлічаны ўдар па беларускай нацыянальнай культуры.
Каментары