Пасол Украіны: «Калі ўкраінскія дзеці, жадаючы атрымаць візу ў дзяржавы ЭЗ, і ў далейшым будуць таньчыць перад консульствамі гэтых краінаў, працэс ратыфікацыі дамовы пра рэадмісію паміж Кіевам і Брусэлем можа быць ускладнены».
Так пасол Украіны пры ЭЗ Раман Шпэк пракамэнтаваў у чацьвер у Брусэлі паведамленьне аб пратэсьце дзіцячага калектыву «Дзеці Ўкраіны» перад консульствам Францыі ў Кіеве — паведаміла ўкраінская агенцыя UNIAN.
У панядзелак члены калектыву — які зьбіраўся ехаць у Францыю — пачулі ад дыпляматаў, што візы ім не дадуць. Прычыны рашэньня малым танцорам не патлумачылі. У аўторак «Дзеці Ўкраіны» зноў прыйшлі да будынку консульства. Гэтым разам у сцэнічных народных строях і з музычнымі інструмэнтамі. Акцыя доўжылася тры гадзіны.
«Урэшце працаўнікі францускага прадстаўніцтва папрасілі бацькоў, каб забралі сваіх дзяцей, бо тыя… нэрвавалі консула. Візы былі зробленыя ад рукі.Зноў без аніякіх камэнтароў», — паведаміў 5 Канал.
«Мяне зьдзіўляе, што ў Кіеве — сталіцы і месцы, багатым на традыцыі, дыпляматы пэўных эўрапейскіх дзяржаваў глядзяць з вокнаў сваіх консульстваў на выступы дзіцячых калектываў. Такія здарэньні аніякім чынам не павялічваюць аўтарытэту Эўразьвязу як узору дэмакратычных вартасьцяў для ўкраінскага грамадзтва — сказаў амбасадар Шпэк. — Гэтыя інцыдэнты небясьпечныя, бо дзеяньні некаторых консульстваў могуць ускладніць ратыфікацыю заключанай нядаўна дамовы пра рэадмісію паміж Украінай і ЭЗ. І ў гэтым выпадку адказнасьць за гэта будзе несьці ЭЗ».
Раней аналягічная сытуацыя здарылася перад консульствам Нямеччыны. Дзеці з хору з Харкава мусілі там засьпяваць, каб даказаць, што яны сапраўды ўдзельнікі хору. Іспыт быў здадзены пасьпяхова, і візы атрыманыя.
Каментары