Да двух гадоў пазбаўлення волі з канфіскацыяй маёмасці суд Чыгуначнага раёна Гомеля прыгаварыў 27-гадовага мясцовага жыхара. Мужчына абвінавачваўся паводле часткі 3 артыкула 205 Крымінальнага кодэкса (крадзеж, учынены ў буйным памеры).
Як паведамілі ў пракуратуры Чыгуначнага раёна Гомеля, абвінавачаны нідзе не працаваў, пастаянна займаўся крадзяжамі і рабаваннем, за што раней неаднаразова быў судзімы. У ліпені 2011 года вызваліўся з калоніі, але ўжо ў лістападзе ён учыніў першы крадзеж з інтэрната Гомельскага дзяржаўнага медыцынскага ўніверсітэта. Злодзей пранікаў у пакоі пры дапамозе набору адмычак. З месца злачынства выносіў, як правіла, невялікія рэчы, напрыклад, каштоўнасці, якія можна схаваць у кішэнях ці звычайным пакеце. За год злачынца ўчыніў некалькі крадзяжоў у інтэрнатах, абакраўшы нават пакой, дзе жылі супрацоўнікі міліцыі.
Толькі пасля правядзення следчых дзеянняў, якія выкрываюць яго ва ўчыненні злачынстваў, абвінавачаны пачаў даваць прызнаўчыя паказанні. Агульная сума ўрону, нанесенага пацярпелым, склала больш як 40 мільёнаў рублёў.
Каментары