У Вільні забілі намесніка дырэктара беларускай гімназіі
Цела Рамана Вайніцкага знайшлі ў падвале дома, у якім ён жыў.
Пра смерць Вайніцкага паведаміла Галіна Сівалава, дырэктарка беларускай гімназіі імя Скарыны ў Вільні. «Неймаверна, але праўда». Рамана знайшлі звязаным і замучаным: на целе былі сляды катавання. У яго быў заклеены рот. Апошнім часам яму нібыта пагражалі.
Паліцыя пачала расследаванне па факту забойства.
Сп. Галіна расказала, што раніцай у гімназію патэлефанавалі сямейнікі Рамана: спраўдзіць, ці на месцы ён. Бо ніхто не заўважыў, як ён пакінуў кватэру, а машына стаяла на месцы. Але на працы Вайніцкі не з’явіўся. Дома сямейнікі не знайшлі ключы ад падвала. Спусціліся і там знайшлі Рамана. Цела забрала паліцыя. Цяпер чакаецца прыезд крыміналістаў на кватэру да Вайніцкіх.
Раман Вайніцкі нарадзіўся ў 1960 годзе ў Вішневе на Валожыншчыне.
Узначальваў Згуртаванне беларускіх грамадскіх арганізацый Літвы (з 2009) і Клуб аматараў беларускай народнай творчасці «Сябрына». Быў намеснікам дырэктара па эканоміцы ў беларускай гімназіі імя Францішкі Скарыны. Таксама з'яўляўся намеснікам страшыні Рады нацыянальных абшчын пры Міністэрстве культуры Літвы.
Па словах сп. Сівалавай, менавіта Вайніцкі займаўся пытаннямі рамонту ў гімназіі, шукаў спонсараў для гэтага, а таксама дапамагаў выпускнікам паступаць у беларускія ВНУ.
У Рамана засталіся жонка і трое дарослых дзяцей: два сыны і дачка. Сыны скончылі беларускую школу, дачка — расійскую. Жывуць у Вільні.
У 2011 Раман Вайніцкі ад імя беларусаў Літвы заклікаў не ўводзіць эканамічныя санкцыі супраць Беларусі. А разгон мірнай акцыі дэманстрантаў пасля выбараў-2010 назваў «унутранай справай». Нягледзячы на розную ацэнку палітычнай сітуацыі ў нашай краіне, Вайніцкі браў удзел у некаторых мерапрыемствах Таварыства беларускай культуры Літвы, якое выступае супраць рэжыму Лукашэнкі.
Беларускі кладаўшчык са свастыкай на плячы лячыўся ад алкагалізму ў Сібіры і пайшоў ваяваць за Расію, а застаўся без выплат і працы11
Каментары