Настаўнікам дадаюць дзве гадзіны працы на тыдзень
Наколькі дзякуючы гэтаму павысіцца заробак, у Міністэрстве адукацыі пакуль не кажуць.
«Пакуль медыкі і настаўнікі не пачнуць самі сябе аптымізаваць, ніякіх высокіх заробкаў не можа быць. Мы ж дамовіліся з педагогамі: 18 гадзінаў на тыдзень стаўка. Ну, а калі падцягнуцца і зрабіць 20, ну зрабіце крок насустрач», — казаў Аляксандр Лукашэнка ў Пасланні да народа.
Праз тры месяцы Міністэрства адукацыі адрэагавала. Стаўка будзе 20 гадзінаў на тыдзень.
Гэта пацвярджаюць у Мінадукацыі: «З 18 да 20 гадзінаў. Мяркую, напрыканцы гэтага тыдня ці ў пачатку наступнага будуць гатовыя дакументы».
Атрымліваецца, настаўнік мусіў адпрацаваць 18 гадзінаў на тыдзень, каб атрымаць увесь заробак — стаўку. А цяпер трэба працаваць больш.
А пра падвышэнне заробкаў ніхто не кажа, — адразу гаворыць настаўніца гісторыі Марыя з Мінску.
«Каб я болей працавала і атрымоўвала столькі ж. Заробак не павялічваецца, толькі павялічваецца праца. А калі не буду забіраць гэтыя гадзіны, плаціць будуць меней.
Зараз у мяне заробак 2,8 мільёна рублёў», — тлумачыць настаўніца.
У раёнах і мястэчках яшчэ горш: дзяцей не хапае, а стаўку павышаюць. Цяпер настаўнікі будуць біцца за гадзіны, каб іх хапіла на заробак.
«У нас, каб набраўся клас, будуць класы аб’ядноўваць, бо трэба, каб было 20 чалавек. І настаўнікі будуць дзяліць гадзіны.А калі школа малакамплектаваная, напрыклад, два педагогі і паміж імі трэба будзе дзяліць гадзіны. А стаўкі не хопіць…», — кажа настаўніца з Віцебскай вобласці.
І дадае, што цяпер давядзецца выдумваць дадатковыя ўрокі:
«Прыйдзецца ствараць нейкія гурткі ці факультатывы, каб дабраць гэтыя гадзіны. А заробак наўрад ці ўздымуць…»
У адміністрацыі сталічнай школы заробак настаўнікаў лічаць дастатковым.
«Па лістках педагогаў я не скажу, што гэта самы нізкі заробак. Добры заробак!» — упэўніваюць у школе.
Паводле Белстату, сярэдні заробак настаўнікаў за травень складае 3 мільёны 486 тысяч рублёў.Для параўнання: сярэдні заробак па Мінску за травень — больш за 6 мільёнаў рублёў.
Цяпер чытаюць
«Дыялект падазроны». Спявак Сярога прыйшоў на расійскае рэаліці і сабраў усіх хэйтараў1
Каментары