У сацсетках штодня з'яўляюцца дзясяткі фотаздымкаў з поўнымі кошыкамі.
Якія грыбы лезуць?
Грыбнікі з Лагойскага, Лідскага і Брэсцкага раёнаў пішуць, што пракінуліся лісічкі.
Каля Суціна (Пухавіцкі р-н), пішуць, «лісічак цьма», а пад Лагойскам сям'я за некалькі гадзін сабрала 58 кілаграмаў.
Першыя баравікі паказаліся ў Лідскім і Докшыцкім раёнах, паміж станцыямі Пралескі і Вязынка пад Мінскам і ў Клічаўскім раёне. У ваколіцах Варапаева на Віцебшчыне грыбнікі кажуць, што ўжо пайшлі і чырвонагаловікі.
Але ўсё пакуль нераўнамерна і месцамі. У адных лясах кошыкі напаўняюцца за пару гадзін, у другіх за той жа час набярэш жменьку на суп.
А па чым грыбы на рынках і сайтах?
За пяцілітровае вядро лісічак прадаўцы просяць каля 25 рублёў, за дзесяцілітровае — каля 50 рублёў.
Ёсць людзі, якія штодня паказваюць свае знаходкі і дзеляцца парадамі.
Некаторыя беларусы праз сацсеткі знаходзяць кампанію для паездак у лес. Адна з карыстальніц Threads шукала чалавека з аўтамабілем, каб разам паехаць у грыбы, але ў выніку вакол гэтай ідэі ўтварыўся цэлы чат. А гэтыя людзі паехалі разам, а пасля зладзілі пікнік.
Тамада і шансанье з Барысава Аляксандр Чорны выклаў ролік з паходу ў грыбы ў вышыванцы і заадно пакінуў у ім свой кантактны нумар — разлічвае, што грыбы дапамогуць яму знайсці новых кліентаў.
Грыбы пайшлі і ў мясцінах, дзе жывуць беларусы Літвы і Польшчы.
Беларускі пісьменнік з Падляшша Міхал Андрасюк падзяліўся фотаздымкамі баравікоў. Праўда, адзін са здымкаў — паляна, густа ўсыпаная баравікамі, — выклікаў спрэчкі ў каментарыях. Некаторыя карыстальнікі западозрылі, што кадр створаны штучным інтэлектам. Аўтар пажартаваў: «Калі такая паляна дзесьці сапраўды існуе, то няхай яе знойдзе не хто іншы, як толькі Міхал».
Нават брэнды ўключыліся
Грыбны сезон не абмінулі і кампаніі. Гродзенскі «Гродфуд» апублікаваў у сацсетках кошык з лісічкамі, нож і банку сваёй тушонкі з подпісам: «Ціхае паляванне. З лёгкім перакусам».
Але галоўнае правіла сапраўднага грыбніка застаецца нязменным: паказаць поўны кошык можна, а вось расказаць пра месца іх збору — ніколі.
Цяпер чытаюць
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім14
Каментары