Дэлегаты З'езда беларусаў свету заклікалі ўлады вызваліць палітвязняў
Дэлегаты VI з’езда беларусаў свету, які праходзіць у Мінску 23–24 ліпеня пад эгідай міжнароднай грамадскай арганізацыі «ЗБС «Бацькаўшчына», заклікалі ўлады Беларусі вызваліць палітвязняў.
Пра гэта гаворыцца ў прынятай сёння на з’ездзе калектыўнай заяве «Аб акце добрай волі».
Дакумент выклікаў пратэст з боку групы дэлегатаў, пераважна з Украіны, якія аргументавалі сваю пазіцыю тым, што «гэта — унутраная справа Рэспублікі Беларусь». Пытанне выклікала бурнае абмеркаванне, аднак толькі восем чалавек выказаліся за зняцце гэтай заявы з парадку дня.
У заяве гаворыцца пра тое, што клопат грамадзян пра будучыню сваёй краіны — гэта натуральная з’ява, якая годная пашаны і павагі.«Натуральным з’яўляецца тое, што не ўсе людзі аднолькава ацэньваюць розныя дзеянні ўлады, у першую чаргу тыя, якія тычацца пытанняў унутранай і замежнай палітыкі, перспектыў захавання незалежнасці краіны», — адзначаецца ў дакуменце.
Яго аўтары падкрэсліваюць: «Моцная ўлада, упэўненая ў сваёй праваце, вядзе дыялог са сваімі палітычнымі апанентамі».
«На жаль, у Беларусі і сёння ёсць людзі, пазбаўленыя волі за свае палітычныя перакананні, якія не супадаюць з афіцыйным меркаваннем, і не маюць магчымасці ўдзельнічаць у такім дыялогу», — адзначылі аўтары заявы, дадаўшы, што міжнародная супольнасць называе такіх людзей палітычнымі вязнямі.
«У пабудове моцнай незалежнай Беларусі вельмі важнымі з’яўляюцца адзінства нацыі, разуменне ўсімі грамадзянамі каштоўнасцяў дэмакратыі і суверэнітэту,-сказана ў прынятым дакуменце. — Улада павінна аб’ядноўваць людзей, быць справядлівай і добразычлівай да ўсіх грамадзян краіны незалежна ад іх палітычных поглядаў. Жорсткасць ня будуе, а разбурае».
«Мы заклікаем улады Беларусі зрабіць акт добрай волі і вызваліць з месцаў зняволення людзей, якія знаходзяцца там у пакаранне за свае палітычныя перакананні.Мы ўпэўненыя, што такія дзеянні кіраўніцтва краіны будуць пазітыўна ацэнены народам Беларусі і міжнароднай супольнасцю», — рэзюмавалі аўтары заявы.
-
У Варшаве замежнікаў правяралі «патрульныя» ў форме, якія не маюць дачынення да дзяржаўных органаў
-
Беларуска знайшла італьянскую сям’ю, якая прыняла яе пасля Чарнобыля. Яна думала, што італьянцы яе кінулі
-
21‑гадовага хлопца са Светлагорска пасадзілі за палітыку. Хлопец жыў у дзетдоме, а нядаўна сам стаў бацькам
Каментары