У студзені-ліпені істотны (гэта значыць больш чым 100 млн. даляраў) рост экспарту назіраўся толькі па адной таварнай пазіцыі — малочных прадуктах, сведчаць даныя афіцыйнай статыстыкі.
Так, у студзені-ліпені Беларусь паставіла на знешнія рынкі малака і вяршкоў згушчаных і сухіх на 499,9 млн. даляраў, што на 216,2 млн. даляраў больш у параўнанні з аналагічным леташнім перыядам.
Па асноўных таварных пазіцыях, на якія летась прыпадала больш як палова беларускага экспарту, сёлета назіраецца зніжэнне паставак на знешнія рынкі. У прыватнасці экспарт нафтапрадуктаў у грашовым выражэнні склаў у студзені-ліпені гэтага года 6,8 млрд. долараў і знізіўся ў параўнанні з аналагічным леташнім перыядам на 2,9 млрд. даляраў.
Пастаўкі беларускіх растваральнікаў на знешнія рынкі склаліся на ўзроўні 1,2 млн. даляраў і рэзка скараціліся ў параўнанні з аналагічным леташнім перыядам — на 2,77 млрд. даляраў.
Практычна спыніўся і экспарт змазачных матэрыялаў: з 1 млрд. даляраў у студзені-ліпені 2012 года да 7,1 млн. даляраў за аналагічны леташні перыяд.
Экспарт беларускіх калійных угнаенняў у студзені-ліпені склаў 1,47 млрд. даляраў і знізіўся ў параўнанні з аналагічным леташнім перыядам на 321 млн. даляраў.
Адбылося істотнае зніжэнне экспарту грузавых аўтамабіляў, які ў студзені-ліпені гэтага года зменшыўся на 277 млн. даляраў і склаў 638,8 млн.
Трактароў і седлавых цягачоў Беларусь экспартавала ў студзені-ліпені на 633,1 млн. даляраў, што на 222,7 млн. даляраў менш у параўнанні з аналагічным леташнім перыядам.
Як паведамлялася раней, Беларусь у жніўні 2012 года спыніла экспарт растваральнікаў і змазачных матэрыялаў. На гэты крок кіраўніцтва краіны пайшло па патрабаванні Расіі, якая стала падазраваць, што Беларусь пад выглядам растваральнікаў і змазачных матэрыялаў пастаўляе на знешнія рынкі нафтапрадукты, што дазваляла краіне не пералічваць пошліны ў расійскі бюджэт.
Зніжэнне беларускага экспарту сёлета абумоўленае таксама скарачэннем паставак прадукцыі машынабудавання на знешнія рынкі збыту. Па даных вытворцаў, праблемы са збытам беларускай прадукцыі машынабудавання звязаныя з увядзеннем у Расіі новага экалагічнага стандарту Еўра-4.
Змяншэнне экспарту беларускіх калійных угнаенняў у грашовым выражэнні абумоўленае зніжэннем сусветных цэн на гэтую прадукцыю ў параўнанні з мінулым годам.
Каментары