Урад прапануе абкласці кожны аўтамабіль падаткам 500 тысяч рублёў
Гэта будзе пошліна за допуск аўтамабіля да дарожнага руху.
Палата прадстаўнікоў пачала разгляд праекта рэспубліканскага бюджэта на 2014. Сярод патрабаванняў МВФ і ЕўрАзЭС – бездэфіцытнасць гэтага дакумента.
Плануемыя выдаткі складаюць каля $22 мільярдаў. Напрыклад, толькі на абслугоўванне вонкавага дзяржаўнага доўга давядзецца аддаць больш за $1 мільярд.
Дацягнуць даходы да узроўню выдаткаў складана. Урад напланаваў атрымаць $2 мільярды ад прыватызацыі, а таксама прапанаваў некалькі незвычайных новаўвядзенняў.
Па-першае,
нарэшце сфармуляваныя палажэнні «падатка на дармаедаў», пра магчымасць увядзення якога казаў прэм’ер-міністр Міхаіл Мясніковіч.
У Беларусі пражывае каля 5,85 мільёна насельніцтва працаздольнага ўзросту – гэта падлікі па выніках апошняга перапісу. З іх у эканоміцы краіны занятыя 4,53 мільёна чалавек.
Астатнія нідзе не працуюць – гэта і афіцыйна зарэгістраваныя беспрацоўныя, і студэнты, і інваліды. Аднак сярод іх урад налічыў 445 тысяч чалавек, якія «фактычна паразітуюць на сацыяльнай палітыцы дзяржавы». Гэта цытата дзяржаўнай прапаганды.
І вось з гэтых людзей вырашана ўзяць грошы. Паводле словаў прадстаўніка міністэрства фінансаў Святланы Крэтавай,
прапануецца ўвесці штогадовы збор у памеры 20 базавых велічыняў. На сёння гэта 2,6 мільёна рублёў.
Калі б усе цяперашнія «дармаеды» заплацілі падатак, бюджэт мог быць атрымаць дадатковыя $125 мільёнаў. Зрэшты, нішто не перашкодзіць ім запісацца ў афіцыйныя беспрацоўныя, тым самым папсаваўшы статыстыку, і нават атрымліваць дзяржаўную дапамогу.
Другое плануемае новаўвядзенне закране яшчэ большую колькасць беларусаў.
Гэта будзе «пошліна за допуск аўтамабіля да дарожнага руху». З кожнага аўтамабіліста дзяржава хоча ўзяць па 3-5 базавых велічыняў на год – 390-650 тысяч рублёў.
Па словах прадстаўніка міністэрства фінансаў Алега Селіверстава, плацёж будзе разовым і сплачвацца як з грузавікоў, так і з легкавікоў.
На пачатак года ў краіне было зарэгістравана 3 818 тысяч транспартных сродкаў. Калі б уласнікі кожнага з іх сплацілі па 500 тысяч рублёў, дзяржава б атрымала каля $200 мільёнаў.
Каментары