Нацыянальны акадэмічны канцэртны аркестр Беларусі выступіць на свяце камернай музыкі «Вяртанне Паўночных Афінаў», прысвечаным кампазітару Міхаілу Клеафасу Агінскаму. Мерапрыемства пройдзе 25 верасня ў мястэчку Залессе (Смаргонскі раён, Гродзенская вобласць).
Аб гэтым на прэс-канферэнцыі 8 верасня ў Мінску паведаміў дырэктар — мастацкі кіраўнік аркестра Міхаіл Фінберг.
Паводле яго слоў, на сёння аркестр стаў ініцыятарам больш чым 190 розных фестываляў у малых гарадах і мястэчках Беларусі. На гэты раз фестывальнае дзеянне пройдзе ў Залессі — там, дзе дыпламат, грамадскі, палітычны дзеяч і кампазітар XIX стагоддзя Міхаіл Клеафас Агінскі пабудаваў сваю сядзібу.
Для свята «Вяртанне Паўночных Афінаў» была распрацавана спецыяльная музычная праграма, практычна цалкам складзеная з малавядомых у Беларусі твораў кампазітара. Навуковым кіраўніком пры распрацоўцы праграмы стала Вольга Дадзіёмава, доктар мастацтвазнаўства, прафесар Беларускай дзяржаўнай акадэміі музыкі.
Дадзіёмава ў сваю чаргу заявіла, што дзейнасць канцэртнага аркестра ў галіне «вяртання музычнай спадчыны», яго ўвага да класічных кампазітараў, на імёны якіх Беларусь мае права прэтэндаваць нароўні з іншымі еўрапейскімі краінамі, шмат у чым актывізавалі працу вучоных і даследчыкаў. У выніку іх дзейнасці стала вядома, напрыклад, нашмат больш твораў Агінскага, у тым ліку песні і рамансы, уверцюры да балетаў і нават оперны твор.
Канцэпцыя свята «Вяртанне Паўночных Афінаў» і шэраг арганізацыйных момантаў яшчэ абмяркоўваюцца, адзначыў намеснік старшыні Залескага райвыканкама Генадзь Бычко. Так, паводле яго слоў, разглядаецца варыянт правесці гэтае музычнае свята ва ўнутраным дворыку сядзібы Агінскіх, устанавіўшы там сцэну і крэслы. «Чалавек трыста гэта тэрыторыя зможа ўмясціць, а каму месца не хопіць, той зможа паслухаць стоячы на мяжы паркавай зоны пры сядзібе», — сказаў чыноўнік.
Гэты варыянт канцэпцыі прадугледжвае невялікае тэатралізаванае дзеянне, якое змогуць паказаць акцёры Маладзечанскага тэатра, а таксама выставу з калекцый Дзяржаўнага музея гісторыі тэатральнай і музычнай культуры ў Мінску. Гэтыя мерапрыемствы прапаноўваецца правесці непасрэдна ў сядзібе Агінскіх.
«Аднак пакуль гэта толькі адзін з варыянтаў канцэпцыі», — паўтарыў Бычко.
Цяпер чытаюць
Каб не плаціць падатак на сабак, мінчукі пачалі здаваць іх у пункты адлову25
Каментары