Трагедыя адбылася раніцай 10 студзеня каля вёскі Мількавічы. Кіроўца Kia Sportage ехаў з боку Навагрудка ў напрамку Ліды і ўрэзаўся ў Nissan. Ад удару пазадарожнік «Кія» выкінула на сустрэчную паласу, дзе аўто сутыкнулася з Volkswagen Golf. У «Фальксвагене» ехалі пяцёра чалавек. Двое загінулі адразу, яшчэ двое пазней. Сяргей перавозіў у той дзень на грузавіку прадукты з Баранавіч у Ліду. Ён стаў сведкам страшнай аварыі.
«Там пад’ём ідзе. На сярэдзіне пад’ёму мяне абагнала тая «Кія». Я яшчэ пра сябе адзначыў, што кіроўца для такіх дарожных умоў упэўнена ехаў: дарога была нячышчанай, усё белае — у снезе. А пасля пад’ёму пачынаецца плаўны доўгі спуск. І метраў за 300 наперадзе заўважыў, што «Кія» вільнула: зразумеў, што нешта здарылася. Уключыў аварыйку».
Сяргей пад’ехаў да машын, спыніўся.
У тым месцы, хоць і блізка да горада, адсутнічае мабільная сувязь. Давялося спыніць самазвал, што ехаў у Навагрудак, каб той выклікаў медыкаў.
«Я падбег да «Фальксвагена»: кіроўцу проста сплюшчыла. Такі дагледжаны мужчына, з кароткай стрыжкай, гладка паголены. Але не азываўся — мёртвы. Я тады адчыніў заднія правыя дзверцы: выйшла маладая дзяўчына. У яе быў твар пасечаны, у крыві. Яна маўчала. Абышоў і адчыніў заднія левыя дзверцы — выйшаў мужчына: у яго твар быў напухлы пасля ўдару».
Дваіх пасажыраў «Фальксвагена» пасадзілі на спадарожныя машыны да Навагрудка. Калі прыехалі медыкі, з задняга сядзення «немца» вылез яшчэ адзін мужчына. Ён сам лёг на насілкі, яго паклалі ў «хуткую». «А затым кажуць: «Ён памёр у машыне…» А ў інтэрнэце я прачытаў, што ў бальніцы памёр і другі мужчына. Адразу жывых было трое, цяпер толькі адзін».
Калі прыехалі ратавальнікі і зрэзалі дах у «Фальксвагене», побач з кіроўцам убачылі яшчэ аднаго загінулага мужчыну.
Кіроўца «Кіі» не пацярпеў. «У яго была толькі напухлая скула. Ён таксама ўвесь час маўчаў. Такі салідны мужчына. Гума на машыне ў яго была дарагая… Дарога была ніякая — усё белае. Краю нават не відаць. А пад снегам быў лёд. Амаль усе машыны ехалі па сярэдзіне дарогі: левымі коламі ехалі па цэнтры — практычна толькі тры каляіны».
Пазней высветлілася, што мужчыны з «Фальксвагена» былі кіроўцамі-прафесіяналамі: займаліся перавозкай небяспечных грузаў. І ў той дзень кіраваліся на курсы павышэння кваліфікацыі з Ліды ў Баранавічы.
У дачыненні да вадзіцеля Kia Sportage Следчым камітэтам распачата крымінальная справа за парушэнне ПДР, што пацягнула па неасцярожнасці смерць чатырох асоб.
Цяпер чытаюць
Як выглядае стылёвы дом новай рэктаркі Акадэміі мастацтваў коштам паўмільёна даляраў19
Як выглядае стылёвы дом новай рэктаркі Акадэміі мастацтваў коштам паўмільёна даляраў
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі1212
Каментары