Pad Navahrudkam raźbilisia kiroŭcy-prafiesijanały
Trahiedyja adbyłasia ranicaj 10 studzienia kala vioski Milkavičy. Kiroŭca Kia Sportage jechaŭ z boku Navahrudka ŭ napramku Lidy i ŭrezaŭsia ŭ Nissan. Ad udaru pazadarožnik «Kija» vykinuła na sustrečnuju pałasu, dzie aŭto sutyknułasia z Volkswagen Golf. U «Falksvahienie» jechali piaciora čałaviek. Dvoje zahinuli adrazu, jašče dvoje paźniej. Siarhiej pieravoziŭ u toj dzień na hruzaviku pradukty z Baranavič u Lidu. Jon staŭ śviedkam strašnaj avaryi.
«Tam padjom idzie. Na siaredzinie padjomu mianie abahnała taja «Kija». Ja jašče pra siabie adznačyŭ, što kiroŭca dla takich darožnych umoŭ upeŭniena jechaŭ: daroha była niačyščanaj, usio biełaje — u śniezie. A paśla padjomu pačynajecca płaŭny doŭhi spusk. I mietraŭ za 300 napieradzie zaŭvažyŭ, što «Kija» vilnuła: zrazumieŭ, što niešta zdaryłasia. Uklučyŭ avaryjku».
Siarhiej padjechaŭ da mašyn, spyniŭsia.
U tym miescy, choć i blizka da horada, adsutničaje mabilnaja suviaź. Daviałosia spynić samazvał, što jechaŭ u Navahrudak, kab toj vyklikaŭ miedykaŭ.
«Ja padbieh da «Falksvahiena»: kiroŭcu prosta spluščyła. Taki dahledžany mužčyna, z karotkaj stryžkaj, hładka paholeny. Ale nie azyvaŭsia — miortvy. Ja tady adčyniŭ zadnija pravyja dźviercy: vyjšła maładaja dziaŭčyna. U jaje byŭ tvar pasiečany, u kryvi. Jana maŭčała. Abyšoŭ i adčyniŭ zadnija levyja dźviercy — vyjšaŭ mužčyna: u jaho tvar byŭ napuchły paśla ŭdaru».
Dvaich pasažyraŭ «Falksvahiena» pasadzili na spadarožnyja mašyny da Navahrudka. Kali pryjechali miedyki, z zadniaha siadzieńnia «niemca» vylez jašče adzin mužčyna. Jon sam loh na nasiłki, jaho pakłali ŭ «chutkuju». «A zatym kažuć: «Jon pamior u mašynie…» A ŭ internecie ja pračytaŭ, što ŭ balnicy pamior i druhi mužčyna. Adrazu žyvych było troje, ciapier tolki adzin».
Kali pryjechali ratavalniki i zrezali dach u «Falksvahienie», pobač z kiroŭcam ubačyli jašče adnaho zahinułaha mužčynu.
Kiroŭca «Kii» nie paciarpieŭ. «U jaho była tolki napuchłaja skuła. Jon taksama ŭvieś čas maŭčaŭ. Taki salidny mužčyna. Huma na mašynie ŭ jaho była darahaja… Daroha była nijakaja — usio biełaje. Kraju navat nie vidać. A pad śnieham byŭ lod. Amal usie mašyny jechali pa siaredzinie darohi: levymi kołami jechali pa centry — praktyčna tolki try kalainy».
Paźniej vyśvietliłasia, što mužčyny z «Falksvahiena» byli kiroŭcami-prafiesijanałami: zajmalisia pieravozkaj niebiaśpiečnych hruzaŭ. I ŭ toj dzień kiravalisia na kursy pavyšeńnia kvalifikacyi ź Lidy ŭ Baranavičy.
U dačynieńni da vadziciela Kia Sportage Śledčym kamitetam raspačata kryminalnaja sprava za parušeńnie PDR, što paciahnuła pa nieaściarožnaści śmierć čatyroch asob.
Palaki kuplajuć damy ŭ Biełarusi — cikaviacca, ci chopić na žyćcio jeŭrapiejskaj piensii, i radujucca śmiešnym vydatkam9
Kamientary