Сікорскі пра магчымы напад расіян на Польшчу: Яны нешта рыхтуюць, гэтак сама, як гэта было перад уварваннем ва Украіну
«Мы не можам выключаць, што, хоць Пуцін і не здольны перамагчы, ён усё роўна можа прыняць яшчэ адно падобнае рашэнне».
Кіраўнік МЗС заявіў, што Польшча сур’ёзна ставіцца да пагроз з Масквы, хаця не панікуе, піша «Еўрапейская праўда».
«Занепакоенасць ёсць, бо Пуцін напаў на Украіну, грунтуючыся на аптымістычных і цалкам памылковых ацэнках. Ён выклікаў велізарныя чалавечыя пакуты і сур’ёзныя эканамічныя страты па ўсёй Еўропе, прыняўшы гэта вар’яцкае і злачыннае рашэнне аб уварванні ва Украіну. Таму мы не можам выключаць, што, хоць ён і не здольны перамагчы, ён усё роўна можа прыняць яшчэ адно падобнае рашэнне», — сказаў Сікорскі.
Міністр каментаваў інфармацыю брытанскай газеты The Telegraph пра тое, што Злучаныя Штаты нібыта перадалі Варшаве папярэджанне аб магчымай узброенай правакацыі Расіі супраць Польшчы, каб «выпрабаваць рашучасць НАТА».
Чыноўнік сказаў, што не можа ні пацвердзіць, ні абвергнуць гэтую інфармацыю, але «навіна паходзіць з аўтарытэтнага выдання, таму, імаверна, яна праўдзівая».
Ён выказаў спадзяванне, што выкрыццё намераў Расіі змусіць яе адмовіцца ад гэтых планаў.
«Менавіта таму мы пасылаем расіянам сігнал:
мы ведаем, што яны нешта рыхтуюць, гэтак сама, як гэта было перад уварваннем ва Украіну. І, загадзя выкрываючы іх намеры, я спадзяюся, што нам удасца пераканаць іх адмовіцца ад сваёй агрэсіўнай пазіцыі», — дадаў чыноўнік.
У той жа час Сікорскі ўпэўнены, што Масква не мае дастаткова рэсурсу для нападу на Польшчу.
«Калі расіяне нам пагражаюць, мы ўспрымаем гэтыя пагрозы сур’ёзна. Але сёння Пуцін не мае сродкаў, каб напасці на нас: хутчэй за ўсё, ён можа паспрабаваць зладзіць нейкую правакацыю. Яму да гэтага часу не ўдалося заваяваць Данбас пасля амаль трынаццаці гадоў спроб», — падкрэсліў кіраўнік польскага МЗС.
Разам з тым Сікорскі выказваў думку, што Расія арганізуе «аперацыю пад чужым сцягам», каб апраўдаць напад на краіну-члена НАТА.
Прэм’ер-міністр Польшчы Дональд Туск заявіў пра асцярогі адносна магчымай расійскай правакацыі, мэтай якой з’яўляецца «выпрабаваць рашучасць НАТА».
Перад гэтым латвійская разведка таксама паведаміла, што Расія рыхтуе магчымыя правакацыі супраць краін Балтыі або Польшчы, у прыватнасці атакі з выкарыстаннем беспілотнікаў і іншыя гібрыдныя дзеянні, каб змусіць краіны НАТА спыніць падтрымку Украіны.
Цяпер чытаюць
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй40
Каментары