З пачатку 2015 года і па стане на 17 лютага інфляцыя ў Беларусі склала 3,3%.
Пра гэта паведаміў прэм'ер-міністр Андрэй Кабякоў, прадстаўляючы 25 лютага праграму дзейнасці ўрада на пасяджэнні шостай пазачарговай сесіі палаты прадстаўнікоў.
Ён зазначыў, што, нягледзячы на дэвальвацыю, дзяржава здолела абмежаваць інфляцыйныя працэсы. «Дзякуючы рашэнням урада і прэзідэнта, жорсткай грашова-крэдытнай палітыцы была стрыманая інфляцыйная хваля. Рост спажывецкіх цэн па стане на 17 лютага склаў з пачатку года 3,3% пры аслабленні беларускага рубля за гэты перыяд на 25%», — сказаў прэм'ер.
Ён падкрэсліў, што ў Беларусі тэмпы інфляцыі ніжэйшыя, чым у Расіі і Украіне — асноўных гандлёвых партнёрах.
Паводле афіцыйнага прагнозу, інфляцыя ў 2015 годзе запланаваная на ўзроўні 12%. У той жа час Нацыянальны банк у канцы студзеня паведаміў, што з улікам дэвальвацыі беларускага рубля інфляцыя сёлета прагназуецца на ўзроўні 16—20%.
Андрэй Кабякоў таксама даў зразумець, што дзяржава захавае кантроль за цэнамі. «Ажыццяўленне жорсткага кантролю за цэнамі, спыненне любых, нават самых нязначных, спекуляцый у гэтай сферы — гэта ключавая задача ўрада. Пры яе рашэнні мы будзем дзейнічаць актыўна, паэтапна замяняючы адміністрацыйныя абмежаванні мерамі дадатковага рэгулявання і канкурэнцыі», — заявіў кіраўнік урада.
Цяпер чытаюць
Пасля беларускай вёскі Шнайдэраў больш не бянтэжыць пытанне ЛГБТ. Сям'я з Германіі, якая стала героямі прапаганды, вяртаецца ў ЕС25
Каментары