Акадэмія навук рыхтуе археалагічную карту Мінска. Апошнія знаходкі на Менцы ўносяць значныя карэктывы ў гісторыю горада
Да 960‑годдзя сталіцы даследчыкі Інстытута гісторыі НАН Беларусі рыхтуюць маштабны праект — археалагічную карту Мінска, якая аб'яднае вынікі шматгадовых даследаванняў.
Адначасова з гэтым працягваюцца раскопкі на рацэ Менцы, дзе першапачаткова ўзнік горад. Іх апошнія вынікі прымусілі навукоўцаў перагледзець некаторыя старонкі ранняй гісторыі паселішча.
Як расказаў тэлеканалу СТБ загадчык аддзела археалогіі сярэдніх вякоў і новага часу Інстытута гісторыі Андрэй Вайцяховіч, падчас сёлетняга сезона на Малым гарадзішчы (дзядзінцы — найбольш умацаванай частцы, дзе жыла эліта) у пласце пажару XI стагоддзя былі знойдзеныя ўнікальныя артэфакты.
Сярод іх — абгарэлая зброя, наканечнікі стрэл і дзіды, а таксама фрагменты драўлянага посуду. Драўляныя вырабы змаглі захавацца да нашых дзён выключна дзякуючы таму, што асмаліліся падчас тагачаснага пажару.
Даследаванні на Менцы ўносяць важныя карэктывы ў гістарычныя канцэпцыі. Па-першае, археолагі знаходзяць пацвярджэнні, што першыя абарончыя збудаванні з'явіліся тут яшчэ ў канцы X стагоддзя. Па-другое, абвяргаецца тэорыя пра хуткі заняпад паселішча.
«Лічылася, што горад Менск перастае функцыянаваць наогул у першай палове XII стагоддзя. Але высветлілася, што на гэтым малым гарадзішчы пасля пажару жыццё працягвалася», — адзначыў Андрэй Вайцяховіч.
Акрамя таго, паведамляецца пра новыя знаходкі ў галіне беларускай падводнай археалогіі. У Бешанковіцкім раёне з дна ракі паднялі элементы старажытных жытлаў, драўляны посуд і касцяныя ўпрыгажэнні. Гэтыя артэфакты належаць да эпохі позняга неаліту.
-
Крэўскі замак раскрыў галоўную таямніцу: знайшлі ўваход у цямніцу, дзе задушылі Кейстута
-
Ледзяныя муміі і перавал вікінгаў. Як з-пад лёду з'яўляюцца таямніцы, якія змяняюць уяўленні пра свет
-
«З расіян-наведнікаў працэнтаў 70 аказваліся ватнікамі». Экс-гід з музея ВАВ, якога затрымлівалі яго ж экскурсанты, цяпер папулярны ў Варшаве — пагутарылі з ім
Каментары